Kana ku Ziba Mubonelo wa Bibele ka za Somano Ki Kwa Butokwa?

“Ne ni kalile ku zamayanga ni bashimani ha ne ni li wa lilimo ze lishumi. Kwa makalelo, ne lu swalananga kwa mazoho ni ku tubetana. Hamulaho wa nakonyana, lwa kalisa ku swalananga kwa lilama za mubili ni ku eza somano. Ha ni to ba wa lilimo ze 15, na kalisa ku sebeza mi ne ni atumelwanga ki baana ba ne ba bata ku ezanga somano ni na. Ne ni bata ku bonisa kuli ni na ni bundume bwa ku eza lika ze ne ba saba ku eza ba bañwi ni ku latelela lika kaufela ze ne ba eza batu ba ne ni beleka ni bona. Ne ni bata kuli batu ba ne ni swalisana ni bona ba ni tabele, ili nto ye ne tahisize kuli ni ikenye hahulu mwa ku eza somano ka mutakafululele.”—BO SARAH, * BA KWA AUSTRALIA.

KANA kwa mi komokisa ku ziba kuli bo Sarah ne ba huliselizwe mwa lubasi lwa batu ba ba li balapeli? Bashemi ba bona ne ba likile ku ba hulisa ka likuka za Bibele za muzamao. Kono bo Sarah ne ba ketile nzila i sili.

Batu ba bañata ba kona ku yemela keto ya bo Sarah. Ba lumela kuli mubonelo wa Bibele ka za somano ha u koni ku tusa se siñwi mwa miteñi ya luna kakuli ki wa kale hahulu. Batu ba bañwi bona ha ba boni mulatu o inzi fa ku ipapata ku ba mulapeli yo mutuna ni ku ikenya mwa ku eza somano mutakafululele.

Kana ku ziba ni ku pila ka ku lumelelana ni ze i luta Bibele ka za somano ki kwa butokwa? Bibele i bulela kuli i ‘ñozwi ka susumezo ya moya wa Mulimu mi i tusa kwa ku luta.’ (2 Timotea 3:16) Haiba mwa lumela kuli Mulimu u bupile batu ni kuli Bibele ki Linzwi la Mulimu, mu swanela ku isa pilu ku ze i bulela Bibele ka za somano.

Ka bumai, batu ba bañata ha ba zibi luli ze i luta Bibele ka za somano. Baeteleli ba bulapeli ba ba ipapata ku kuteka Bibele ba sweli ku luta lituto ze shutana hahulu ni ze i luta Bibele. Mane bakeñisa milutelo ye shutana, ku bile ni likauhano mwa bulapeli bo buñata.

Ku fita ku itinga fa litaba ze ba bulela ba bañwi, mwa kona ku tanda nakonyana ku batisisa ze ñata ka za taba ye. Taba ye tatama i nyakisisa lipuzo ze lishumi ze buziwanga hañata ze ama mubonelo wa Bibele ka za somano. Mwa taba ye swana yeo, mu ka fumana likalabo za niti ze tomile fa litaba ze i luta Bibele luli. Taba ya mafelelezo mwa litaba ze, i ka talusa libaka ha kuli kwa butokwa ku nyakisisanga liketo za luna.

[Litaluso za kwatasi]