Mu Itute Linzwi La Mulimu

Kana Bibele ya Polofita ze ka Ezahala Kwapili?

Taba ye i nyakisisa lipuzo ze ne mu kana mu ipuzize mi i bonisa ko mu kona ku fumana likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Kana bupolofita bwa mwa Bibele bu bulela lika ka ku nonga?

Ki Mulimu ya Maata Ote feela ya kona ku zibela cimo ka butungi ze ka ezahala kwapili. (Amosi 3:7) Ka mutala, ku zwa kwa simuluho Mulimu naa bulelezi cimo ka za ku taha kwa mutu ya naa ka bizwa Mesia kamba Kreste. Mesia naa ka zwelela mwa lusika lwa Abrahama, muuna ya sepahala. Na ka ba mubusi ya naa ka tahisa kuli batu ba ba sepahala ba fumane sinca mbuyoti ya ku ba ni bupilo bo bu petehile bo bu si na matuku. (Genese 22:18; Isaya 53:4, 5) Ya Sepisizwe yo, naa ka zwelela mwa Betelehema.—Mu bale Mika 5:2.

Jesu naa bonisize kuli ki yena Mesia. Lilimo ze fitelela 700 pili Jesu a si ka pepwa kale, Bibele ne i polofitile kuli Mesia naa ka pepwa ki mwalyanjo mi naa ka kendiwa. Naa ka shwela libi za batu ba bañata, mi naa ka pumbekiwa ni bafumi. (Isaya 7:14; 53:3, 9, 12) Lilimo ze fitelela 500 kwamulaho, Bibele hape ne i bulelezi cimo kuli Jesu naa ka kena mwa Jerusalema inze a pahami fa mbongolo mi naa ka betekiwa ka masheleñi a 30 a silivera. Bupolofita kaufela bo bu ama Jesu ne bu talelelizwe.—Mu bale Zakaria 9:9; 11:12.

2. Kana Mulimu wa bulelelanga cimo mazazi fo ku ka ezahalela sika?

Lilimo ze fitelela 500 kwamulaho, Bibele ne i polofitile silimo tenyene sa naa ka bonahala Mesia. Nako ye ne fitile pili Mesia a si ka taha kale ne i balwa ka lisunda za lilimo, ili ku talusa kuli “sunda” iliñwi ne i yemela lilimo ze supile. Nako yeo ne i ka ba lisunda ze 7 ni lisunda ze 62, mi ha li kopanywa hamoho li ba lisunda ze 69 za lilimo. Lisunda ze 69 za lilimo li likana ni lilimo ze 483. Lilimo zeo ne li kalile lili? Ka ku ya ka Bibele, lilimo zeo ne li kalile ka nako yeo mutangaa Jehova Nehemia naa fitile mwa Jerusalema ni ku kalisa ku yaha sinca muleneñi. Litaba za ikale za Maperesia li bonisa kuli silimo seo ne li sa 455 B.C.E. (Nehemia 2:1-5) Jesu naa kolobelizwe sina Mesia lilimo ze 483 hasamulaho wa fo, mwa silimo sa 29 C.E., ili sona silimo luli sa naa ka bonahala Mesia.—Mu bale Daniele 9:25.

  3. Kana bupolofita bwa Bibele bu sweli bwa talelezwa kacenu?

Jesu naa polofitile likezahalo za butokwa ze ne ka ezahala mwa nako ya luna. Naa polofitile ka za taba ye nde ya Mubuso wa Mulimu o ka tahisa kimuluho kwa batu kaufela ba ba lata Mulimu mwa lifasi. Mubuso wa Mulimu u ka felisa bumaswe kaufela bo bu li teñi ka nako ya cwale.—Mu bale Mateu 24:14, 21, 22.

Bupolofita bwa Bibele bu talusa ka butungi lika ze ka ezahala ka nako ya maungulelo a muinelo wa lifasi. Bibele ne i bulelezi cimo kuli ka ku shutana ni ze kana za libelelwa mwa nako ya zwelopili, batu ne ba ka sinya lifasi. Liziyezi ze tahiswa ki lindwa, ku taela kwa lico, lizikinyeho, ni matuku a yambukela ne li ka ekezeha. (Luka 21:11; Sinulo 11:18) Batu ne ba ka tuhela ku pila ka likuka za muzamao. Mwa linako ze taata zeo, balutiwa ba Jesu ne ba ka kutaza taba ye nde ya Mubuso wa Mulimu mwa lifasi kaufela.—Mu bale Mateu 24:3, 7, 8; 2 Timotea 3:1-5.

4. Kiñi ze ka ezahala kwa batu kwapili?

Mulimu ya Maata Ote u bulukezi batu ba ba sepahala lika ze nde. Jesu Kreste, yena Mesia, hamoho ni ba bañwi ba ba ketilwe, ba ka busa lifasi ku zwelela kwa lihalimu. Ki bona ba ba ka busa mwa Mubuso wa lilimo ze sikiti. Bafu ba ka zusiwa ni ku ba ni kolo ya ku fiwa bupilo bo bu sa feli. Kwandaa zeo, Mubuso u ka folisa batu kaufela ba ba ka pila ka nako yeo. Matuku ni lifu ha li sa na ku ba teñi.—Mu bale Sinulo 5:10; 20:6, 12; 21:4, 5.

Kuli mu bale litaba ze ñata ka za taba ye, mu bone makepe 23-25 ni makepe 197-201 a buka ya Bibele I Lutañi Luli? ye bonisizwe fa.