Niti Ka Za Armagedoni

“Mioya ya madimona . . . ya ya kwa malena ba lifasi kaufela . . . , ya kopanya malena mwa sibaka se si bizwa Harmagedoni, ka Siheberu.” (Litaku li siyamisizwe ki luna.)—SINULO 16:14, 16, Bibele ye Kenile, Hatiso ya 1984.

LINZWI la Armagedoni, ili leo fokuñwi li tolokiwanga kuli “Harmagedoni” ki libizo la sibaka. Kono ku bonahala kuli ha ku na sibaka luli se ne si bizwa cwalo fa lifasi.

Kamukwaocwalo, ki ifi taluso luli ya linzwi la “Armagedoni”? Ki kabakalañi linzwi leo hañata ha li swanisezanga kezahalo ye cwale ka ndwa?

Ku Kubukanyezwa Kwa Sibaka se si Bizwa Armagedoni

Linzwi la Siheberu le li tolokilwe kuli Harmagedoni li talusa “Lilundu la Megido.” Nihaike kuli ha ku na lilundu le ne li bizwa kuli Megido, ku na ni sibaka se ne si bizwa Megido. Sibaka seo ne si fumaneha fa manganandila a butokwa hahulu a mikwakwa ye mibeli ye mituna ye ne zwa kwa mutulo-wiko wa sibaka ko ne ba pila Maisilaele ba kwaikale. Lindwa ze ñata ne li lwanezwi bukaufi ni sibaka seo. Kona libaka libizo la Megido ha li swanisezanga ndwa. *

Hakulicwalo, Megido ha i talusi mufuta wa lindwa ze ne lwanezwi kwateñi kono i talusa libaka lindwa zeo ha ne li lwanilwe. Megido ne li kalulo ya Naha ya Sepiso yeo Jehova Mulimu naa file Maisilaele. (Exoda 33:1; Joshua 12:7, 21) Naa itamile ka luci kuli naa ka sileleza Maisilaele kwa lila za bona, mi naa ezize ona cwalo. (Deuteronoma 6:18, 19) Ka mutala ne li kwa lilundu la Megido ko Jehova naa silelelize ka makazo Maisilaele kwa mpi ya Makanana ye ne etelezwi ki Mulena Jabini ni muzamaisi wa mpi Sisera.—Baatuli 4:14-16.

 Kamukwaocwalo, linzwi la “Harmagedoni” kamba “Armagedoni” li swaniseza nto ye tuna. Li swaniseza likwata ze peli za batu ba ba maata ba ba itwanisa.

Bupolofita bo bu kwa Sinulo bu bulela ka za nako ye kwapilinyana yeo Satani ni madimona ba ka susueza milonga ya batu ku kopanya limpi za bona ka mulelo wa ku nyandisa batu ba Mulimu ni ku bata ku ba palelwisa ku peta musebezi wa bona. Tasezo yeo i ka tahisa mafu a batu ba bañata ka nako yeo Mulimu a ka nga muhato wa ku yundisa lila za hae.—Sinulo 19:11-18.

Ki kabakalañi Mulimu ya taluswa mwa Bibele kuli ki ya “utwela mutu butuku, ya sa halifi kapili, ya na ni mukekecima” ha ka timeza batu ba bañata cwalo? (Nehemia 9:17) Kuli lu utwisise libaka Mulimu ha ka eza cwalo, lu tokwa ku alaba lipuzo ze taalu ze latelela: (1) Ki mañi ya ka kalisa ndwa yeo? (2) Ki kabakalañi Mulimu ha ka nga muhato? (3) Ndwa ya Armagedoni i ka tahisa lituso lifi za ku ya ku ile fa lifasi?

1. KI MAÑI YA KA KALISA NDWA YEO?

Mulimu ha na ku tahisa ndwa ya Armagedoni kabakala ku tabela ndwa. Kono, Mulimu u ka sileleza batu ba bande kwa lila za bona ze ka ba lwanisa. Ba ba ka shemaeta ndwa ye ki “malena ba lifasi kamukana,” ili bona baeteleli ba lifasi. Ki kabakalañi ha ba ka taseza batu ba Mulimu? Kakuli Satani u ka tahiseza mibuso ya lifasi ni limpi za yona ku kwenuhela balapeli ba Jehova Mulimu ka ndwa ya meeto mafubelu.—Sinulo 16:13, 14; 19:17, 18.

Bakeñisa kuli batu ba koñomeka hahulu ka za tukuluho ya bulapeli ni tukuluho ya ku ipulelela, mwa linaha ze ñwi mazazi a, muhupulo wa kuli mibuso i ka felisa bulapeli kamba ni haiba feela ku lika ku kusufaza kamba ku feza likwata za bulapeli u bonahala ku sa konahala. Nihakulicwalo, litwaniso ze cwalo ne li ezahalile mwa lilimo za ma 1900 C.E mi li sa ezahala ni mazazi a. * Kono, ku na ni lishutano ze peli ze tuna mwahalaa litasezo zeo ze ne bile teñi ni tasezo ye ka ba teñi fa Armagedoni. Sapili, tasezo yeo i ka ba ya lifasi kaufela. Sa buleli, Jehova  Mulimu u ka itusisa maata a hae a matuna kwa ku sileleza batu ba hae ku fita mwa naa kile a ezeza nako ifi kamba ifi kwamulaho. (Jeremia 25:32, 33) Bibele i biza ndwa yeo kuli ki “ndwa ya lizazi le lituna la Mulimu ya Maata-Ote.”

2. KI KABAKALAÑI MULIMU HA KA NGA MUHATO?

Jehova u laela balapeli ba hae kuli ba pilisane ka kozo ni batu kamukana ni kuli ba late lila za bona. (Mika 4:1-3; Mateu 5:43, 44; 26:52) Kamukwaocwalo, ha ba na ku itusisa lilwaniso kuli ba isileleze ka nako ye ba ka tasezwa mwa ndwa ya meeto mafubelu. Kambesi kuli Mulimu u ka sileleza batu ba hae ka nako yeo, ne ba ka yundiswa kaufela bona. Kamukwaocwalo, libizo la Jehova Mulimu ni libubo la hae ne li ka shwaulwa. Lila za Mulimu ha ne li ka yundisa batu ba Hae, ne ku ka bonahala inge kuli Jehova ha na lilato, katulo ye lukile ni maata a ku sileleza batu ba hae. Kono Mulimu ha na ku tuhelela nto ye cwalo ku ezahala!—Samu 37:28, 29.

Mulimu ha lati ku timeza mutu ufi kamba ufi, kona libaka ha lemuseleza cimo batu ka za lelile ku eza. (2 Pitrosi 3:9) Ka litaba ze ñozwi mwa Bibele, u hupulisa batu kaufela kuli naa kile a sileleza batu ba hae kwamulaho ha ne ba taselizwe ki lila za bona. (2 Malena 19:35) Bibele hape i lemusa kuli kwapili Satani ni batu ba hae ha ba ka taseza batu ba Mulimu, Jehova u ka itusisa maata a hae ku sileleza batu ba hae. Mane Linzwi la Mulimu ne li polofitile kale kuli Jehova u ka sinya ba ba maswe. (Liproverbia 2:21, 22; 2 Matesalonika 1:6-9) Ka nako yeo, balwanisi ha ba na ku kakanya kuli ba lwanisa Ya-Maata-Kaufela.—Ezekiele 38:21-23.

3. NDWA YA ARMAGEDONI I KA TAHISA LITUSO LIFI ZA KU YA KU ILE FA LIFASI?

Ndwa ya Armagedoni i ka tahisa kuli batu ba bañata ba piliswe. Mane i ka ba makalelo a kozo fa lifasi.—Sinulo 21:3, 4.

Buka ya Sinulo i bulela ka za “buñata bo butuna bwa batu” ba ba ka punyuha ndwa ye. (Sinulo 7:9, 14) Ka ketelelo ya Mulimu, bapunyuhi bao ba ka lukisa sinca lifasi ni ku li bisa Paradaisi sina mwa naa lelezi Jehova kwa makalelo.

Kana lwa ziba nako yeo lila za Mulimu li ka taseza batu ba Hae?

[Litaluso za kwatasi]

[Siswaniso se si fa likepe 6]

Jehova Mulimu naa silelelize batu ba hae kwamulaho

[Siswaniso se si fa likepe 7]

Jehova u ka sileleza batu ba hae hape, fa ndwa ya Armagedoni