Kana ku na ni ya Teelezanga Kwa Litapelo?

“Ne ni kakanyanga ka za haiba Mulimu u teñi luli. Kono nihakulicwalo, ka linako ze ñwi ne ni lapelanga. Ne ni kakanyanga ka za haiba ku na ni ya naa ni teelezanga, kono ne ni na ni sepo ya kuli ku na ni ya naa ni teelezanga. Ne ni si na tabo mi ne ni si na mulelo mwa bupilo. Ne ni saba ku lumela ku Mulimu kabakala ku nahana kuli ki batu feela ba mayemo a kwatasi ba ne ba lumela ku Mulimu.”—BO PATRICIA * BA KWA IRELAND.

KANA mu kile mwa ikutwa sina mo ne ba ikutwelanga bo Patricia? Kana mwa lapelanga ku si na taba ni kuli mwa kakanyanga ka za haiba Mulimu u teñi? Haiba ku cwalo, haki mina mu nosi ba ba kakanya ka za haiba Mulimu u teñi. Mu nyakisise mitala ye latelela.

▪ Patisiso ye ne ezizwe mwa Britain kwa batu ba palo ye eza 2,200 ne i bonisize kuli ibato batu ba 500 ba lumela kuli ku na ni ya bupile lifasi ni ya utwa litapelo. Kono ba ba fitelela 1,200 ku bona, ba lapelanga ka linako ze ñwi.

▪ Patisiso ye ñwi ye ne ezizwe kwa batu ba 10,000 ba ba zwa mwa linaha ze shutana-shutana ne i bonisize kuli ibato ba 30 pesenti ya batu ba ba bulela kuli ha ba lumeli ku Mulimu, ba lapelanga.

Ki Kabakalañi ha ba Kakanyanga?

Muuna yo muñwi ya pila kwa England ya bizwa Allan u bulela kuli: “Ne ni bulelanga kuli ne ni sa lumeli ku Mulimu kabakala kuli ne ni nahananga kuli bulapeli ne bu ezelizwe ku zamaisa batu ni ku ba fumanisa masheleñi. Hape ne ni nahananga kuli, haiba Mulimu u teñi, naa si ke a tuhelela bumaswe ku ba teñi. Kono ka linako ze ñwi ne ni inanga inze ni kuzize ni ku ambola ni ‘nto ye ñwi.’ Hape ne ni ipuzanga kuli, ‘Ne ku tahile cwañi kuli ni be teñi?’”

Mutu kaufela ya na ni maikuto a cwalo u na ni mabaka a ku kakanya ka za haiba litapelo za alabiwanga. Mwa miinelo ye miñata, ku kakanya ku tahiswanga kabakala lipuzo ze si ka alabiwa, ze cwale ka ze latelela:

▪ Kana ku na ni Mubupi?

▪ Ki kabakalañi bulapeli hañata ha bu susuezanga bumaswe?

▪ Ki kabakalañi Mulimu haa tuhelela manyando ku ba teñi?

Ha ne mu ka ziba likalabo za lipuzo ze, kana ne mu ka ba ni takazo ye tuna ya ku lapelanga?

[Litaluso za kwatasi]