Ki Kabakalañi ya Utwa Litapelo Ha Tuhelela Manyando ku ba Teñi?

NIHAIKE kuli batu ba bañwi ba lapelanga, ba kakanyanga ka za haiba Mulimu u teñi luli. Ki kabakalañi ha ba kakanyanga? Mwendi ki kabakala kuli ku na ni manyando a mañata hahulu mwa lifasi. Kana mu kile mwa ipuza libaka Mulimu ha tuhelela manyando ku ba teñi?

Kana luli Mulimu naa bupile batu sina mo ba inezi ka nako ya cwale, ka muinelo wa ku sa petahala ni wa ku ba mwa manyando? Ne ku ka lu bela taata ku kuteka mulimu ya bata kuli batu ba nyande. Kono mu nyakisise mutala wo: Ha ne mu ka tatuba mota ye nca, mi mu fumana kuli ku na ni fo i mbobezi, kana ne mu ka bulela kuli kona mo ne i pangezwi? Batili! Ne mu ka ziba kuli mupangi wa yona naa i pangile inze i “iketile” kono mwendi ne i sinyizwe ki mutu yo muñwi kamba nto ye ñwi.

Ka ku swana, ha lu talima pupo ye makaza ni ye lukisizwe hande kono hape ni ku lemuha mo mifilifili ni ku sa sepahala li tahiseza batu manyando, ki sifi se lu swanela ku lemuha? Bibele i luta kuli Mulimu naa bupile batu ba pili inze ba li ba ba petahalile, kono hasamulaho ne ba itahiselize manyando. (Deuteronoma 32:4, 5) Taba ye nde ki ya kuli Mulimu u sepisa ku lukisa sinca miinelo ilikuli a kutiseze batu ba ba ipeya ku utwa kwa bupetehi. Kono ki kabakalañi he, ha tuhelezi manyando ku ba teñi ka nako ye telele?

Ki Kabakalañi Mulimu ha Tuhelezi Manyando ku ba Teñi ka Nako ye Telele?

Libaka li ama ku alabiwa kwa puzo ya kuli ki mañi ya swanela ku busa batu. Jehova naa si ka lela kuli batu ba ipuse. Naa swanela ku ba Mubusi wa bona. Bibele kasibili i bulela kuli: “Mutu nihaa zamaya, haa koni ku izamaisa ili yena.” (Jeremia 10:23) Ka bumai, batu ba pili ne ba iketezi ku kwenuhela bubusi bwa Mulimu. Keto ya bona ya ku tula mulao ne i tahisize kuli ba be baezalibi. (1 Joani 3:4) Kamukwaocwalo, ne ba latehezwi ki bupetehi mi ba itahiseza manyando hamohocwalo ni ku tahiseza bana ba bona manyando.

Ka lilimo ze ñata-ñata, Jehova u tuhelezi batu ku ipusa, mi litaba ze ezahezi li bonisa kuli batu  ha ba na maata a ku ipusa. Litaba ze ezahezi li bonisa kuli mibuso ya batu i tahiseza batu manyando. Ha ku na mubuso o konile ku felisa ndwa, bukebenga, kutokwa mulao, kamba matuku.

Mulimu U ka Felisa Cwañi Manyando?

Bibele i sepisa kuli ona cwale-cwale fa, Mulimu u ka tisa lifasi le linca mo ku ka yaha ku luka. (2 Pitrosi 3: 13) Ki bao feela ba ba itatela ku bonisa lilato ku ba bañwi ni ku Mulimu ba ba ka pila mwateñi.—Deuteronoma 30:15, 16, 19, 20.

Bibele hape i bulela kuli fa “lizazi la katulo” le se li atumezi hahulu, Mulimu u ka felisa manyando ni ba ba a tahisa. (2 Pitrosi 3:7) Hasamulaho wa fo, Mubusi ya ketilwe ki Mulimu, yena Jesu Kreste u ka busa batu ba ba ipeya ku utwa. (Daniele 7:13, 14) Puso ya Jesu i ka petañi? Bibele i bulela kuli: “Ba ba ishuwa ba ka luwa naha, ba ka ikola kozo ye tuna.”—Samu 37:11.

Ka ku ba Mulena wa kwa lihalimu, Jesu u ka felisa manyando a cwale ka makulanu, busupali ni lifu ili ze ne tahile kabakala kuli batu ne ba kwenuhezi Jehova, yena “liwelu-welu la bupilo.” (Samu 36:9) Jesu u ka folisa batu kaufela ba ba lumela ku busiwa ki yena. Mwatasaa puso ya hae, lisepiso ze, ze mwa Bibele li ka talelezwa:

▪ “Ha ku na mutu ya . . . ka ipulela kuli: Na kula. Sicaba se si yahile mwa Sione si swalezwi libi za sona.”—Isaya 33:24.

▪ “[Mulimu] u ka takula miyoko kaufela kwa meeto a bona, mi lifu ha li sa na ku ba teñi, nihaiba ku tahelwa ki maswabi kamba ku lila kamba ku utwa butuku. Za pili li felile.”—Sinulo 21:4.

Kana haki nto ye omba-omba ku ziba kuli ona cwale-cwale fa Mulimu u ka taleleza sepiso ya hae ya ku felisa manyando kaufela? Ka nako  ya cwale, lwa kona ku ba ni buikolwiso bwa kuli Mulimu wa utwa litapelo za luna nihaike kuli u tuhelezi manyando ku ba teñi ka nakonyana.

Mulimu u teñi, mi wa kona ku utwa nihaiba lipilaelo za mina za ku utwa butuku ni maswabi. Mi u nyolelwa ku mi bona inze mu ikola bupilo ka nako ye mu si ke mwa kakanya ka za ku ba teñi kwa hae ni ka nako ye mu si ke mwa utwa butuku.