Ki Mañi Ya Utwa Litapelo?

HAIBA ku na ni ya utwa litapelo, kona kuli u swanela ku ba Mubupi. Ya bupile booko bwa mutu ki Yena feela ya kona ku ziba mihupulo ya mutu. Mi ki yena feela ya kona ku alaba litapelo za batu ni ku ba fa tuso ye ba tokwa. Mu kana mwa ipuza kuli, ‘Kana ki nto ye utwahala ku lumela kuli ku na ni Mubupi?’

Batu ba bañata ba nahana kuli, ku lumela kuli Mubupi u teñi ku talusa ku sa lumela mwa litaba za sayansi. Kono mubonelo wa kuli ku lumela ku Mulimu ha ku swalisani ni litaba za sayansi ki wa buhata. Ha lu nyakisiseñi mitala ye latelela.

▪ Patisiso ye ne ezizwe cwanoñu fa mwa liyunivesiti ze tuna ze 21 za mwa United States ne i fumani kuli mwahalaa licaziba ze 1,646 ibato ba licaziba ze 550, ne ba sa lumeli ku Mulimu.

Niti kikuli buñata bwa ba sayansi ba lumela kuli Mulimu u teñi.

Bupaki bo bu Bonisa Kuli ku na ni Mubupi

Kana lwa swanela feela ku lumela kuli ku na ni ya utwa litapelo ku si na bupaki? Kutokwa! Muhupulo wa kuli ku ba ni tumelo ku talusa ku lumela feela lika ku si na bupaki haki wa niti. Bibele i talusa kuli tumelo ki “bupaki bo bu kolwisa bwa lika za niti ze sa bonwi.” (Maheberu 11:1) Ka mutala, ha mu koni ku bona moya, kono mwa kona ku bona ze u peta inge cwalo ha u nyanganyisa matali a kota. Kamukwaocwalo, mwa kona ku lumela kuli ku na ni moya. Kamukwaoswana, nihaike kuli ha lu koni ku bona ya utwa litapelo, lwa kona ku nyakisisa bupaki bo bu li teñi ili bo bu bonisa kuli u teñi.

Lu kona ku fumana kai bupaki bo bu bonisa kuli Mulimu u teñi? Lu swanela feela ku talimisisa lika ze lu potolohile. Bibele i bulela kuli: “Ki niti, ndu ni ndu i na ni ya i yahile, kono ya yahile lika kamukana ki Mulimu.” (Maheberu 3:4)  Kana mwa lumelelana ni manzwi ao? Mwendi ha mu ka nahanisisa ka za pupo kaufela, simuluho ya bupilo kamba ka mo bu ezelizwe booko mu ka lemuha kuli ku na ni ya pahami ku fita batu.

Kono ku na ni maciñekelo ku ze lu kona ku ituta kwa pupo ka za Mulimu. Ku nyakisisa bupaki bwa kuli Mulimu u teñi ka ku talimisisa za bupile ku swana feela sina ku utwa misindo ya mutu ya nzaa atumela muzuzu wa mina. Mwa ziba kuli ku na ni mutu ya inzi fande, kono ha mu koni ku ziba kuli ki mañi. Kuli mu zibe kuli ki mañi, mu swanela ku kwalula sikwalo. Lu tokwa ku eza nto ye swana kuli lu kone ku ziba ya bupile lika kamukana.

Bibele i swana sina sikwalo sa zibo ya za Mulimu. Ha mu kwalula sikwalo seo ni ku nyakisisa bupolofita bo buñwi bwa yona ni mo bu talelelizwe, mu ka fumana bupaki bwa kuli Mulimu u teñi. * Kwandaa ku fa bupaki bwa kuli Mulimu u teñi, litaba ze mwa Bibele ze bulela ka za mo Mulimu naa sebelisanezi ni batu, li bonisa kuli ya utwa litapelo ki Mulimu ya cwañi.

Ya Utwa Litapelo ki ya Cwañi?

Bibele i patulula kuli ya utwa litapelo u teñi luli, mi mwa kona ku mu ziba. Eni, wa kona ku mi teeleza ka kutwisiso. Kwa susueza ku bala kuli: “Wena ya utwa milapelo, batu kaufela ba ka ta ku Wena.” (Samu 65:2) Wa utwanga litapelo za batu ba ba lapela ku yena ka tumelo. Mi u na ni libizo. * Bibele i bulela kuli: “Muñaa Bupilo [Jehova] u kwahule ni ba ba maswe; kono u  utwa litapelo za ba ba na ni niti.”—Liproverbia 15:29.

Jehova u na ni maikuto. Ki “Mulimu wa lilato” mi u bizwa kuli ki “Mulimu ya tabile.” (2 Makorinte 13:11; 1 Timotea 1:11) Bibele i bulela ka mwa naa ikutwezi Mulimu ka nako ye ne bu atile hahulu bumaswe mwa lifasi kuli: “Pilu ya hae ya swaba.” (Genese 6:5, 6) Taba ya kuli Mulimu u likanga batu ka ku ba tahiseza manyando haki ya niti. Bibele i bulela kuli: “Taba ya kuli Mulimu u ka eza bumaswe i kwahule.” (Jobo 34:10) Nihakulicwalo, mu kana mwa ipuza kuli, ‘Haiba Mulimu ki Mubupi ya maata ote, ki kabakalañi ha tuhelezi manyando ku zwelapili?’

Jehova u file batu maata a ku iketela za ku eza, mi seo si lu bonisa kuli ki Mulimu ya cwañi. Kana lwa itebuha tukuluho ya luna ya ku iketela mo lu ka pilela? Ka bumai, batu ba bañata ba itusisize maswe tukuluho ya bona mi ku eza cwalo ku tahisize kuli ba ikenye mwa manyando ni ku kenya ba bañwi mwa manyando. Cwale ki ye puzo ya butokwa ye lu tokwa ku nahanisisa ka butungi: Mulimu u kona ku felisa cwañi manyando a batu a sa ba amuhi tukuluho ya bona? Lu ka nyakisisa puzo ye mwa taba ye tatama.

[Litaluso za kwatasi]

[Mbokisi fa likepe 5]

Kana Mwa Kakanya Kuli ha ku na Mulimu Bakeñisa Lika ze Maswe ze Eziwa ki Bulapeli?

Ka bumai, bulapeli ki bona bo bu tahisezanga ba bañata ku kakanya kuli ku na ni ya utwa litapelo. Ku ikenya kwa bulapeli mwa lindwa, bukebenga ni ku tuhelela ku nyandiswa kwa banana ku tahiselize nihaiba batu ba ba lapela ku bulela kuli, “Ha ni lumeli ku Mulimu.”

Ki kabakalañi bulapeli hañata ha bu susuezanga bumaswe? Libaka ka bukuswani ki la kuli, batu ba ba maswe ba ezize lika ze maswe mwa libizo la bulapeli. Bibele ne i polofitile kuli Bukreste ne bu ka komiwa ni ku itusiswa kwa ku eza lika ze maswe. Muapositola Paulusi naa bulelezi baokameli ba Sikreste kuli: “Mwahalaa mina luli ku ka zwa baana ba ba ka bulela litaba ze kopami kuli ba yembulule balutiwa, ba ba latelele.”—Likezo 20:29, 30.

Mulimu u toile bulapeli bwa buhata. Mane Bibele, lona Linzwi la Mulimu, li bonisa kuli bulapeli bwa buhata bu na ni mulatu wa “mali a . . . bao kaufela ba ba bulailwe mwa lifasi.” (Sinulo 18:24) Bakeñisa kuli bulapeli bwa buhata bu palezwi ku luta batu niti ka za Mulimu ili yo kalemeno ka hae ka katuna ki lilato, bulapeli bo, bu na ni mulatu wa mali mwa meeto a Mulimu.—1 Joani 4:8.

Ya utwa litapelo u utwela makeke batu ba ba nyandiswa ki bulapeli. Ona cwale-cwale fa, lilato la Mulimu kwa batu li ka mu susueza ku atula bulapeli kaufela bwa buhata ka ku itusisa Jesu. Jesu naa bulezi kuli: “Ba bañata mwa lizazi leo ba ka li ku na: ‘Mulena, Mulena, kana ne lu si ka polofita . . . ka libizo la hao?’ Kono cwale kiha ni ka ba bulelela kuli: Na li ku ba ni mi zibe! Ha mu zwe ku na, mina ba ba si na mulao!”—Mateu 7:22, 23.