Mu Sutelele ku Ya Utwa Litapelo

BATU ba bañata ba ba bulela kuli ba lumela ku Mulimu ha ba koni ku talusa libaka le li tisa kuli ba be ni tumelo. Ha ba koni ku talusa libaka hañata ha ku na ni bumaswe mwa bulapeli kamba libaka Mulimu ha tuhelela manyando ku ba teñi. Ze ba kona feela ku eza ki ku lapela ku Mulimu ye ba sa utwisisi.

Nihakulicwalo, mwa kona ku sutelela ku Mulimu inze mu utwisisa libaka ha mu eza cwalo. Mwa kona ku tiisa tumelo ya mina ka ku ba ni kutwisiso ya za Mulimu ili nto ye ka mi tahiseza ku mu lata ni ku itebuha yena. Tumelo ya luli i tomile fa bupaki. (Maheberu 11:1) Haiba mu ituta niti ka za Mulimu, mwa kona ku mu ziba ni ku ambola ni yena sina mo mu kona ku ambolela ni mulikanaa mina. Mu nyakisise mitala ya batu ba bañwi ba ne ba lapelanga niha ne ba si na buikolwiso bwa kuli Mulimu u teñi.

▪ Bo Patricia, ba ba bulezwi mwa taba ya kwa makalelo, ba bulela kuli: “Zazi le liñwi ne ni inzi ni sikwata sa balikani ba ba bato ba ba lishumi ha ne ba kalisize ku ikambota ka za bulapeli. Ne ni ba bulelezi kuli ne ni zwile fa ndu ilikuli ni picuke puisano ya bo ndate (ba ne ba sa lumeli ku Mulimu) ni yo muñwi wa Lipaki za Jehova ya naa tilo pota. Mulikanaa ka yo muñwi sa ni bulelela kuli, ‘Mwendi Lipaki za Jehova ba luta niti.’

“Yo muñwi yena sa ni bulelela kuli, ‘Kiñi ha lu sa yi ku o muñwi wa mikopano ya bona kuli lu yo ikutwela niti?’ Mi ne lu ezize ona cwalo feela. Nihaike kuli ne lu sa kakanya, luna ba bañwi ne lu zwezipili ku kopananga kabakala kuli Lipaki za Jehova ne ba na ni silikani.

“Kono zazi le liñwi la Sunda ne ni utwile nto ye ñwi ye ne tisize kuli ni cince mubonelo wa ka. Mubuleli naa talusize libaka batu ha ba nyanda. Kale ne ni sa utwisisangi kuli mutu sapili naa bupilwe inze a li ya petahalile ni kuli mutu a li muñwi ki yena ya naa tahiselize batu kaufela sibi ni lifu. Mubuleli hape naa talusize kuli lifu la Jesu ne li la butokwa bakeñisa kuli ne li ka tahisa kuli batu ba fumane lika zeo mutu wa pili naa latehezwi ki zona. * (Maroma 5:12, 18, 19) Hañi-hañi, naa kala ku utwisisa lika kaufela. Naa utwisisa kuli, ‘Ku na ni Mulimu ya lu tokomela.’ Naa zwelapili ku ituta Bibele mi hasamulaho wa nako, naa ikutwa kuli ne ni kona ku lapela ku Mulimu ili maikuto a ne ni bile ni ona lwa pili.”

▪ Bo Allan, ba ba bulezwi hape mwa taba ya kwa makalelo, ba bulela kuli: “Zazi le liñwi Lipaki za Jehova ba taha kwa ndu ya luna mi musalaa ka a ba amuhela bakeñisa kuli naa tabela ku ziba ze ba luta ka za ku pila ku ya ku ile mwa lifasi. Taba yeo ne i ni nyemisize. Kamukwaocwalo, na siya baenyi mwa ndandulo ni ku bizeza musalaa ka kwa liapehelo ni ku yo mu bulelela kuli, ‘U si ke wa ba sikuba. Ha u koni ku lumela lika ze cwalo!’

“Musalaa ka a ni alaba kuli, ‘Haiba ba bulela  buhata, a mu ye mu yo ba bonisa kuli ki mahata.’

“Niti ki kuli ne ni sa koni ku eza cwalo. Kono Lipaki za Jehova ne ba na ni musa mi ba ni siyela buka ye bulela ka za haiba lika ze pila ne li bupilwe kamba ne li tile ka ku ipilaula feela. Litaba ze mwa buka yeo ne li utwahala ni ku swalisana kuli mane na ikatulela feela kuli ni swanela ku ziba ze ñata ka za Mulimu. Na kalisa ku ituta Bibele ni Lipaki mi hasamulaho, na lemuha kuli ze i bulela Bibele li shutanela kwahule ni ze ne ni nahananga ka za bulapeli. Ha ne ni nze ni ituta ka za Jehova, na kala ku lapelanga ku yena ka ku nonga. Ne ni na ni mikwa ye ne si yona hande, kamukwaocwalo, na kupa tuso ku Mulimu. Ni na ni buikolwiso bwa kuli Jehova naa alabile litapelo za ka.”

▪ Bo Andrew, ba ba pila kwa England, ba bulela kuli: “Ku si na taba ni kuli ne ni na ni tumelo ye tiile mwa litaba za sayansi mi ne ni li tabela hahulu, ne ni lumela mwa tuto ya kuli lika ne li tahile ka ku ipilaula ka libaka feela la kuli batu ba bañwi ne ba bulela kuli tuto yeo ki ya niti. Ne ni sa lumeli ku Mulimu bakeñisa lika ze maswe kaufela ze ezahalanga.

 “Kono ka linako ze ñwi ne ni ipuzanga kuli: ‘Haiba Mulimu u teñi kwa lihalimu, ni bata ku ziba libaka lika ze kaufela ha li ezahala. Ki kabakalañi ha ku na ni hahulu bukebenga ni lindwa?’ Ha ne ni banga mwa butata, ne ni kupanga tuso mwa tapelo nihaike kuli ne ni sa zibi kuli ne ni lapelanga ku mañi.

“Mutu yo muñwi naa file musalaa ka trakiti ye hatisizwe ki Lipaki za Jehova ye bulela kuli Kana Lifasi Le Li ka Punyuha? Hañata ne ni nahananga ka za puzo ye swana yeo. Trakiti yeo ne i tahisize kuli ni ipuze kuli, ‘Kana na tokwa ku isa pilu kwa likalabo ze mwa Bibele?’ Hamulaho wa fo, ha ne ni li kwa pumulo, mutu yo muñwi a ni fa buka ye li The Bible—God’s Word or Man’s? * Ha ne ni lemuhile kuli Bibele ya lumelelana ni sayansi ya niti, ne ni ikutwile kuli ne ni tokwa ku ituta ze ñata ka za Bibele. Kamukwaocwalo, yo muñwi wa Lipaki za Jehova ha naa kupile ku ituta Bibele ni na, na lumela. Ha ne ni fitile fa ku utwisisa mulelo wa Jehova, ne ni fitile fa ku ikutwa kuli se ni mu ziba luli, mi ne ni kona ku lapela ku yena ka ku lukuluha.”

▪ Bo Jan, ba ne ba huliselizwe mwa bulapeli bwa Protestanti mwa London, ba bulela kuli: “Buipi bo bu li teñi mwa bulapeli ni ku ata kwa manyando ne ku tahisize kuli ni tuhele ku ba wa bulapeli. Na tuhela ku ituta kwa Koleji ye ñwi mi na kala ku opelanga ni ku lizanga gitaya kuli ni kone ku fumananga masheleñi. Kona fo ne ni zibanezi ni bo Pat. Bo Pat ne ba huliselizwe mwa bulapeli bwa Katolika mi ne ba tuhezi ku lapela sina na.

“Ne lu inanga ni batu ba bañwi ba ne ba tuhelezi sikolo fa fahali mwa ndu ye ne sinyehile mi batu bao ne ba tabela za bulapeli bwa kwa bucabela. Ne lu tonanga ku isa malungasiku, inze lu ikambota ka za mulelo wa bupilo. Nihaike kuli bo Pat ni na, ne lu sa lumeli ku Mulimu, ne lu ikutwa kuli ku na ni ya bupile lika.’

“Hamulaho wa ku tutela kwa mutulo wa naha ya England inze lu bata-bata musebezi sina baopeli, mwanaa luna wa mushimani a pepwa. Busihu bo buñwi, mwanaa luna naa kulile mi na kala ku lapela ku Mulimu ye ne ni sa lumeli ku yena. Hasamulaho wa fo, silikani sa luna ni bo Pat sa kala ku shekesha, na nga mbututu wa luna mi na ba siya. Hape na lapela ku kupa tuso kuli mwendi ku na ni ya naa ni teeleza. Ne ni sa zibi kuli bo Pat ni bona ne ba lapezi.

“Hasamulaho wa nako, lizazi le li swana leo, Lipaki za Jehova ba babeli ne ba potezi bo Pat ni ku ba bonisa likelezo ze ñwi ze sebeza za mwa Bibele. Bo Pat ba ni lizeza luwaile ni ku ni buza haiba ne ni ka tabela ku ituta Bibele ni Lipaki za Jehova hamoho ni bona. Hasamulaho wa nako lwa ituta kuli, kuli lu tabise Mulimu ne lu swanela ku nyalana ka mulao. Ku eza cwalo ne ku bonahala ku ba taata bakeñisa kuli silikani sa luna ne si shekesha.

“Ne lu bata ku ziba ze ñata ka za talelezo ya bupolofita bwa Bibele, libaka ha ku na ni manyando, ni se u talusa Mubuso wa Mulimu. Hanyinyani-hanyinyani, lwa fita fa ku lemuha kuli Mulimu wa lu tokomela, mi ne lu bata ku eza za bulela. Lwa nyalana. Butali bwa Linzwi la Mulimu bu lu tusize ku hulisa bana ba luna ba balaalu. Lu na ni buikolwiso bwa kuli Jehova naa teelelize kwa litapelo za luna.”

Mu Nyakisise Bupaki ka Ili Mina

Sina bolule-lule ba batu ba bañwi, batu ba ba bulezwi mwa taba ye, ha ba si ka pumiwa ki bulapeli bwa buhata mi ba iponezi libaka Mulimu ha tuhelezi manyando. Kana mu lemuhile kuli yo muñwi ni yo muñwi wa batu ba ba bulezwi mwa taba ye, naa tusizwe ki kutwisiso ye nepahezi ya mwa Bibele ya kuli Jehova wa utwa litapelo?

Kana mwa tabela ku nyakisisa bupaki bwa kuli Mulimu u teñi? Lipaki za Jehova ba ka tabela ku mi tusa ku ituta niti ka za Jehova ni mo mu kona ku sutelela ku “ya utwa milapelo.”—Samu 65:2.

[Litaluso za kwatasi]

[Manzwi a fa likepe 10]

“Ha ne ni fitile fa ku utwisisa mulelo wa Jehova, ne ni fitile fa ku ikutwa kuli se ni mu ziba luli, mi ne ni kona ku lapela ku yena ka ku lukuluha”

[Siswaniso se si fa likepe 9]

Tumelo sakata i tomile fa bupaki ni takazo ya ku bata ku ziba niti ka za Mulimu