Mu Sutelele Ku Mulimu

Mulimu ha Swalela, Kana wa Libalanga?

KALABO ka bukuswani ki, eni. Jehova u sepisa batu bao a shemuba kuli: “Ni ka swalela bumaswe bwa bona, mi ha ni sa na ku hupula sibi sa bona.” (Jeremia 31:34) Kona libaka Jehova ha lu sepisa kuli ha swalelanga baezalibi ba ba bakile, ha hupulangi libi za bona ni kamuta. Kono kana seo si talusa kuli Mubupi wa pupo kamukana ha koni ku hupula libi za batu ba sa swalezi kale? Manzwi a Ezekiele a fa monyehelo ye bonisa mo Mulimu a swalelelanga libi ni mwa libalelanga.—Mu bale Ezekiele 18:19-22.

Ka ku itusisa mupolofita Ezekiele sina mubuleli wa hae, Jehova naa fitisize katulo fahalimwa batu ba Juda ba ne ba sa sepahali. Sicaba kaufela sona ne si fulalezi bulapeli bwa Jehova ni ku taza naha kaufela ka mifilifili. Jehova naa polofitile ka za ku sinyiwa kwa Jerusalema, muleneñi wa Juda, ki Mababilona. Kono ni ha naa fitisa katulo ya hae, Jehova naa file lushango lwa sepo. Mutu ni mutu naa na ni ku eza keto, mi naa na ni ku ikalabela ka za likezo za hae.—Litimana 19, 20.

Ku cwañi haiba mutu naa tuhezi ku eza lika ze maswe ni ku eza lika ze nde? Jehova naa ize: “Kono ya maswe ha tuhela ze maswe za naa eza, mi a tokomela litaelo za ka, a zamaya ka milao ni ka swanelo, luli u ka pila, a si ke a shwa.” (Timana 21) Eni, Jehova naa “lata ku swalela” muezalibi ya naa tuhezi ku eza lika ze maswe ili ya naa bonisize ku baka ha buniti.—Samu 86:5.

Ku cwañi ka za libi za naa ezize muezalibi yo? Jehova naa talusize kuli: “Kwa lifoso za hae ha ku na ye ka shongotolwa ku mu lwanisa.” (Timana 22) Mu lemuhe kuli libi za mutu ya bakile ne li si ke za “shongotolwa ku mu lwanisa.” Ki kabakalañi taba ye ha i li ya butokwa?

Mwa Bibele, linzwi la Siheberu le li tolokilwe kuli ku “shongotolwa” ha li talusi feela ku hupula ze ne ezahezi kwamulaho. Buka ye ñwi ha i ama kwa linzwi leo i bulela kuli: “Mane linzwi leo hañata li talusanga kezo kamba li itusiswanga hamoho ni manzwi a talusa kezo.” Kamukwaocwalo, ku ‘shongotola’ ku kona ku talusa ku nga muhato. Niteñi, Jehova ha bulela kuli libi za muezalibi ya bakile ha li na ku “shongotolwa ku mu lwanisa,” u talusa kuli ha naa ku nga muhato wa ku lwanisa mutu yo kabakala libi zeo, ibe ka ku mu fa mulatu kamba ka ku mu fa koto. *

Manzwi a kwa liñolo la Ezekiele 18:21, 22 a tabisa kakuli a lu bonisa butuna bwa swalelo ya Jehova. Jehova ha swalela libi za luna, ha naa ku lu fa koto kwapili kabakala libi zeo. Kono u nepelanga libi za ba ba bakile kwamulaho wa hae. (Isaya 38:17) Ku swana feela inge kuli wa takulanga libi zeo.—Likezo 3:19.

Ka ku ba batu ba ba si ka petahala, lu tokwa sishemo sa Mulimu. Esi mane lu fosanga hañata-ñata. (Maroma 3:23) Kono Jehova u bata kuli lu zibe kuli haiba lu baka ha buniti, wa lata ku lu swalela. Mi ha lu swalela wa libalanga, fo kikuli ha na ku lu fa mulatu kamba ku lu fa koto kabakala libi za sa lu swalezi kale. Taba yeo ya omba-omba luli! Kana sishemo sa Mulimu ha si mi susuezi ku sutelela ku yena?

[Litaluso za kwatasi]