Puisano ni Muñaa Ndu Kana Batu ba ba Nde Kaufela ba Yanga Kwa Lihalimu?

LIPAKI ZA JEHOVA ba tabelanga ku buisana ni batu be ba pila mabapa ni bona ka za Bibele. Kana ku na ni taba ye ñwi ya mwa Bibele ye mu sa utwisisi? Kana mu bata ku ziba ze ba lumela Lipaki za Jehova? Haiba ki cwalo, mu si ke mwa zina-zina ku buza puzo ye mu na ni yona nako ye ñwi ha mu ka kopana ni yo muñwi wa Lipaki za Jehova. Paki ya Jehova yo, u ka tabela ku alaba lipuzo za mina kaufela.

Taba ye tatama ki puisano yeo yo muñwi wa Lipaki za Jehova mwendi naa kana a ba ni yona ni mutu yo muñwi. Ha lu ngeni kuli Paki wa libizo la Manyando u izo potela muuna yo muñwi wa libizo la Imakando.

Ba ba ya Kwa Lihalimu ba ka yo Ezañi Kwateñi?

Bo Manyando: Ha mu nahananga ka za kwapili, kana mu bona kuli miinelo i ka cinca ku ba hande, ku totobela, kamba i ka zwelapili sina mo i inezi ka nako ya cwale?

Bo Imakando: Ni bona kuli miinelo i ka ba hande. Ni nyolezwi ku yo pila ni Mulena kwa lihalimu.

Bo Manyando: Yeo ki sepo ye nde. Bibele i bulela ze ñata ka za mo li inezi lihalimu ni ka za tohonolo ya ku ya kwateñi. Kana mu kile mwa nahana ka za se ba ka yo eza batu ba ba ka ya kwa lihalimu?

Bo Imakando: Lu ka yo ina ni Mulimu mi lu kana lu mu lumbeka kamita.

Bo Manyando: Yeo luli ki tibelelo ye nde. Bibele ha i buleli feela ka za limbuyoti ze ba ka yo ikola batu ba ba ya kwa lihalimu kono hape i bulela ni ka za musebezi-tuna o ba ka yo peta.

Bo Imakando: Ki musebezi mañi ona wo?

Bo Manyando: Ki musebezi o talusizwe kwa liñolo la Sinulo 5:10. Timana yeo i bulela kuli: “[Jesu] u ba ezize ku ba mubuso ni baprisita ku Mulimu wa luna, mi ba ka busa sina malena fahalimwaa lifasi.” Bo Imakando, kana mu lemuhile musebezi o ba ka yo peta batu bao ba ba ka ya kwa lihalimu?

Bo Imakando: Timana i bulela kuli ba ka yo busa sina malena fahalimwaa lifasi.

Bo Manyando: Yeo ki taba ye tabisa, nji cwañi?

Ba ka yo Busa bo Mañi?

Bo Manyando: Cwale, kana ha mu lumeli kuli haiba ba ba ya kwa lihalimu ba ka yo busa sina malena, ku lukela ku ba kuli ku na ni batu ba ba ka ba babusiwa? Esi mane mubuso ha u koni bu ba teñi haiba ha ku na babusiwa.

Bo Imakando: Ni hanelela ku utwisisa sisupo sa mina.

Bo Manyando: Kamukwaocwalo, puzo ye kona ku lu tusa ku utwisisa hande taba ye ki ya kuli, ba ka yo busa bo mañi?

Bo Imakando: Ni nahana kuli mwendi lu ka yo busa batu ba ba ka ba fa lifasi ba ba si ka shwa kale ni ku ya kwa lihalimu.

 Bo Manyando: Taba yeo ne i ka utwahala kambe batu ba ba nde kaufela ba yanga kwa lihalimu ha ba shwa. Kono ku na ni nto ye ñwi hape ye lu swanela ku nahanisisa. Esi mwendi batu ba bañwi ba ba nde ha ba na ku ya kwa lihalimu?

Bo Imakando: Ha ni si ka utwa kale Bakreste ba ba na ni tumelo ye cwalo.

Bo Manyando: Ni buza puzo ye bakeñisa ze lu bala kwa liñolo la Lisamu 37:29. Kana ne mu ka itakaleza ku bala timana ye?

Bo Imakando: ENI. I bala kuli: “Ba ba na ni niti ba ka yola sanda sa naha, ni ku yaha mwateñi ku ya ku ile.”

Bo Manyando: Ni itumezi. Kana mu boni ko buñata bwa batu ba ba nde ba ka pila teñi?

Bo Imakando: Timana i bulela kuli ba ka yola sanda sa naha.

Bo Manyando: Ki niti, mi ha ba na ku pila ka nakonyana feela. Mu lemuhe kuli timana i bulela kuli: Ba ka “yaha mwateñi ku ya ku ile.”

Bo Imakando: Mwendi taba yeo i talusa feela kuli batu ba ba nde ba ka zwelapili ku ba teñi fa lifasi. Ha lu shwa ni ku ya kwa lihalimu, lu yoliwa ki batu ba bañwi ba ba nde ba ba pepiwa.

Bo Manyando: Mwendi Batu ba bañata ba kona ku talusa timana ye ka nzila ye cwalo. Kono esi mwendi timana ye i talusa nto i sili? Esi mwendi i kona ku talusa kuli batu ba ba nde ki bona ba ba ka pila fa lifasi ku ya ku ile?

Bo Imakando: Ha ni zibi kamba na utwisisa hande ze mu talusa.

Paradaisi ya fa Lifasi ya Kwapili

Bo Manyando: Ki hande, ha mu bone hape se i bulela Bibele ka za bupilo bwa fa lifasi kwapili. Ha lu baleñi liñolo la Sinulo 21:4. Ka za batu ba ba ka pila mwa lifasi ka nako yeo ya kwapili, timana ye i bulela kuli: “Mi u ka takula miyoko kaufela kwa meeto a bona, mi lifu ha li sa na ku ba teñi, nihaiba ku tahelwa ki maswabi kamba ku lila kamba ku utwa butuku. Za pili li felile.” Yeo luli ki sepo ye nde, nji cwañi?

Bo Imakando: Eni. Kono ni nahana kuli liñolo le li bulela ka za mo bu ka bela bupilo kwa lihalimu.

Bo Manyando: Ki hande, ki niti kuli ba ba ka ya kwa lihalimu ba ka yo ikola limbuyoti ze swana zeo. Kono ha mu talime fa timana yeo hape. I bulela kuli ku ka ezahalañi kwa lifu?

Bo Imakando: I bulela kuli “lifu ha li sa na ku ba teñi.”

Bo Manyando: Ki niti. Ni sepa kuli mwa lumela kuli, kuli ku bulelwe kuli nto ye ñwi ha i sa na ku ba teñi, kona kuli ne i kile ya banga teñi.

Bo Imakando: Ku cwalo luli.

Bo Manyando: Kono ha ku na ya kile a shwa kwa lihalimu, nji cwañi? Ki fa lifasi feela fo ku banga ni mafu.

Bo Imakando: Haa. Ni tokwa ku nahanisisa ka za taba yeo.

Bo Manyando: Mwa bona, bo Imakando, Bibele i luta kuli batu ba bañwi ba ba nde ba ka ya kwa lihalimu kono buñata bwa batu ba bañwi ba ka pila fa lifasi ku ya ku ile. Mi ni sepa kuli mu kile mwa ikutwela manzwi a zibahala hahulu a, a li: “Tabo ki ya ba ba ishuwa, kakuli ba ka yola saanda sa lifasi.”—Mateu 5:5.

Bo Imakando: Eni, naa ikutwelanga timana yeo ha i baliwanga kwa keleke.

Bo Manyando: Haiba ba ba ishuwa ba ka yola saanda sa lifasi, kana taba yeo ha i talusi kuli batu ba ka pila fa lifasi? Batu ba ba ka pila fa lifasi ba ka ikola limbuyoti ze talusizwe kwa liñolo le la Sinulo. Ba ka iponela lifasi la luna ha li cinca ka ku tala kakuli Mulimu u ka felisa lika ze maswe kaufela ku kopanyeleza cwalo ni lifu.

Bo Imakando: Na utwisisa ze mu talusa, kono ha ni sepi kuli timana i liñwi kamba ze peli za kona ku yemela sisupo sa mina.

Bo Manyando: Eni. Mane, ku na ni mañolo a mañata a bulela ka za mo bu ka bela bupilo fa lifasi kwapili. Mwendi na kona ku mi bonisa litimana ze ni tabela hahulu, haiba mu na ni nako.

Bo Imakando: Eni, ni na ni mizuzu i sikai.

“Ya Maswe Haa sa na ku ba Teñi”

Bo Manyando: Kwa makalelo ne lu balile timana 29 ya Lisamu 37. Ha lu kuteleñi kwa liñolo lani la lisamu. Cwale lu ka bala litimana 10 ni 11. Kana mwa kona ku bala litimana zeo?

 Bo Imakando: Eni. “Ku sa na ni nakonyana ye nyinyani, mi ya maswe haa sa na ku ba teñi; e, u ka bata sibaka sa hae, kono si se si ka ba siyo. Kono ba ba ishuwa, ba ka ikola kozo ye tuna.”

Bo Manyando: Ni itumezi. Ka ku ya ka timana 11, “ba ba ishuwa” kamba batu ba ba nde, ba ka pila kai?

Bo Imakando: I bulela kuli “ba ka luwa naha.” Nihakulicwalo, ni bona kuli timana ye i ama nako ya cwale, kakuli ku na ni batu ba ba nde ba ba pila fa lifasi kacenu.

Bo Manyando: Yeo ki niti. Nihakulicwalo, mu lemuhe kuli timana yeo hape i bulela kuli batu ba ba nde ba ka ikola “kozo ye tuna.” Mazazi a ha ku na kozo mwa lifasi, nji cwañi?

Bo Imakando: Ki niti, ha ku na kozo.

Bo Manyando: Kamukwaocwalo sepiso ye, i ka talelezwa cwañi? Mwendi ni itusise swanisezo ye: Mu nge kuli mu na ni ndu ye na ni mizuzu ye miñata. Ba bañwi ku ba ba pila mwa ndu ya mina yeo ki batu ba ba nde—ba babalela mizuzu ya bona mi ba lika ku pilisana hande ni batu be ba pila mabapa ni bona. Mu tabile bakeñisa kuli mu beile batu ba ba nde mwa ndu ya mina. Kono ba bañwi kwa batu ba ba pila mwa ndu ya mina ya ku telela yeo, ki batu ba ba maswe; ba i sinya-sinya mi ha ba pilisani hande ni batu be ba pila mabapa ni bona. Cwale, ne mu ka eza cwañi haiba batu bao ba hana ku cinca mupilelo wa bona?

Bo Imakando: Ne ni ka ba leleka mwa teñi.

Bo Manyando: Ona zeo kona za ka eza Mulimu kwa batu ba ba maswe be lu pila ni bona mazazi a. Ha mu bone timana ya 10 hape. I bulela kuli “Ya maswe haa sa na ku ba teñi.” Ka mubulelelo o muñwi, Mulimu u ka “leleka” batu ba ba kataza ba bañwi. Hamulaho wa fo, batu ba ka kona ku ikola bupilo bwa kozo fa lifasi. Na sepa muhupulo wa kuli batu ba ba nde ba ka pila ku ya ku ile fa lifasi mwendi u kona ku shutana hanyinyani ni ze se mu itutile kwamulaho.

Bo Imakando: Ki niti, na li ku ba ni utwe taba yeo kwa keleke ya luna.

Bo Manyando: Mi sina mo ne mu taluselize kwa makalelo, ku nyakisisa feela timana i liñwi kamba litimana ze peli fa taba ye ha ku si ka likana. Kaniti, lu tokwa ku nyakisisa seo Bibele mutumbi i si bulela ka za mo batu ba ba nde ba ka pilela kwapili. Kono ka ku ya ka mañolo e lu balile kacenu, kana mu nahana kuli kwa konahala kuli batu ba bañwi ba ba nde ba ye kwa lihalimu, mi ba ba nde ba bañwi ba bañata ba pile ku ya ku ile fa lifasi?

Bo Imakando: Ha ni sepi hande. Kono ka ku ya ka mañolo a se lu balile, ni bona kuli ki cwalo luli. Ni ka tokwa ku nahanisisa hahulu ka za teñi.

Bo Manyando: Ha mu nze mu nyakisisa taba ye ka butungi, ku kana kwa zuha lipuzo ze ñwi hape. Ka mutala, ku cwañi ka za batu ba ba nde ba ne ba pilile pili ku luna? Kana kaufela bona ba ile kwa lihalimu? Haiba ha ba si ka ya kwa lihalimu, ba kai?

Bo Imakando: Zeo ki lipuzo ze nde.

Bo Manyando: Mwendi ni mi eze cwana. Sapili, ni ka mi ñolela mañolo a sikai a bulela ka za taba ye lu nyakisisize. * Sa bubeli, ne ni ka tabela ku yo kuta ni ku to ikambota ni mina ka za mañolo a, ha se mu a balile ni ku nahanisisa za bulela. Kana ku lukile?

Bo Imakando: Eni, ku lukile. Ni itumezi.

[Litaluso za kwatasi]