BIBELE YA CINCANGA BUPILO BWA BATU

“Cwale ni fumani tukuluho ya niti”

Taba ye kandekilwe ki bo Brian Hewitt

SILIMO SE NE BA PEPILWE: 1981

NAHA KO NE BA PEPEZWI: UNITED STATES

LITABA ZE EZAHEZI: MWANA WA LINGULUNDE

BUPILO BWA KA BWA KWAMULAHO: Ne ni pepezwi mwa Moundsville, tolopo ye kuzize ye fumaneha kwatuko a nuka ya Ohio kwa mutulo wa West Virginia. Ne li na mwana wa bubeli kwa bana ba bane ba mwa lubasi lwa luna, kabakala kuli luna bashimani ne lu li ba balaalu, kamukwaocwalo, bupilo fa lapa la luna ne bu tabisa ka nako kaufela. Bashemi ba ka ne li ba miswalo, ne ba sepahala mi ne ba lata batu. Ne lu si bafumi, kono kamita ne lu banga ni lika ze ne lu tokwa mwa bupilo. Ka ku ba Lipaki za Jehova, bashemi ba ka ne ba ezize ka mo ne ba konela kaufela ku lu luta likuka za Bibele ha ne lu sa li banana.

Kono ha ne ni to fitanga mwa lilimo za ku nonoboka, pilu ya ka ne se i zwile kale kwa lika ze ne ni lutilwe. Ne ni kalile ku kakanya ka za haiba ku pila ka likuka za Bibele kwa kona ku tusa mutu kamba ku mu tahiseza tabo. Ne ni ikutwile kuli, kuli mutu a be ni tabo luli mwa bupilo u tokwa ku ba ni tukuluho ya ku ikezeza lika kaufela za lata ku eza. Mi ku zwa fo, se ni tuhela ku yanga kwa mikopano ya Sikreste. Muhulwanaa ka ni kaizelaa ka ni bona ba ipangula. Bashemi ba luna ne ba ezize mo ne ba konela kaufela ku lika ku lu tusa, kono ne lu si ka ba utwa.

Ne ni sa zibi kuli tukuluho ye ne ni lakaza ku ba ni yona ne i ka ni tahiseza butanga bo butuna. Zazi le liñwi ha ne ni zwa kwa sikolo ku ya kwa ndu, mulikanaa ka yo muñwi ha ni tambeka musanga wa kwai. Na u amuhela. Ku zwa ona zazi leo, na kalisa ku ezanga likezo ze ñwi ze ñata ze maswe. Ne ku si ka fita nako ye telele ku zwa fo, se ni kala ku itusisa maswe milyani ye kola, ku nwa hahulu bucwala ni ku pila ka muzamao o maswe. Lilimo ze ñatanyana hamulaho wa fo, na kalisa hanyinyani-hanyinyani ku itusisanga milyani ye kola hahulu ili milyani ye holofaza mi na fetuha ku ba mutanga ku yona. Na kala ku lekisa milyani ye kola kuli ni zwisezepili mukwa wa ka wa ku itusisa milyani yeo, kakuli ne se ni komilwe hahulu ki yona.

Niha ne ni likile ka taata ku icanganisa, lizwalo la ka kamita ne li ni hupulisanga kuli bupilo bo ne ni pila nee li bo bumaswe. Nihakulicwalo, ne ni ikutwile kuli ne se ku li taata ku cinca bupilo bwa ka. Ku si na taba ni kuli ne ni banga mwahalaa batu ba bañata kwa mikiti kamba kwa libaka ze ba opelelanga batu lipina, hañata ne ni ikutwanga bulutu ni ku zwafa. Ka linako ze ñwi, ha ne ni hupulanga kuli bashemi ba ka ki batu ba ba nde, ne ni komokanga libaka ha ne ni keluhile ka nzila ye cwalo.

 BIBELE MO NE I CINCELIZE BUPILO BWA KA: Nihaike kuli ne se ni felezwi ki sepo ya kuli bupilo bwa ka bwa kona ku cinca ku ba bo bunde, ku ba bañwi sepo yeo ne i si ka fela. Ka silimo sa 2000, bashemi ba ka ne ba ni memile kuli ni yo fumaneha kwa mukopano wa sikiliti wa Lipaki za Jehova. Ne ni ile kwateñi ni sa tabeli. Ne ni komokile ha ni yo fumana kuli muhulwanaa ka ni munyanaa ka ba ne ba ipanguzi sina na, ni bona ne ba tile kwa mukopano wo.

Ha ne ni li cwalo kwa mukopano, na to hupula kuli silimo pili mukopano wo u si ka ba teñi, ne ni tile kwa sibaka se si swana seo ku to buha batu ba ba opela lipina. Shutano ye ne ni boni ka nako ya mukopano ni ka nako ya lipina, ne i ni fitile hahulu kwa pilu. Ka nako ye ne ku opelwa lipina, mwa sibaka seo ne ku tezi manyalala mi kai ni kai ne ku tushana feela musi wa kwai. Batu ba bañata ba ne ba tile ku to buha baopeli, ne li batu ba ba situhu, lipina ze ne opelwa kwateñi ne li ze zwafisa. Kono ka nako ya mukopano, ne ni inzi mwahalaa batu ba ne ba tabile luli—ba ne ba ni amuhezi ka tabo nihaike kuli ne se ni ba boni ka lilimo ze ñata. Mwa sibaka mo ne ku ezezwa mukopano ne ku kenile, mi ze ne bulelwa fa mukopano nee li litaba ze tahisa sepo. Ha ne ni boni lika ze nde ze tahiswa ki niti ya mwa Bibele, na ikutwa bumaswe kuli ne ni hanile niti yeo.—Isaya 48:17, 18.

Hasamulaho feela wa mukopano wo, na ikatulela ku kutela mwa puteho ya Sikreste. Muhulwanaa ka ni munyanaa ka, bakeñisa litaba ze ne ba utwile fa mukopano wo, ni bona ba ikatulela ku kutela mwa puteho. Kaufelaa luna ba balaalu lwa kala ku ituta Bibele.

Liñolo la mwa Bibele le ne li ni susuelize hahulu ki la Jakobo 4:8 le li li: “Mu sutelele ku Mulimu, mi u ka sutelela ku mina.” Se ni lemuha kuli haiba ni bata ku sutelela ku Mulimu, ni tokwa ku cinca bupilo bwa ka. Ze ñwi za licinceho ze ne ni tokwa ku eza, ki ku tuhela ku zuba kwai ni ku itusisa maswe milyani ye kola hamohocwalo ni ku nwa hahulu bucwala.—2 Makorinte 7:1.

Ne ni tuhezi ku eza siango ni balikani ba ka ba kale mi se ni kalisa ku eza silikani ni batu ba ba lapela Jehova. Mukreste ya li muuna-muhulu mwa puteho ya na itutanga ni na Bibele, naa ni tusize hahulu. Naa ni lizezanga luwaile kamita ni ku ni lekula kuli a zibe mo ne ni zuhela. Ku to fita ni ka nako ye, isali yo ñwi wa balikani ba ka ba batuna.

Kwa makalelo a maliha mwa silimo sa 2001, na bonisa buineelo bwa ka ku Mulimu ka ku kolobezwa mwa mezi, muhulwanaa ka ni munyanaa ka ni bona ba kolobezwa. Mu nahane feela tabo ye ne ba bile ni yona bashemi ba ka hamohocwalo ni munyanaa ka ya naa sepahala, lubasi lwa luna ha ne lu swalisani ku lapela hamoho Jehova.

MO NI TUSELIZWE: Ne ni ikutwanga kuli likuka za Bibele ha lifi mutu tukuluho, kono cwale ni li inga kuli ki silelezo ya butokwa hahulu. Bibele ne i ni tusize ku tuhela ku itusisa ni ku lekisa milyani ye kola mi ne i ni tusize ku ba mutu yo munde mwa silalanda.

Ni bile ni tohonolo ya ku swalisana ni mizwale mwa lifasi kaufela ku lapela Jehova. Batu ba, ba latana luli mwahalaa bona mi ba swalisana mwa ku sebeleza Mulimu. (Joani 13:34, 35) Bakeñisa ku swalisana ni mizwale ba mwa lifasi kaufela, ni fumani mbuyoti ye ipitezi—mbuyoti yeo ki musalaa ka Adrianne, ye ni lata hahulu ni ku itebuha. Kwa lu tabisa ku sebeleza Mubupi wa luna hamoho.

Ku fita ku ndongwama ku pila bupilo bwa buitati, ni itatezi ku ba sikombwa sa ka nako kaufela, ku lutanga batu kuli ni bona ba tusiwe ki Linzwi la Mulimu. Musebezi wo, u ni tahiselize tabo ye tuna hahulu mwa bupilo bwa ka. Na kona ku bulela ka buikolwiso bo butuna kuli, Bibele i cincize bupilo bwa ka. Cwale ni fumani tukuluho ya niti.

[Manzwi a fa likepe 11]

“Bibele ne i ni tusize ku tuhela ku itusisa ni ku lekisa milyani ye kola mi ne i ni tusize ku ba mutu yo munde mwa silalanda.”