TOHO YA TABA: KANA MWA SWANELA KU SABA KU FELA KWA LIFASI?

Ku Fela Kwa Lifasi Kwa Sabisa, Kwa Tabisa, Kamba Ku Zwafisa

Mu ikutwa cwañi ka za lizazi la December 21, 2012, le li ñozwi mwa kalenda ya Maya ili lizazi leo batu ba bañata ba bulela kuli li ka tahisa cinceho mwa lifasi kaufela? Ku likana ni lika ze ne mu libelezi ku ezahala, mwendi ne mu ikutwile ku imuluha, ku swaba, kamba ne mu felezwi ki sepo. Kana nee li feela bo buñwi bwa bupolofita bwa ku fela kwa lifasi bo ne bu si ka nepahala?

Ku cwañi ka za “ku fela kwa lifasi” ko ku bulezwi mwa Bibele? (Mateu 24:3, Bibele ye Kenile, Hatiso ya 1951) Batu ba bañwi ba ikalelwa kuli lifasi li ka cisiwa ka mililo. Ba bañwi ba nyolelwa ku bona ze ka ezahala lifasi a li ka fela. Batu ba bañata ha ba sa tabela ku talusezwa kuli mafelelezo a lifasi a sutelezi. Kono kana batu ba na ni maikuto ao kabakala taba ya niti kamba ya ku ikupulela feela?

Mu kana mwa komokiswa hahulu ki ze i bulela Bibele luli ka za ku fela kwa lifasi. Bibele ha i bonisi feela libaka ha lu swanela ku libelela mafelelezo a lifasi, kono hape i talusa kuli ba bañwi ba ka ikutwa kuli mafelelezo a liyeha ku taha mi ba ka zwafa. Lu mi mema kuli mu nyakisise likalabo za Bibele kwa lipuzo ze ba buzanga hahulu batu ka za ku fela kwa lifasi.

 Kana lifasi li ka cisiwa ka mulilo?

BIBELE I ALABA KULI: “[Mulimu] u tomile ni ku tiisa lifasi fa mitomo ya lona, mi ha li na ku nyanganyiswa ni kamuta.”—SAMU 104:5, Bibele ye Kenile, Hatiso ya 1984.

Lifasi ha li na ku sinyiwa ka mulilo kamba ka nto ifi kamba ifi. Kono Bibele i luta kuli lifasi le, ki lihae la batu fo ba ka pila ku ya ile. Samu 37:29 i bulela kuli: “Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 115:16; Isaya 45:18.

Mulimu ha saa felize ku bupa lifasi naa bulezi kuli “li lukile hahulu,” mi u sa ikutwa cwalo. (Genese 1:31) Mulimu haa leli ku sinya lifasi, kono mane u sepisa kuli u ka “yundisa ba ba sinya lifasi,” ni ku sileleza lifasi kuli li si ke la sinyiwa ni kamuta.—Sinulo 11:18.

Mwendi mu nahana kuli liñolo la 2 Pitrosi 3:7 li bonisa kuli lifasi li ka cisiwa ka mulilo. Bibele kwa liñolo leo i bulela kuli: “Mahalimu ni lifasi ze li teñi cwale li bulukezwi mulilo.” Kana taba yeo ha i bonisi kuli lifasi li ka cisiwa ka mulilo? Mane fokuñwi Bibele itusisanga manzwi a cwale ka “mahalimu,” “lifasi,” ni “mulilo” ka swanisezo, ili ku yemela lika ze ñwi. Ka mutala, liñolo la Genese 11:1 li bulela kuli: “Lifasi kaufela ne li na ni puo i li ñwi,” liñolo le, li itusisa linzwi la “lifasi” ku talusa batu ba ba pila fa lifasi.

Taba ye bulezwi kwa liñolo la 2 Pitrosi kauhanyo 3 i bonisa kuli mahalimu, lifasi, ni mulilo, ze bulezwi mwa timana 7 ni zona li swaniseza lika ze ñwi. Litimana 5 ni 6 li bonisa ze ne ezahezi ka nako ya Muunda wa mwa miteñi ya Nuwe. Ka nako yeo, lifasi la kwaikale ne li sinyizwe, kono lifasi la luna ne li si ka yunda. Kono “lifasi” le i bulela Bibele le ne li sinyizwe, li yemela batu kaufela ba ba maswe ni batu ba mifilifili ba ne ba pila ka nako yani. Mi “mahalimu” a naa sinyizwe, naa yemela batu ba ne ba busa lifasi ka nako yani. (Genese 6:11) Ka nzila ye swana, liñolo la 2 Pitrosi 3:7 li polofita kuli batu ba ba maswe ni lipuso za bona za buputeleli ba ka sinyiwa ku ya ku ile, inge ba ba ka cisiwa ka mulilo.

Ki lika mañi ze ka ezahala lifasi a li ka fela?

BIBELE I ALABA KULI: “Lifasi la fela ni takazo ya lona, kono yena ya eza tato ya Mulimu u ina ku ya ku ile.”—1 JOANI 2:17.

“Lifasi” le li ka fela haki lifasi mubu, kono ki batu kaufela mwa lifasi ba ba sa pili ka ku lumelelana ni tato ya Mulimu. Sina feela mualafi ya pazulanga batu ha kona ku zwisa sikoto sa kansa ku mutu ya kula ilikuli a pilise bupilo bwa mutu yo, Mulimu u ka  ‘yundisa’ batu ba ba maswe ilikuli batu ba bande ba ikole bupilo bo bunde fa lifasi. (Samu 37:9) Ka lona libaka leo, “ku fela kwa lifasi” ki nto ye nde.

Mubonelo o lukile wo wa “ku fela kwa lifasi,” u talusizwe hande ki toloko ya Bibele ye itusisa pulelo ye ya “maungulelo a muinelo wa lifasi.” (Mateu 24:3) Bakeñisa kuli lifasi mubu ni batu ba bande ba ka punyuha lifasi le ha li ka fela, kwa iponahalela hande kuli ku ka ba ni muinelo wa lifasi o munca. Kakuli Bibele i bulela ka za “linako ze taha.”—Luka 18:30.

Jesu naa bulezi ka za nako ya kwapili yeo kuli ki “nako ye li ka bupwa sinca lika.” Ka nako yeo, u ka tahisa kuli batu ba pile bupilo bwa naa ba lelezi Mulimu kwa makalelo. (Mateu 19:28) Ka nako yeo, lu ka ikola

▪ Ku pila mwa paradaisi ya lifasi, mi batu kaufela ba ka ba mwa buiketo mi ba ka atelwa ki lika.—Isaya 35:1; Mika 4:4.

▪ Ku eza misebezi ye minde ili ye tabisa.—Isaya 65:21-23.

▪ Ku bona matuku kaufela ha feliswa.—Isaya 33:24.

▪ Ku bona batu ha ba kutela kwa bunca.—Jobo 33:25.

▪ Ku bona bafu ha ba zusiwa.—Joani 5:28, 29.

Haiba lu eza “tato ya Mulimu,” zona lika za lu tokwa kuli lu eze, ha lu na ku saba ku fela kwa lifasi. Kono lu ka nyolelwa ku bona ku fela kwa lifasi.

Kana ku fela kwa lifasi ku fakaufi luli?

BIBELE I ALABA KULI: “Ha mu bona lika zeo li ezahala, mu zibe kuli Mubuso wa Mulimu u fakaufi.”—LUKA 21:31.

Mwa buka ya hae ye talusa za ku fela kwa lifasi (The Last Days Are Here Again), caziba Richard Kyle u ñola kuli: “Licinceho za ka sipundumukela ni mifilifili ze bile teñi li tahisa kuli batu ba kalise ku nuha lika ze ka ezahala lifasi ha li ka fela.” Ku banga cwalo sihulu haiba ku sa zibahali ze tahisa mifilifili ni licinceho zeo.

Kono bapolofita ba ne ba ñozi za ku fela kwa lifasi ne ba sa liki ku talusa libaka lika ze maswe ha ne li ezahala ka nako ye ne ba pila ku yona. Kono ne ba ñozi litaba zeo ka susumezo ya moya wa Mulimu kuli ba taluse miinelo ye ne ka bonisa kuli ku fela kwa lifasi ne se ku li fakaufi. Ha mu nyakisise bo buñwi bwa bupolofita bo, mi mu atule ili mina ka za haiba bu sweli bwa talelezwa mwa linako za luna.

 ▪ Lindwa, lukupwe, lizikinyeho, ni matuku a yambukela ili a bulaya.—Mateu 24:7; Luka 21:11.

▪ Ku ekezeha hahulu kwa bukebenga.—Mateu 24:12.

▪ Ku sinyiwa kwa lifasi ki batu.—Sinulo 11:18.

▪ Batu ba baitati, ba ba lata masheleñi, ni ba ba lata minyaka ku fita Mulimu.—2 Timotea 3:2, 4.

▪ Ku sa swalisana kwa mabasi.—2 Timotea 3:2, 3.

▪ Batu ba bañata ha ba isi pilu kwa lisupo ze bonisa kuli lifasi li tuha li fela.—Mateu 24:37-39.

▪ Ku kutazwa kwa taba ye nde ya Mubuso wa Mulimu mwa lifasi kaufela.—Mateu 24:14.

Sina mwa naa bulelezi Jesu, ha lu nze lu bona “lika zeo kaufela,” haike lu zibe kuli ku fela kwa lifasi se ku li fakaufi. (Mateu 24:33) Lipaki za Jehova ba lumela kuli bupaki bo bu li teñi ki bwa niti, mi ba taluseza ba bañwi za tumelo ya bona ka ku kutaza mwa linaha ze 236.

Kana mafosisa a bile teñi ka za ku fela kwa lifasi a bonisa kuli mafelelezo haa na ku taha?

BIBELE I ALABA KULI: “Fona fo ba ka bulelela kaufela kuli: ‘Kozo ni buiketo!’ ki fona fo ba ka tulukelwa ki sinyeho ya ka sipundumukela sina butuku bwa lupepo mo bu telanga ku musali ya itwezi; mi ha ba na ku banduka ni hanyinyani.”—1 MATESALONIKA 5:3.

Bibele i swaniseza sinyeho ya lifasi kwa butuku bwa utwanga musali ya itwezi ha tuha a puluha—butuku bo, ha ku koni ku picukiwa mi ki bwa ka sipundumukela. Nako ye libisa kwa maungulo ni yona i swana sina mulwalo, musali ya itwezi wa zibanga lisupo ze libisa kwa ku puluha. Mualafi wa kona ku akaleza lizazi la ka puluha musali yo, kono niha sa puluhi ka lona lizazi leo, musali yo u ka zwelepili ku ba ni sepo ya kuli mbututu ya hae i ka tuha i pepwa. Kamukwaoswana, nihaike kuli lifasi ha li si ka fela ka nako ye ne ba libelela batu, seo ha si koni ku cinca buniti bwa kuli lu pila mwa “mazazi a maungulelo.”—2 Timotea 3:1

‘Haiba lisupo za kuli lifasi li tuha li fela za iponahalela hande,’ mwa kona ku ipuza kuli, ‘ki kabakalañi batu ba bañata ha ba palelwa ku lemuha lisupo zeo?’ Bibele i bonisa kuli mwa nako ya ku fela kwa lifasi, batu ba bañata ha ba na ku isa pilu kwa lisupo ze bonisa cwalo. Mwa sibaka sa ku lumela kuli ku na ni licinceho ze tuna ze sweli ku ezahala mwa lifasi, ze bonisa kuli lu pila mwa linako za  maungulelo, bona ba ka sheununa ka ku bulela kuli: “Ku zwa fo ba itobalela bo kukwaa luna ka lifu, lika kaufela li itulezi feela honacwalo sina mo ne li inezi kwa makalelo ha li eziwa.” (2 Pitrosi 3:3, 4) Ka mubulelelo o muñwi, lisupo za kuli lu pila mwa mazazi a maungulelo za iponahalela hande, kono batu ba bañata ha ba isi pilu kwa lisupo zeo.—Mateu 24:38, 39.

Mwa taba ye, ku nyakisisizwe feela lisupo li sikai za mwa Mañolo ze bonisa kuli lifasi li tuha li fela. * Kana ne mu ka tabela ku ituta ze ñata? Haiba mwa tabela, mwa kona ku ambola ni Lipaki za Jehova kuli mu itute Bibele ni bona ku si na tifo. Mwa kona ku itutelanga kwa ndu ya mina, kamba kwa sibaka se siñwi se mu ka keta, kamba mane nihaiba ka ku itusisa luwaile. Mu tokwa feela ku itombola nako ya mina, mi mu ka fumana lituso ze ñata ka ku eza cwalo.

[Litaluso za kwatasi]

[Mbokisi fa likepe 8]

KANA LIPAKI ZA JEHOVA SE BA KILE BA BULELA MAZAZI A KU FELA KWA LIFASI A NAA SI KA NEPAHALA?

Lipaki za Jehova ne ba libelelanga kuli lifasi ne li ka fela ka linako ze ñwi, kono ne ku si ka ba cwalo. Sina balutiwa ba Jesu ba kwa makalelo, ni luna ka linako ze ñwi lu kile lwa lumela kuli bupolofita bo buñwi bwa Bibele ne bu ka talelezwa ka nako ye ñwi, kono nako ya Mulimu ya ku bu taleleza inge i si ka fita kale. (Luka 19:11; Likezo 1:6; 2 Matesalonika 2:1, 2) Lwa lumelelana ni manzwi a A. H. Macmillan, Paki ya naa sebelize Mulimu ka nako ye telele, ya naa bulezi kuli: “Ni itutile kuli lu swanela ku itumelela mafosisa a luna ni ku zwelapili ku ituta Linzwi la Mulimu kuli lu kone ku li utwisisa hande.”

Kono ki kabakalañi ha lu zwelapili ku kutaza kuli mafelelezo a fakaufi? Kakuli lwa ziba kuli ki butokwa ku mamela manzwi a Jesu a li: “Mu zwelepili ku libelela, mu zwelepili ku tona.” Haiba lu tuhela ku kutaza ka za mafelelezo, Jesu u ka lu bona kuli lu “lobezi,” mi ha na ku tabiswa ki kezo yeo. (Mareka 13:33, 36) Ki kabakalañi?

Ha mu nyakisise mutala wo: Mulibeleli ya inzi fa sibaka se si lumbile wa kona ku bona nto ye eza inge musi o tushana kwahule fahalimu a likota ni ku nahana kuli mwendi ki mulilo mi wa kona ku fa temuso ye fosahezi. Kono ka nako ye ñwi ku libelela kwa hae kwa kona ku pilisa batu.

Kamukwaoswana, ni luna ka mafosisa ku na ni linako ze ñwi fo ne lu kile lwa nahana kuli lifasi la fela. Kono lu iyakatwa hahulu za ku mamela taelo ya Jesu ni ku tusa batu kuli ba piliswe ku fita ku saba ku nyaziwa. Taelo ya Jesu ya “ku paka ka ku tala” i lu susueza ku lemusa ba bañwi ka za ku fela kwa lifasi.—Likezo 10:42.

Lu lumela kuli sa butokwa hahulu haki ku ziba fo a ka tela mafelelezo a lifasi, kono lu lukela ku ba ni sepo ya kuli mafelelezo a ka taha, mi likezo za luna li lukela ku bonisa cwalo. Lu isa hahulu pilu kwa manzwi a ñozwi kwa Habakuki 2:3, a bulela kuli: “Mafelelezo ni ha ka liyeha [ili ku shutana ni mo mu nahanela], mu a talimele, kakuli a ka bonahala; mi haa na ku liyeha.”