Mushe Muuna Ya Naa Na Ni Buikokobezo

BUIKOKOBEZO KIÑI? Buikokobezo bu ama ku sa ba ni muipo kamba buikuhumuso. Mutu ya ikokobeza haa i ku ngi ku ba wa butokwa ku fita ba bañwi. Mutu ya si ka petahala kaufela, ya ikokobeza, hape u swanela ku ba ni buitikaneleli, fo ku talusa kuli, u swanela ku lemuha mifokolo ya hae.

MUSHE NAA BONISIZE CWAÑI KULI NAA NA NI BUIKOKOBEZO? Mushe naa si ka ikuhumusa ha naa filwe maata a ku etelela ba bañwi. Hañata mutu ha fiwanga maata a ku etelela, u fitanga fa ku bonisa ka bunolo haiba u na ni buikokobezo kamba kutokwa. Muñoli yo muñwi wa mwa lilimo za ma 1800 ya bizwa Robert G. Ingersoll u talusa taba yeo cwana, u li: “Batu ba bañata ba kona ku itiisa ha ba kopana ni manyando. Kono haiba u bata ku ziba hande mwa inezi mutu yo muñwi, u mu fe maata a ku etelela ba bañwi.” Kono Mushe yena, naa bonisize hahulu buikokobezo ha naa filwe maata a ku etelela ba bañwi. Kamukwaufi?

Mushe naa filwe maata a matuna, kakuli Jehova naa mu file musebezi wa ku etelela sicaba sa Isilaele. Kono Mushe naa si ka ikuhumusa kabakala ku fiwa maata ao. Ka mutala, ha mu nyakisise mwa naa talimezi taba ye taata ya ba ne ba swanela ku yola sanda. (Numere 27:1-11) Taba yeo ne li ye tuna, kakuli katulo ye ne ka ezwa ka nako yeo ne i si ke ya ama feela basali bao kono hape ne i ka ama ni litaba ze ne ka ba teñi mwa masika a naa ka taha kwapili.

Mushe naa ezize cwañi? Kana naa ikutwile kuli kabakala kuli ne li yena mueteleli wa Isilaele, naa ziba hande katulo ye swanela mwa taba yeo? Kana naa ka itinga fa buikoneli bwa hae, yeloseli ya naa bile ni yona halaa lilimo, kamba zibo ya hae ya ka mwa ngela lika Jehova?

Mwendi mutu ya ikuhumusa naa ka eza cwalo. Kono Mushe yena naa si ka eza cwalo. Bibele i lu taluseza kuli: “Mushe a tisa taba ya bona fapilaa Muñaa Bupilo.” (Numere 27:5) Mu nahane feela taba yeo! Nihaiba hamulaho wa ku etelela sicaba sa Isilaele ka lilimo ze 40, Mushe naa si ka itinga fa butali bwa hae, kono naa itingile ku Jehova. Taba ye, i bonisa hande kuli Mushe naa na ni buikokobezo bo butuna.

Mushe naa si ka ikutwa kuli ki yena feela ya naa swanela ku ba ni maata a ku etelela ba bañwi. Naa tabile Jehova ha naa ketile Maisilaele ba bañwi kuli ba be bapolofita. (Numere 11:24-29) Mukwenyanaa hae ha naa akalelize kuli Mushe a kete batu ba bañwi kuli ba mu tuse mwa musebezi, Mushe ka buikokobezo a eza hona cwalo. (Exoda 18:13-24) Mi kwa mafelelezo a bupilo bwa hae, nihaike kuli naa sa na buikangulo bo bunde, Mushe a kupa Jehova kuli a kete mutu ya naa ka mu yola. Jehova ha naa ketile Joshua kuli a yole Mushe, Mushe naa tusize hahulu mutangana yo, mi a susueza ni batu kuli ba latelele ketelelo ya Joshua ha naa nze a ba libisa mwa Naha ya Sepiso (Numere 27:15-18; Deuteronoma 31:3-6; 34:7). Ki niti kuli Mushe naa nga kuli ne li tohonolo ye tuna ku etelela Maisilaele mwa ku lapela Mulimu. Kono naa si ka iyakatwa hahulu ka za maata a naa na ni ona ku fita buiketo bwa ba bañwi.

LU ITUTAÑI KU MUSHE? Ha lu lati ku ba ni buikuhumuso kabakala maata e lu filwe kamba kabakala buikoneli bo lu na ni bona. Lu swanela ku hupula kuli: Kuli lu kone ku peta hande musebezi wa lu file Jehova, buikokobezo ki bwa butokwa ku fita buikoneli bo lu kana lwa ba ni bona. (1 Samuele 15:17) Haiba lwa ikokobeza luli, lu ka lika ka taata ku sebelisa kelezo ye nde ya Bibele ye li: “U sepe Muñaa Bupilo ka pilu ya hao kaufela, mi u si ke wa tiyela fa butali bwa hao.”—Liproverbia 3:5, 6.

Mutala wa Mushe hape u lu luta kuli ha lu swaneli ku nga mayemo a luna kamba maata e lu filwe ka nzila ye tulile tikanyo.

Kana lwa kona ku tusiwa ka ku likanyisa mutala wa Mushe wa buikokobezo? Eni! Haiba lu bonisa buikokobezo luli, batu be lu pila ni bona ba ka ikutwa ku lukuluha, mi ba ka lu lata. Mi sa butokwa ni ku fita kikuli lu ka latiwa ki Jehova Mulimu, yena ya bonisanga buikokobezo ka ku kuteka batu ba hae. (Samu 18:35) Bibele i li: “Mulimu u hanyeza ba ba ikankabeka, kono u fa sishemo sa hae ku ba ba ikokobeza.” (1 Pitrosi 5:5) Leo ki libaka le linde luli ha lu swanela ku likanyisa buikokobezo bwa naa bonisize Mushe!