Mushe Muuna Ya Naa Na Ni Lilato

LILATO KIÑI? Lilato li ama ku lata hahulu ba bañwi. Mutu ya lata ba bañwi, u ba bonisanga lilato ka manzwi ni ka likezo za hae, ni ha ka tokwa ku itombola kuli a eze cwalo.

MUSHE NAA BONISIZE CWAÑI KULI NAA NA NI LILATO? Mushe naa bonisize kuli naa lata Mulimu. Ka nzila ifi? Mu hupule manzwi a ñozwi kwa liñolo la 1 Joani 5:3 a li: “Se ki sona se si taluswa ki ku lata Mulimu, kuli lu mamele milao ya hae.” Bakeñisa kuli Mushe naa lata Mulimu, naa mamezi milao ya Hae. Mushe naa mamezi milao ya Mulimu ka ku eza lika kaufela za naa laezwi ku eza, naa petile misebezi ye cwale ka musebezi o sabisa wa ku atumela Faro ya maata ni misebezi ye ne bonahala ku ba ye minyinyani inge cwalo wa ku yemiseza mulamu wa hae fa Liwate le li Fubelu. Mushe naa petile musebezi kaufela wa naa filwe ku eza ibe kuli ne li o bunolo kamba o taata. Mushe ‘naa ezize cwalo.’—Exoda 40:16.

Mushe naa bonisize lilato kwa Maisilaele ka yena. Maisilaele ne ba lemuhile kuli Jehova naa ketile Mushe ku etelela sicaba sa hae, kamukwaocwalo, ne ba tahanga ku Mushe kuli a to tatulula butata bwa bona. Bibele i li: “Sicaba sa yema fapilaa Mushe, ku kala ka nako ya kakusasa ku isa kwa manzibwana.” (Exoda 18:13-16) Mushe naa katezi hahulu luli ha naa nze a teeleza kwa Maisilaele ba ne ba mu taluseza za butata bwa bona lizazi kaufela. Mushe naa lata batu, kamukwaocwalo, naa tabela ku ba tusa.

Mushe naa sa teelezangi feela kwa sicaba, kono hape naa lapelelanga ni batu ba naa lata. Mane naa lapelezi ni batu ba ne ba mu foselize. Ka mutala, kaizelaa Mushe, Miriame, ha naa tongoka Mushe, Jehova a lenga Miriame ka mbingwa. Ku fita ku tabela kuli Miriame naa filwe koto, Mushe kapili-pili a mu kupela ku Mulimu, a lapela kuli: “Mawe Mulimu, na ku lapela, u mu folise!” (Numere 12:13) Se ne si tahisize kuli Mushe a lapele ka nzila ye cwalo, ne li lilato la hae ku ba bañwi.

LU ITUTAÑI KU MUSHE? Lwa kona ku likanyisa Mushe ka ku ba ni lilato le lituna ku Mulimu. Lilato le li cwalo la kona ku lu susueza ku mamela milao ya Mulimu “ku zwelela kwa pilu.” (Maroma 6:17) Ha lu mamela milao ya Jehova ku zwelela kwa pilu, lu tabisa pilu ya hae. (Liproverbia 27:11) Hape ku eza cwalo kwa lu tusa. Mi ku zwa fo, ha lu sebeleza Mulimu ka lilato la niti, ha lu na ku eza feela lika ze lukile kono lu ka ikola ku li eza!—Samu 100:2.

Nzila ye ñwi ye lu kona ku likanyisa Mushe ka yona ki ka ku bonisa lilato la buitomboli ku ba bañwi. Haiba balikani ba luna kamba bahabo luna ba lu atumela ni ku lu taluseza lipilaelo za bona, lilato li ka lu susueza (1) ku teeleza ku bona ka tokomelo; (2) ku lika ku utwisisa mo ba ikutwela ni; (3) ku ba bonisa kuli lwa ba isa pilu.

Sina Mushe, ni luna lwa kona ku lapelelanga batu be lu lata. Ha ba lu taluseza za butata bwa bona, lu kana lwa ikutwa ku zwafa haiba ha lu koni ku ba fa tuso ni ye kana. Mane lu kana lwa bulela ka ku zwafa kuli: “Mu ni swalele kuli hakuna tuso ye ni kona ku mi fa, konji feela ku mi lapelela.” Kono mu hupule kuli: “Tapelo ya mutu ya lukile i na ni maata a matuna.” (Jakobo 5:16 Bibele ye Kenile, Hatiso ya 1951) Litapelo za luna za kona ku tahisa kuli Jehova a tuse mutu ya mwa butata ili tuso yeo mwendi naa si ke a i fiwa kambe naa si ka lapelelwa. Kaniti hakuna nto ye nde ye lu kona ku ezeza batu be lu lata ye fita ku ba lapelela. *

Kana ha mu lumeli kuli lwa kona ku ituta ze ñata ku Mushe? Nihaike kuli ne li mutu-tu feela sina luna, Mushe naa tomile mutala o munde hahulu wa tumelo, buikokobezo, ni lilato. Ha lu likanyisa mutala wa hae, lu ka fumana lituso ze ñata mi hape lu ka kona ku tusa ni batu ba bañwi.—Maroma 15:4.

[Litaluso za kwatasi]