Jehova “ha Ketululi”
MU SUTELELE KU MULIMU
Jehova “ha Ketululi”
Kana se mu kile mwa ketululwa? Kana mu kile mwa timiwa nto ye ne mu kupile, ku hanelwa ku ezezwa nto ye ñwi, kamba ku ezwa maswe bakeñisa mubala wa litalo la mina, simuluho ya mina, kamba mayemo a mina mwa bupilo? Haiba ki cwalo, haki mina mu nosi ba ba ipumani mwa muinelo o cwalo. Kono taba ye tabisa ki ya kuli: Miinelo ye cwalo ye utwisa butuku ni ha i atile hahulu mwa lifasi, ha i fumanehi kwa lihalimu. Muapositola Pitrosi naa bulezi hande ka buikolwiso kuli, “Mulimu ha ketululi.”—Mu bale Likezo 10:34, 35.
Pitrosi naa bulezi manzwi ao inzaa li mwa ndu ya mulicaba ya bizwa Kornele ili nto ye ne sa ezahalangi. Ka ku ba Mujuda, Pitrosi naa pilile ka nako yeo Majuda ne ba nga kuli batu balicaba ne ba silafezi, kabakaleo ne ba sa lumelezwi ku swalisana ni bona ka nzila ifi kamba ifi. Kono ki kabakalañi Pitrosi ha naa li mwa ndu ya Kornele? Libaka kikuli Jehova ki yena ya naa lukisize cwalo. Pitrosi naa boni pono ye nee zwa ku Mulimu mi mwa pono yeo naa bulelezwi kuli: “Tuhela ku biza lika za kenisize Mulimu kuli li silafezi.” Pitrosi naa si ka ziba kuli Kornele ni yena naa boni pono, mi mwa pono yeo naa laezwi ki lingeloi kuli a yo biza Pitrosi. Mi Kornele naa boni pono yeo lizazi li li liñwi pili Pitrosi a si ka bona kale pono ya hae. (Likezo 10:1-15) Pitrosi ha naa lemuhile kuli pono yeo ne i zwa ku Jehova, naa si ka zina-zina ku bulela.
Pitrosi naa bulezi kuli: “Cwale na utwisisa luli kuli Mulimu ha ketululi.” (Likezo 10:34) Linzwi la Sigerike le li tolokilwe kuli ‘ketululo’ se li talusa luli kikuli “ya talima lifateho.” (Ka ku ya ka toloko ya The Kingdom Interlinear Translation of the Greek Scriptures) Caziba yo muñwi ha naa talusa za pulelo yeo, naa bulezi kuli: “I ama ku muatuli ya talima mutu kwa sifateho ni ku mu atula, isiñi ka ku ya ka niti ya taba kono ka ku ya ka taba ya kuli wa tabela mutu yo kamba ha mu tabeli.” Mulimu ha shemubangi mutu yo muñwi ni ku sa shemuba yo muñwi bakeñisa mushobo wa hae, naha kwa simuluha, mayemo a hae mwa bupilo, kamba nto ifi kamba ifi.
Kono Jehova u talima ze mwa lipilu za luna. (1 Samuele 16:7; Liproverbia 21:2) Pitrosi naa zwezipili ku bulela kuli: “Mwa sicaba ni sicaba mutu kaufela ya mu saba ni ku eza se si lukile u lumelelwa ki yena.” (Likezo 10:35) Ku saba Mulimu ku talusa ku mu kuteka, ku mu bubeka, ku mu sepa, ni ku sa eza nto ifi kamba ifi ye sa mu tabisi. Ku eza se si lukile ku ama ku itatela ku eza lika ze nde mwa meeto a Mulimu. Jehova u tabela mutu ya mu saba ili ya susuezwa ku eza ze lukile bakeñisa sabo yeo.—Deuteronoma 10:12, 13.
Haiba ne mu kile mwa ketululwa kamba ku boniswa saluluti, u zibe mu ka susuezwa hahulu ki manzwi a naa bulezi Pitrosi ka za Mulimu. Jehova u sweli ku hohela batu ba macaba kaufela kwa bulapeli bwa niti. (Joani 6:44; Likezo 17:26, 27) Wa teelezanga ni ku alaba litapelo za balapeli ba hae ku si na taba ni mubala wa litalo la bona, naha ko ba simuluha, kamba mayemo a bona mwa bupilo. (1 Malena 8:41-43) Lu na ni sepo ya kuli Jehova ha talimanga fa lifasi, u bonanga feela mufuta u li muñwi wa batu. Kana ha mu si ka susuezwa ku ituta ze ñata ka za Mulimu yo ya si na ketululo?
Litaba za mwa Bibele ze akalelizwe ku baliwa mwa June
[Manzwi a fa likepe 8]
Jehova ha talimanga fa lifasi, u bonanga feela mufuta u li muñwi wa batu
