Lu Itutañi ku Sikebenga se ne si Kokotezwi Kwatuko ni Jesu?
MU LUTE BANA BA MINA
Lu Itutañi ku Sikebenga se ne si Kokotezwi Kwatuko ni Jesu?
Sikebenga se lu bata ku ituta za sona, ki sona sa bulela ni sona Jesu mwa siswaniso se. Sikebenga seo si ikutwa bumaswe bakeñisa likezo za sona ze maswe. Sikebenga seo si kupa Jesu kuli: “U ni hupule ha u ka kena mwa Mubuso wa hao.” Cwale sina ka mo u bonela mwa siswaniso se, Jesu u sweli ku bulela ni sikebenga seo. Kana wa ziba zeo Jesu a sweli ku bulelela sikebenga seo?— * Jesu u si sepisa kuli: “Kaniti na ku bulelela kacenu, u ka ba ni na mwa Paradaisi.”
U nahana kuli Paradaisi yeo, i ka ba ye cwañi?—Kuli lu fumane kalabo ye lukile, ha lu ikambote pili ka za Paradaisi yeo Mulimu naa ezelize bashemi ba luna ba pili, bona bo Adama ni Eva. Paradaisi yeo ne i li kai? Kana ne i li kwa lihalimu kamba fa lifasi?—
U kumbile haiba u bulela kuli ne i li fa lifasi. Kamukwaocwalo, ha lu nahana za kuli sikebenga seo si ka ba “mwa Paradaisi,” lu swanela hupula kuli si ka pila fa lifasi ona fa ha li ka ba paradaisi. Paradaisi yeo i ka ba ye cwañi?—Ha lu bone mo i ka bela.
Jehova Mulimu ha sa bupile bashemi ba luna ba pili bona bo Adama ni Eva, Bibele i lu bulelela kuli naa ba beile mwa paradaisi ona fa lifasi fa. Ne i bizwa, “simu ya Edeni.” U nahana kuli “simu ya Edeni” ne li ye nde cwañi?—Kaniti luli, simu yeo ne i li sibaka se sinde hahulu ku pila teñi, mi ne i buheha hahulu kuli mane kacenu ha ku na ya kile a bona simu ye nde cwalo!
U bona cwañi? Kana Jesu u ka pila ona fa lifasi fa ni sikebenga se ne si ikutwile bumaswe bakeñisa likezo za sona ze maswe?—Batili, kakuli Jesu u ka ba Mulena kwa lihalimu mi u ka busa lifasi le li li Paradaisi. Kamukwaocwalo, Jesu u ka ba ni sikebenga yo mwa Paradaisi ya fa lifasi kakuli u ka mu zusa kwa bafu ni ku bona teñi kuli wa babalelwa hande. Kono cwale Jesu u ka lumeleza cwañi mutu ya naa li sikebenga ku pila mwa Paradaisi?—Ha lu ikambote ka za taba yeo.
Ki niti kuli sikebenga seo ne si ezize lika ze maswe hahulu. Kono ku na ni batu ba bañata ba ne ba pilile mwa lifasi ba ne ba ezize lika ze maswe. Nihakulicwalo, buñata bwa bona ne ba ezize lika ze maswe bakeñisa kuli ne ba si ka lutiwa za Jehova ni za naa tokwa ku bona.
Kamukwaocwalo, batu ba ba cwalo, ku kopanyeleza cwalo ni sikebenga sa naa ambozi ni sona Jesu ha naa li fa kota ya linyando, ba ka zusezwa kwa bupilo mwa Paradaisi ona fa lifasi fa. Ba ka lutiwa tato ya Mulimu. Kihona ba ka kona ku bonisa kuli ba lata Jehova.
Kana wa ziba mo ba kona ku boniseza kuli ba lata Jehova?—Ka ku eza za zeo Mulimu a tokwa kuli ba eze. I ka ba nto ye tabisa luli ku pila mwa Paradaisi ni ku zwelapili ku pila ni batu ba ba lata Jehova ni ku latana!
Mu bale mwa Bibele ya mina
[Litaluso za kwatasi]
^ para. 3 Haiba mu sweli ku bala ni mwanana, mutila o mu ka fumana hamulaho wa puzo ni puzo, u mi hupulisa kuli mu kutumane ni ku susueza mwanana ku alaba.
