PUISANO NI MUÑAA NDU

Kana Mulimu U na ni Taba ni Manyando A Luna?

Taba ye tatama ki mutala wa puisano ya kona ku ba ni yona Paki ya Jehova ni mutu yo muñwi. Lu nge kuli Paki ya bizwa Mebelo u i zo potela musali ya bizwa Sofia.

KI KABAKALAÑI MULIMU HA TUHELELA LIKA ZE CWANA KU EZAHALA?

Mebelo: Kacenu ni sweli ku abela trakiti ye kwa batu ba ba pila mwa silalanda se. I na ni toho ya taba ye li: Kana Mwa Tabela ku Ziba Niti? Kopi ya mina, ki ye.

Sofia: Kana i bulela za bulapeli?

Mebelo: Eni. Ha mu bone lipuzo ze 6 ze fahalimu. Kwa lipuzo zeo ki ifi—

Sofia: Mwendi mu yemele ona fo pili. Ni bona kuli mu ka sinya feela nako ya mina ku ambola ni na.

Mebelo: Ki kabakalañi ha mu bulela cwalo?

Sofia: Ku mi bulelela feela niti ha ni sepi kuli ni na ni tumelo ku Mulimu.

Mebelo: Na i itumela ku mina bakeñisa ku ni taluseza mo mu ikutwela. Mwendi ni mi buze kuli, kana se mu ikutwile cwalo ku zwelela feela kwa bwanana bwa mina?

Sofia: Batili, ku zwa kwa bwanana bwa ka ne ni yanga kwa keleke. Kono ni tuhezi kale ku yanga kwateñi.

Mebelo: Na utwisisa. Mu ni swalele, ne ni libezi ku mi taluseza libizo la ka. Ki na Mebelo.

Sofia: Na ki na Sofia.

Mebelo: Ni tabile hahulu ku zibana ni mina bo Sofia.

Sofia: Ni na ni tabile ku zibana ni mina.

Mebelo: Mu ni swalele bo Sofia, mulelo wa ka haki wa ku mi hapeleza ku lumela mwa lika ze ni lumela ku zona. Nihakulicwalo, ne ni ka tabela ku ziba taba ye ñwi. Kana ku na ni nto ye ñwi ye ne tahisize kuli mu kakanye haiba Mulimu u teñi?

Sofia: Eni. Lilimo ze 17 kwamulaho, bo ma ne ba bile mwa kozi ya fa mukwakwa.

Mebelo: Ni swabile hahulu ku utwa taba yeo. Kana ne ba holofezi?

Sofia: Eni, kakuli mane ku zwelela feela fa kozi yeo bo ma ba bile liyanga.

Mebelo: Ne ku fosahalile hahulu bati. Na sepa, taba yeo ya mi utwisanga butuku kwa pilu.

Sofia: Eni ya ni utwisanga butuku kwa pilu. Ki lona libaka ha ni kakanyanga haiba Mulimu u teñi, kakuli haiba u teñi, ki kabakalañi he ha tuhelela lika ze cwana ku ezahala? Ki kabakalañi Mulimu ha lu tuhelela inze lu nyanda cwana?

KANA KU FOSAHALILE KU BUZA LIBAKA MULIMU HA TUHELELA MANYANDO KU BA TEÑI?

Mebelo: Naa utwisisa mo mu ikutwela, mi ha ku si ka fosahala ku buza lipuzo ze cwalo. Ku lukile ku buza libaka lika ze maswe ha li ezahala sihulu ha lu li mwa manyando. Mane nihaiba baana ni basali ba bañwi ba ba sepahala ba ba bulezwi mwa Bibele, ne ba buzanga lipuzo ze cwalo!

Sofia: Mu bulela niti?

Mebelo: Eni. Kana ne mu ka tabela kuli ni mi bonise mutala u li muñwi mwa Bibele?

Sofia: Eni naa tabela.

Mebelo: Ha mu bone lipuzo naa buzize mupolofita ya sepahala Habakuki ku Mulimu, ze ñozwi kwa liñolo la Habakuki kauhanyo 1, timana ya 2 ni 3: “Mawe Muñaa Bupilo, ni ka biza ku Wena hakai u sa ni utwi? Ni itilelela ku Wena kabakala bumaswe, ibo ha u lamuleli! U ni bonisezañi ze maswe, mi u ni talimisezañi za ku nyandisa?” Kana lipuzo zeo za swana ni lipuzo ze mu ipuzanga?

Sofia: Eni za swana.

Mebelo: Mulimu naa si ka halifela Habakuki bakeñisa ku mu buza lipuzo ze cwalo, kamba ku mu bulelela kuli naa tokwa feela ku ba ni tumelo ye tiile.

Sofia: Bati.

JEHOVA U TOILE MANYANDO

Mebelo: Bibele i luta kuli Mulimu wa bonanga mo lu nyandela ni kuli wa lu tokomela.

 Sofia: Mu talusañi?

Mebelo: Kashe ni mi bonise mutala o kwa liñolo la Exoda 3:7. Kana mwa kona ku bala timana yeo?

Sofia: Eni. I bulela kuli: “Muñaa Bupilo a li: Ni boni, ni bonelezi ku swenyeha kwa sicaba sa ka kwa Egepita, ni utwile sililo sa bona bakeñisa banyandisi ba bona; kakuli ni ziba manyando a bona.”

Mebelo: Ni itumezi. Ka ku ya ka liñolo le, kana Mulimu wa isanga pilu kwa batu ba hae ha ba li mwa manyando?

Sofia: Eni, ku bonahala kuli wa ba isezanga pilu.

Mebelo: Fo ha ku talusi kuli Mulimu u talimanga feela ze ezahala a sa ezi se siñwi. Ha mu talime hape kalulo ya mafelelezo ya timana yeo. Mulimu naa bulezi kuli: “Ni ziba manyando a bona.” Mu bona cwañi, Kana manzwi ao a bonisa kuli Mulimu ha naa taba ni manyando a batu?

Sofia: Batili, ha ku bonahali cwalo.

Mebelo: Mulimu ha lemuhangi feela butata bo lu talimananga ni bona, kono mane hape wa ikutwanga bumaswe ha lu li mwa butata.

Sofia: Yeo ki taba ya niti.

Mebelo: Ha lu nze lu nahana za taba yeo, ha lu baleñi taba ye ñwi hape ye bonisa se ne si ezahezi batu ba Mulimu ha ne ba li mwa manyando. Taba yeo i fumaneha kwa liñolo la Isaya 63:9. Kalulo ya pili ya timana yeo i bulela kuli: “Mwa liñalelwa za bona a kalelwa hamoho ni bona.” Mu bona cwañi, kana Mulimu naa ikutwile bumaswe bakeñisa manyando e ne ba talimani ni ona batu ba hae?

Sofia: Eni, ku bonahala kuli naa ikutwile bumaswe.

Mebelo: Bo Sofia, niti kikuli Mulimu wa lu tokomela hahulu, mi ha tabeli ku lu bona inze lu nyanda. Ha lu utwa butuku, ni yena wa utwanga butuku.

KI KABAKALAÑI HE HA SI KA NGA MUHATO?

Mebelo: Ni si ka ya kale, ne ni ka tabela ku ikambota ni mina taba ye ñwi hape.

Sofia: Ku lukile.

Mebelo: Ha mu bone ze i lu bulela Bibele ka za maata a Mulimu. Ha lu baleñi Jeremia 10:12. Kana mwa kona ku bala liñolo leo?

Sofia: Eni. Li bulela kuli: “Ki Yena ya ezize lifasi ka maata a hae, u tiisize lifasi ka butali bwa hae, mi ka ngana ya hae u namuluzi lihalimu.”

Mebelo: Ni itumezi. Ha lu nyakisiseñi ka bukuswani ze i talusa timana ye. Kana Mulimu naa tokwa maata a mañata kuli a bupe lika kaufela ze mwa lihalimu ni ze mwa lifasi?

Sofia: Eni.

Mebelo: Cwale haiba Mulimu u naa ni maata a ku bupa lika kaufela ze lu iponela, kana ha lu koni ku libelela hape kuli wa kona ku zamaisa lika kaufela za bupile?

Sofia: Ni bona kuli wa kona.

Mebelo: Mu nahane hape za bo maa mina. Ki kabakalañi ha mu ikutwanga bumaswe ku ba bona inze ba nyanda?

Sofia: Kakuli ki bo ma, mi na ba lata.

Mebelo: Kambe mu naa ni maata a ku ba folisa kacenu, kana ne mu ka eza cwalo?

Sofia: Eni, ne ni ka eza cwalo luli.

Mebelo: Mu nahane ze i talusa taba yeo. Bibele i luta kuli Mulimu wa lemuhanga ha lu li mwa manyando, mi wa ikutwanga bumaswe, ni kuli u naa ni maata a matuna hahulu. Ku si na ku kakanya, taba yeo i bonisa kuli Mulimu u na ni pilu-telele ye tuna hahulu, kona libaka ha si ka nga muhato wa ku felisa kapili-pili manyando a luna.

Sofia: Bati ha ni i si ka nahana kale taba ye ka nzila ye cwalo.

Mebelo: Kana taba ye, i talusa kuli Mulimu u na ni libaka le linde le li tisa kuli a si ke a nga muhato wa ku felisa butata bwa luna? *

Sofia: Umm, ni sepa kuli u lukela ku ba ni libaka.

Mebelo: Mwendi naa kona ku to ikambota ni mina ze i bulela Bibele fa taba yeo sunda ye taha. Kana mu ka bateñi fa ndu sunda ye taha ka nako ye swana?

Sofia: Eni, ni ka bateñi.

Mebelo: Ki hande. Lu ka to bonana sunda ye taha. *

Kana ku na ni taba ye ñwi ya mwa Bibele ye mu sa utwisisi? Kana ku na ni litumelo ze ñwi kamba lika ze ba ezanga Lipaki za Jehova ze mu bata ku ziba hande? Haiba ki cwalo, mwa kona ku buza yo muñwi wa Lipaki za Jehova. Mi u ka tabela ku ikambota ni mina litaba zeo.

[Litaluso za kwatasi]