ZE BA BUZA BABALI . . .

Ki kabakalañi batu ba bañwi ba ba bulezwi mwa Bibele ha ba si ka pundiwa fa mabizo?

Mwa buka ya Bibele ya Ruti, muuna ya naa hanile ku peta buikalabelo bwa hae ka ku ya ka Mulao wa naa file Mulimu ku Mushe, u bizizwe feela kuli Wena ngete. (Ruti 4:1-12) Kana lu swanela ku nga kuli libaka mabizo a batu ba bañwi ha si ka pundiwa kikuli ne li batu ba ba maswe kamba kuli ne si ba butokwa?

Batili. Ha mu nyakisise mutala u sili. Ha naa lukisa za Paseka ya hae ya mafelelezo, Jesu naa taluselize balutiwa ba hae kuli “mu ye mwa muleneñi ku Ngete” mi mu yo lu lukiseza lika mwa ndu ya hae. (Mateu 26:18) Kana lu swanela ku nga kuli mutu ya bizizwe kuli “Ngete” mwa timana ye, ki muuna ya maswe kamba ne si wa butokwa? Batili; kakuli mane ku bonahala kuli muuna ya bizizwe kuli “Ngete” mwa timana ye, ne li mulutiwa wa Jesu. Libaka libizo la hae ha li si ka pundiwa kikuli nee si la butokwa hahulu mwa litaba ze ne bulelwa mwa likande le.

Ku tuha fo, mwa Bibele ku na ni mabizo a mañata a batu ba ba maswe; mi hape ku na ni litaba ze ñata za batu ba ne ba sepahala ba ba si ka pundiwa fa mabizo. Ka mutala, libizo la Eva, yena musali wa pili, la zibahala. Nihakulicwalo, buitati bwa hae ni ku sa utwa Mulimu kwa hae ki zona ze ne tahisize kuli Adama a eze sibi, ili nto ye lu tahiselize butata bo butuna. (Maroma 5:12) Kono libizo la musalaa Nuwe ha li si ka pundiwa mwa Bibele, nihaike kuli ne li musali ya naa itombozi, ya naa ipeile ku utwa ili ya naa tusize muunaa hae ku peta musebezi wa butokwa. Kwa iponahalela hande kuli ku sa pundiwa kwa libizo la hae, ha ku talusi kuli naa si wa butokwa kamba kuli mwendi naa si ka shemubiwa ki Mulimu.

Ku na ni batu ba bañwi ba ba bulezwi bwa Bibele ba ne ba petile ka bundume misebezi ya butokwa ya Jehova, kono ha ba si ka pundiwa fa mabizo. Ku na ni kasizana ka Muisilaele ka ne ka li mutanga mwa ndu ya mueteleli wa limpi za Syria ya bizwa Naamani. Ne ka bulelezi mulenaa kona yena musalaa Naamani ka bundume za mupolofita wa Jehova ya naa pila mwa Isilaele. Kezo yeo ne i tahisize kuli ku ezwe makazo ye tuna. (2 Malena 5:1-14) Mwanaa musizana wa muatuli wa Isilaele Jefita, ni yena naa tomile mutala o ipitezi wa tumelo. Naa itatezi ku i toboha ku sa nyalwa ni ku ba ni bana ka mulelo wa ku taleleza buitamo bwa naa ezize ndatahe ku Mulimu. (Baatuli 11:30-40) Hape ku na ni batu ba ne ba ñozi lipina ze fitelela 40 ba ba si ka pundiwa fa mabizo mwa Bibele, hamohocwalo ni bapolofita ba ba sepahala ba ba ne ba petile misebezi ya butokwa ba ba si ka pundiwa fa mabizo.—1 Malena 20:37-43.

Mwendi mane mutala o munde ka ku fitisisa ki wa mangeloi a sepahala. Ku na mangeloi a mañata hahulu kono ki mangeloi a mabeli feela a pundilwe fa mabizo mwa Bibele, ili Gabriele ni Mikaele. (Daniele 7:10; Luka 1:19; Juda 9) Mangeloi a mañwi haa si ka pundiwa fa mabizo mwa Bibele. Ka mutala, Manoa ndatahe Samisoni naa buzize lingeloi le liñwi kuli: “Libizo la hao ki wena mañi? kuli se si bulezwi ki wena ha si ka ezwa, lu zibe ku ku kuteka.” Lingeloi ne li mu alabile kuli: “U buzezañi libizo la ka, kanti ki le li komokisa?” Bakeñisa kuli lingeloi le ne li ikokobeza, ne li hanile ku fiwa likute le swanela feela ku fiwa ku Mulimu.—Baatuli 13:17, 18.

Bibele ha talusi libaka batu ba bañwi ha ba pundilwe fa mabizo ni libaka batu ba bañwi ha ba si ka pundiwa fa mabizo. Kono lwa kona ku ituta ze ñata kwa batu ba ne ba sebelelize Mulimu ka busepahali ku si na ku bata libubo kamba litulo.