BIBELE YA CINCANGA BUPILO BWA BATU

“Batu ba bañata ne ba ni toile”

Taba ye kandekilwe ki bo Waldo Moya

SILIMO SE NE BA PEPILWE: 1978

NAHA KO NE BA PEPEZWI: CHILE

LITABA ZE EZAHEZI: NE BA LI BA MIFILIFILI HAHULU

BUPILO BWA KA BWA KWAMULAHO: Ne ni hulezi mwa Santiago, wona muleneñi wa naha ya Chile, ili mwa silalanda mo ne ku fumaneha hahulu milyani ye kola, likwata za libangoki, ni bukebenga. Ha ne ni na ni lilimo ze 5, bo ndate ba bulaiwa. Hamulaho wa fo, bo ma ba kala ku pila ni muuna ya naa na ni situhu. Naa lu natanga, sibeli sa luna. Ni la kacenu le, ni sa ikutwanga bumaswe ha ni hupula likezahalo ze ne ezahalanga ka lilimo zani.

Ha ne ni nze ni hula, na kala ku ba wa mifilifili hahulu bakeñisa kukuezo ye maswe ya mwa silalanda. Ne ni teelezanga kwa lipina ze lilata, ne ni nwanga hahulu bucwala, mi fokuñwi ne ni itusisanga milyani ye kola. Hañata ne ni fumanehanga mwa lindwa za mwa makululu za ku lwana ni likwata za balekisi ba milyani ye kola, ili ba ne ba ba batile ku ni bulaya mwa lindwa li sikai. Nako ye ñwi, sikwata se siñwi sa libangoki se ne si lwanisana ni luna ne si kupile muuna ya naa zibahala ku ba sibulai kuli a to ni bulaya, kono ne ni konile ku baleha hamulaho wa ku ni taba tipa. Hape ka nako ye ñwi, ba sikwata se siñwi sa balekisi ba milyani ye kola ba ni supisa tobolo kwa toho mi ba lika ku ni bulaya.

Ka 1996, na latana ni musali ya bizwa Carolina, mi ka 1998, lwa nyalana. Hamulaho wa ku pepwa kwa mwanaa luna wa pili wa mushimani, na ikalelwa hahulu bakeñisa buhali bo butuna bo ne ni na ni bona, mi na lemuha kuli ne ni ka swana ni bo ndate ba ne ba nyezi bo ma mi ne ni ka nyandisanga lubasi lwa ka. Kamukwaocwalo, na ya kwa sipatela se siñwi se ne si li mwa sibaka se ne lu pila ku sona kuli ni yo tusiwa. Na fiwa likalafo, kono ne ni si ka tuseha. Na zwelapili ku halifiswanga nihaiba ki lika ze nyinyani; ne ni sa koni ku iswala. Na bata ku ipulaya ka mulelo wa ku bata ku ambuka ku utwisanga lubasi lwa ka butuku. Kono ka litohonolo, ne ni palezwi ku ipulaya.

Ka lilimo ze ñata ne ni sa lumeli kuli ku na ni Mulimu, kono cwale ne ni bata ku ba ni tumelo ku Mulimu. Kamukwaocwalo, na swalisana ni keleke ye ñwi ka nako ye telelenyana. Ka nako ye swana yeo, musalaa ka naa itutanga Bibele ni Lipaki za Jehova. Ne ni toile Lipaki, mi hañata ne ni ba tapaulanga. Kono kamita ne ba ni alabanga ka kozo, ili nto ye ne ni si ka libelela.

Zazi le liñwi, bo Carolina ba ni kupa kuli ni apule Bibele ya ka ni ku bala Samu 83:18. Timana yeo i bonisa hande kuli libizo la Mulimu ki Jehova. Ne ni komokile ha ne ni lemuhile kuli mwa bulapeli  bo ne ni li ku bona, ne ni itutile ka za mulimu, kono isiñi ka za Jehova. Kwa makalelo a silimo sa 2000, ni na, na kalisa ku ituta Bibele ni Lipaki.

BIBELE MO NE I CINCELIZE BUPILO BWA KA: Ha ne ni nze ni zwelapili ku ituta, ne ni omba-ombilwe ki taba ya kuli Jehova ki Mulimu ya na ni mukekecima ni ya swalela. Ka mutala, kwa Exoda 34:6, 7, Bibele i talusa kuli Jehova ki “Mulimu ya na ni makeke ni musa, ya sa akufi ku halifa, ya tezi sishemo, ya na ni niti; Ya tiiseza ku shemuba batu mwa masika a bona aa eza lule, ya swalela batu bumaswe, ni buikuhumuso, ni sibi.”

Nihakulicwalo, ne ku si ka ni bela bunolo ku sebelisa litaba ze ne ni ituta. Ne ni ikolwisize kuli ni kamuta ha ni na ku kona ku cinca mukwa wa ka wa ku halifanga maswe. Nako kaufela ha ne ni palelwanga ku iswala, bo Carolina ne ba ni susuezanga ka lilato. Ne ba ni hupulisanga kuli Jehova naa bona buikatazo bo ne ni eza. Susuezo ya bona ne i ni file maata a ku zwelapili ku lika ku tabisa Jehova, nihaike kuli hañata ne ni ikutwanga kuli ha ni na ku kona ku cinca.

Zazi le liñwi, bo Alejandro, ba ne ba itutanga ni na Bibele, ba ni kupa ku bala liñolo la Magalata 5:22, 23. Litimana zeo li bulela kuli muselo wa moya wa Mulimu ki “lilato, tabo, kozo, pilu-telele, sishemo, bunde, tumelo, bunolo, buiswalo.” Bo Alejandro ba ni taluseza kuli, kuli ni be ni tulemeno to, ne ni sa tokwi ku itinga fa maata a ka, kono ne ni tokwa ku itinga fa tuso ya moya o kenile wa Mulimu. Taba yeo ne i ni tusize ku cinca mubonelo wa ka ka ku tala!

Hamulaho, na yo fumaneha kwa mukopano o mutuna wa Lipaki za Jehova. Ku zamaya hande kwa lika, bukeni, ni silikani, ze ne ni boni kwa mukopano wo, za ni kolwisa kuli ni fumani bulapeli bwa niti. (Joani 13:34, 35) Na kolobezwa mwa February ka 2001.

MO NI TUSELIZWE: Jehova u cincize bupilo bwa ka, ne ni li mutu wa mifilifili kono cwale se ni li mutu wa kozo. Ni ikutwa kuli u ni zwisize mwa butata bo butuna bo ne ni li ku bona. Batu ba bañata ne ba ni toile, mi ha ni ba nyazi. Nihakulicwalo, ka nako ya cwale, ni ikola ku sebeleza Jehova ka kozo hamoho ni musalaa ka ni bana ba ka ba babeli ba bashimani.

Banabahabo na ni batu ba ne ba banga balikani ba ka ba komokile hahulu mo ni cincelize. Kabakaleo, ba bañwi ku bona se ba tabela ku ituta niti ye mwa Bibele. Hape ni bile ni tohonolo ya ku tusa ba bañwi ku ziba Jehova. Ki nto ye ni tabisize hahulu ku bona kuli ni bona ba konile ku cinca bupilo bwa bona bakeñisa niti ye fumaneha mwa Bibele!

[Manzwi a fa likepe 13]

Ne ni omba-ombilwe ki taba ya kuli Jehova ki Mulimu ya na ni mukekecima ni ya swalela

[Siswaniso se si fa likepe 13]

Ni ikolanga ku luta ba bañwi ze ni itutile

[Siswaniso se si fa likepe 13]

Na ni lubasi lwa ka, lu sebeleza Jehova ka kozo