TOHO YA TABA | KI KABAKALAÑI BATU BA BAÑWI HA BA IKUTWA KULI HA BA KONI KU LATA MULIMU?

Buhata bo bu Tahisa Kuli Batu ba Nahane Kuli Mulimu Haa na Libizo

ZE BA LUMELA BA BAÑATA Caziba wa lituto za bulapeli ya bizwa David Cunningham, u bulela kuli: “Ha lu si ka fita fa ku lumelelana ka za haiba Mulimu u na ni libizo le li mu konka mi haiba li teñi, u zibe ha lu li zibi.”—

NITI YE FUMANEHA MWA BIBELE Bibele i bulela kuli: ‘Muñaa Bupilo Jehova; ki Yena Mupilisi wa luna’ (Isaya 12:2). Jehova ki libizo la Siheberu le li talusa “Ya Tahisa ku ba Teñi.”—

Jehova u bata kuli lu itusise libizo la hae. Bibele i bulela kuli: “Mu lapele Libizo la hae, mu babaze limakazo za hae mwahalaa macaba, mu bubanise Libizo la hae le li pahami.”—Isaya 12:4.

Jesu naa itusize libizo la Mulimu. Naa bulelezi Jehova mwa tapelo kuli: “Ni zibahalize libizo la hao ku bona [balutiwa ba Jesu] mi ni ka li zibahaza.” Ki kabakalañi Jesu haa na zibahalize libizo la Mulimu kwa balutiwa ba hae? Naa zwezipili ku bulela kuli: “Kuli lilato le u ni latile ka lona [Mulimu] li be ku bona ni na ni swalisane ni bona.”—Joani 17:26.

LIBAKA HA LU SWANELA KU ZIBA NITI Muluti wa litaba za bulapeli ya bizwa Walter Lowrie naa ñozi kuli: “Mutu ya sa zibi libizo la Mulimu, ha mu zibi luli mi ha koni ku mu lata, haiba za ziba feela kikuli Mulimu ki maata feela a si na maikuto.”

Muuna ya bizwa Victor naa yanga kwa keleke sunda ni sunda, kono naa sa ikutwi kuli naa ziba Mulimu luli. U bulela kuli: “Hasamulaho na ituta kuli libizo la Mulimu ki Jehova, mi ne ku swana feela inge kuli ne ni zibahalizwe ku Mulimu. Ne ni ikutwile inge kuli ne ni fumani mutu ye ne ni utwanga feela hahulu ka za hae. Na fita fa ku ziba kuli Mulimu u teñi luli mi naa kala ku eza silikani ni yena.”

Jehova ni yena u banga bukaufi ni batu ba ba itusisa libizo la hae. U sepisa batu “ba ba tokomela Libizo la hae,” kuli: “Ni ka ba shwela makeke sina mutu ha shwela mwanaa hae makeke ya mu sebeleza.” (Malaki 3:16, 17) Mulimu hape u fuyaulanga batu ba ba biza fa libizo la hae. Bibele i bulela kuli: “Kakuli ‘mutu kaufela ya biza fa libizo la Jehova u ka piliswa.’”—Maroma 10:13.

[Siswaniso se si fa likepe 4]

Ku pata kamba ku yolisa libizo la Mulimu ku swana ni ku li zwisa mwa Bibele