MU SUTELELE KU MULIMU

“Ki Yena ya fa Mupuzo ku ba ba Tiiseza ku mu Bata”

Kana Jehova wa itumelanga ku ze ba eza batu ba ba mu lapela ha ba nze ba lika ku mu tabisa? Batu ba bañwi ba kona ku alaba kuli batili, ka ku nahana kuli Mulimu ha naa taba ni batu. Kono muhupulo o cwalo u tahisa feela kuli batu ba si ke ba ziba niti ka za Mulimu. Bibele lona Linzwi la Mulimu, li bulela niti ka za hae. Li lu kolwisa kuli Jehova wa itumelanga kwa buikatazo bo ba ezanga balapeli ba hae ba ba sepahala. Mu nyakisise manzwi a muapositola Paulusi a ñozwi kwa Maheberu 11:6.

Lu kona ku ezañi kuli lu tabise Jehova? Paulusi u talusa kuli: “Ha ku si na tumelo ha ku konahali ku tabisa Mulimu.” Mu lemuhe kuli Paulusi ha buleli kuli ku taata ku tabisa Mulimu ku si na tumelo. Kono u talusa kuli ha ku konahali ku tabisa Mulimu ku si na tumelo. Ka mubulelelo o muñwi, mutu u tokwa ku ba ni tumelo kuli a tabise Mulimu.

Lu tokwa ku ba ni tumelo ye cwañi kuli lu tabise Jehova? Tumelo ya luna ku Mulimu i swanela ku ama lika ze peli. Sapili, lu “swanela ku lumela kuli Mulimu u teñi.” Litoloko ze ñwi li bulela kuli “lu lumele kuli Mulimu ki wa luli” kamba “lu lumele kuli Mulimu u teñi.” Ha lu koni ku tabisa Mulimu haiba lu kakanya za ku ba teñi kwa hae. Nihakulicwalo, ku lumela feela kuli Jehova u teñi ha ku si ka likana kakuli nihaiba ona madimona a lumela cwalo. (Jakobo 2:19) Tumelo ya kuli Mulimu ki wa luli ku luna, i swanela ku lu susueza ku pila ka nzila ye mu tabisa.—Jakobo 2:20, 26.

Sa bubeli, lu “swanela ku lumela kuli” Mulimu “ki yena ya fa mupuzo.” Mutu ya na ni tumelo ya niti u na ni buikolwiso bwa kuli buikatazo bwa hae bwa ku pila ka nzila ye tabisa Mulimu ha bu na ku ba bwa mbango. (1 Makorinte 15:58) Ha lu koni ku tabisa Jehova haiba lu kakanya kuli wa kona ku lu fa mupuzo kamba kuli wa tabela ku lu fa mupuzo. (Jakobo 1:17; 1 Pitrosi 5:7) Mutu ya nahana kuli Mulimu haa na taba ni batu, kamba kuli ha na buitumelo, ni kuli ha na sishemo, ha zibi Mulimu ya bulelwa mwa Bibele.

Jehova u fanga mupuzo kwa batu ba ba cwañi? Paulusi u bulela kuli Jehova u fanga mupuzo “ku ba ba tiiseza ku mu bata.” Buka ye ñwi ye tusa batoloki ba Bibele ku peta hande musebezi wa bona, i bonisa kuli linzwi la Sigerike le li tolokilwe kuli “ba ba tiiseza ku mu bata” ha li talusi ku ya ni “ku yo bata Mulimu,” kono li talusa ku eza buikatazo bwa ku “lapela Mulimu.” Buka ye ñwi hape i talusa kuli linzwi leo la Sigerike le li talusa kezo li fa muhupulo wa ku lika ka taata ku sebeleza Mulimu. Kaniti, Jehova u fanga mupuzo kwa batu ba ba susuezwa ki tumelo ya bona ku mu lapela ka lilato ni ka tukufalelo ya ka pilu kaufela.—Mateu 22:37.

Jehova u fanga cwañi mupuzo kwa batu ba ba mu lapela? U sepisize ku fa batu ba ba cwalo mupuzo o mutuna hahulu wa ku pila ku ya ku ile mwa Paradaisi fa lifasi ili nto ye bonisa kuli u na ni sishemo ni lilato le li tuna hahulu. (Sinulo 21:3, 4) Nihaiba ka nako cwale batu ba ba tiiseza ku bata Jehova ba fumananga limbuyoti ze ñata. Ka ku tusiwa ki moya wa hae o kenile ni butali bo bu fumaneha mwa Linzwi la hae, batu bao ba ikola ku pila bupilo bo bunde ni bwa tabo.—Samu 144:15; Mateu 5:3.

Kaniti, Jehova ki Mulimu ya itumela ni ku tabela misebezi ye ba peta balapeli ba hae ba ba sepahala. Kana ku ziba taba yeo ha ku mi susuezi ku lata ku sutelela ku Mulimu? Haiba ki cwalo, mu ka eza hande ku ituta ze ñata kuli mu zibe mo mu kona ku bela ni tumelo hamohocwalo ni mo mu kona ku i boniseza ilikuli Jehova a mi fe limbuyoti ze ñata.

Litaba za mwa Bibele ze akalelizwe ku baliwa mwa November

Tite 1-3; Filemoni 1-25; Maheberu 1-13–Jakobo 1-5

[Manzwi a fa likepe 11]

Ha lu koni ku tabisa Jehova haiba lu kakanya kuli wa kona ku lu fa mupuzo kamba kuli wa tabela ku lu fa mupuzo