Bana bakona kuhula hande haiba bautiwa ki bashemi babalatana ni kukutekana. (Makolose 3:14, 19) Bashemi babande balata bana babona mi baitumelanga kubona habaeza hande, sina feela Jehova Mulimu mwanaa babalezanga Mwanaa hae.—Mubale Mateu 3:17.

Ndataaluna wa kwa lihalimu wa teelezanga kwa batanga bahae, ni kuiyakatwa bona. Bashemi baswanela kuituta mo Mulimu aezeza lika ni kuteelezanga kuzebabulela bana babona. (Jakobo 1:19) Baswanela kuutwisisa mobaikutwela bana babona, nihaiba ka nako yebabulela lika zemaswe bakeñisa bunyemi.—Mubale Numere 11:11, 15.

Ka kuba bashemi, munani tukelo ya kutomela bana bamina milao. (Maefese 6:1) Muitute mwaezezanga lika Mulimu. Ubonisanga lilato kwa bana bahae ka kubataluseza milao yahae ka kuutwahala hande ni bumaswe bwa kusalatelela milao yeo. (Genese 3:3) Mwa sibaka sakuhapeleza batu kuutwa milao yahae, Mulimu ubalutanga mobakona kutusezwa habaeza lika zelukile.—Mubale Isaya 48:18, 19.

Muikataze kutusa bana bamina kulata Mulimu. Kueza cwalo kukatahisa kuli baezange zende nihaiba ka nako yebainzi banosi. Sina feela Mulimu haluluta ka kulutomela mutala, ni mina mulute bana bamina ka kuba tomela mutala.—Mubale Deuteronoma 6:5-7; Maefese 4:32; 5:1.