Jesu naabulelezi balutiwa bahae kuli: “Mukaba lipaki zaka . . . kuyo fita kwa libaka za kwahule hahulu za lifasi.” (Likezo 1:8) Kacenu, Lipaki za Jehova baeza musebezi wo ka tukufalelo. Nihakulicwalo, mwa libaka zeñwi za lifasi, kukopanyeleza cwalo ni libaka kokupila batu babañata, taba yende haisika kutazwa ka kutala. Mi mwa linaha zeñwi kupila feela Lipaki za Jehova babanyinyani. (Mateu 9:37, 38) Kopano iezizeñi kuli taba yende ifite kwa batu babañata ka mokukonahalela kaufela?

 Kuli lumamele taelo yanaafile Jesu, ba Katengo ka Sebelezo ka Sitopa Sesietelela sa Lipaki za Jehova balumanga balumiwa kwa libaka kokutokwahala hahulu bakutazi ba Mubuso mwa lifasi kaufela. Kacenu, mwa lifasi kaufela kunani balumiwa ba 3,090. a Babañwi bakeni Likolo za Bibele, zecwale ka Sikolo sa Bakutazi ba Mubuso. Balumiwa baitatelanga kusiya mandu abona ni kututela kwa naha isili. Bakeñisa kuli bahulile kwa moya, bakeni sikolo, mi banani yeloseli, balumiwa babasepahala ba, batusa hahulu mwa musebezi wa kuhasanya taba yende mi batomela balutiwa babanca mutala omunde.

 Fa mutai ni mutai, Ofisi ya Mwa Liluko la Sebelezo Yetalima za Baokameli ba Mupotoloho, Mapaina Babaipitezi, ni Balumiwa isebelisana hamoho ni Katengo ka Mutai kutusa balumiwa kufumana lika zebatokwa zecwale ka ndu mwa kuina, likalafo, ni penenyana ya kuitusisa kulifela lisinyehelo zeñwi. Mwa silimo sa sebelezo sa 2020, kopano ya Lipaki za Jehova neiitusisize masheleñi abato eza K486,000,000 kulifela lisinyehelo za balumiwa. Litukiso zecwalo litusa balumiwa kuisa hahulu mamelelo yabona kwa musebezi wa kukutaza hamohocwalo ni kutiisa liputeho zebaswalisana ni zona.

 Balumiwa batusa cwañi mwa musebezi wa kukutaza? Muzwale yabizwa Frank Madsen, yali mwa Katengo ka Mutai wa Malawi, utalusa kuli: “Bakeñisa bundume ni buikoneli bwabona, balumiwa batusize liputeho kukwahela kalulo ya simu yeli taata kukutaza ku yona, inge cwalo mwa libaka zenani miyaho yeinzi mwa makwakwa ni libaka kokupila batu bababulela puo ya kwa naha isili. Hape basusueza hahulu babañwi kakuli baeza ka taata kuituta puo ni sizo sa mwa sibaka mobasebeleza, mi batusa babanca kuitomela sikonkwani sa kukena mwa sebelezo ya nako kaufela. Luitumela hahulu ku Jehova kabakala musebezi omunde obaeza balumiwa.”

 Muzwale yomuñwi wa mwa Katengo ka Mutai wa mwa naha yeñwi ubulela kuli: “Balumiwa ki mutala omunde hahulu obonisa kuli batanga ba Jehova baswalisani mwa lifasi kaufela. Mane nihaiba batu babasi Lipaki za Jehova baiponela hande kuli nihaike kuli luzwa mwa linaha zeshutana-shutana, halusika kauhana, kono Bibele ilutusa kuswalisana ni mizwale ni likaizeli baluna mwa lifasi kaufela.”

 Balumiwa batusa cwañi bahasanyi ba mwa puteho yebaswalisana ni yona? Muzwale yabizwa Paulo, yapila kwa Timor-Leste uitebuha hahulu balumiwa babaswalisana ni puteho yali ku yona. Utalusa kuli: “Kwa sibaka kolupila, kucisa hahulu. Kono nihaike kuli balumiwa bazwa kwa sibaka kokubata, bazwelangapili kukutaza niha kucisa. Kamita bafumanehanga kwa mukopano wa sebelezo ya mwa simu kakusasana. Hañata, nababonanga habakutela kwa batu bane bakutalize ku bona, musihali kazazi inze kalenga, mi hape baezanga cwalo ni manzibwana. Batusize batu babañata kuziba niti, kukopanyeleza cwalo ni na. Baitusisa nako yabona kaufela kusebeleza Jehova ka tukufalelo, mi taba yeo isusueza mizwale ni likaizeli kaufela mwa puteho kusebeleza Mulimu ka kutala.”

 Kaizeli yabizwa Ketti, yali paina wa kamita kwa Malawi, utalusa mo bo mutu ni musalaa hae babali balumiwa nebatuselize lubasi lwahae, uli: “Bo mutu ni musalaa hae babali balumiwa hane bakalile kuswalisana ni puteho yaluna, neli na feela Paki mwa lubasi lwaluna. Kono balumiwa bao neba nitusize hahulu, mi bakala kuutwana hahulu ni lubasi lwaka. Mutala wabona omunde neutusize bana baka kulemuha kuli kusebeleza Jehova kutahisa tabo ya luli ni kuikola bupilo. Mutala omunde wa balumiwa ususuelize bana baka babasizana babalaalu kuba mapaina ba kamita mi bo muunaaka bakalile kufumanehanga kwa mikopano ya puteho.”

 Lisinyehelo za balumiwa lilifelwa cwañi? Lilifelwa ka linubu zefiwanga kuli lituse mwa musebezi wa mwa lifasi kaufela, mi buñata bwa linubu zeo lifiwanga ka kuitusisa yeñwi ya linzila zefumaneha fa donate.pr418.com. Lwaitumela ku mina kabakala linubu zeñata zemufanga.