Jehova Mulimu ubata kuli batu kaufela, kusina taba ni miinelo yebali ku yona, baitute ka za hae ni Mubuso wahae wa kwa lihalimu. (1 Timotea 2:3, 4) Ki lona libaka Lipaki za Jehova habahatisanga Libibele ni lihatiso za kuituta ka zona Bibele kuli batu babañata batusehe, kukopanyeleza cwalo ni bo susu. Mane kopano yaluna ilukisize lihatiso zeñata-ñata mwa mufuta wa mavidio a mwa puo ya bo susu, a ili mavidio afumaneha mwa lipuo za bo susu zefitelela 100! Lihatiso za mwa puo ya bo susu lilukiswanga cwañi mi bo susu balifumananga cwañi? Mi ki licinceho mañi zeneezizwe hamulaho wa nako?

 Lihatiso za mwa puo ya bo susu lilukiswanga ki likwata za batoloki mwa lifasi kaufela. Mizwale ni likaizeli mwa sikwata ni sikwata banyakisisanga ka tokomelo hatiso yebabata kutoloka. Hasamulaho, babatanga linzila zende za kutoloka ka zona litaba zeo mwa puo ya bo susu. Hase baezize cwalo, balukisanga vidio ya hatiso yeo. Ka nako ya cwale, kunani likwata za batoloki ze 60 babatolokanga kamita lihatiso za kuituta ka zona Bibele mwa puo ya bo susu, ni likwata za batoloki ze 40 babaezanga cwalo ka siwela.

 Kwamulaho, nekutula hahulu kulukisa mavidio mwa puo ya bo susu. Likamera za kuunga ka zona mavidio hamohocwalo ni liitusiso zeñwi nelitula hahulu kufita cwale. Hape, mavidio naangelwanga mwa situdiyo, mi nelutokwa kuyaha situdiyo yeo luna bañi mi fokuñwi nelulukisanga sinca muyaho oliteñi nikale. Neluitusisanga masheleñi afitelela K501,000 b kuonga-onga lika kaufela zetokwahala kuli kube ni sikwata sa batoloki ba puo ya bo susu.

 Kuli linubu zaluna likone kuitusiswa hande, kopano yaluna ibatile linzila zetusize kubolosola ni kunolofaza musebezi wa kutoloka. Kacwalo, lipangaliko zeluitusisa cwale ki za mwa miteñi ye, zabeleka hande, mi lileka masheleñi alikani. Mwa sibaka sa kuyaha situdiyo, batoloki sebakona kuunga mavidio mwa liofisi zabona mi hakuungiwa vidio, balukisanga kuli kube ni mubala wa butala fa limota. Haiba mizwale ni likaizeli babañata batokwa kuba mwa vidio ya hatiso, mañi ni mañi wakona kuunga kalulo yahae ya vidio inze ali mwa ofisi kamba kwa ndu kusina kuya kwa situdiyo.

 Hape lulukisize liprogilamu za fa kompyuta zetusa batoloki ba puo ya bo susu kupeta musebezi wabona. Liprogilamu zeo litusize likwata za batoloki kutoloka lihatiso mwa puo ya bo susu ka nako yekuswani feela kufita mone kubelanga kwamulaho. Mizwale baluna baitebuha hahulu tukiso yeezizwe yeo. Muzwale yomuñwi yabizwa Alexander utalusa kuli: “Sekunani mavidio amañata mwa puo ya bo susu kufita kwamulaho. Nitabile hahulu. Nibuhanga mavidio zazi ni zazi.”

 Mazazi a, luitusisanga masheleñi asafiteleli K83,600 kuonga-onga lika kaufela zetokwahala hakutomiwa sikwata sa batoloki ba puo ya bo susu. Kabakaleo, selukona kulukisa mavidio mwa lipuo za bo susu zeñata.

 Batoloki hase bafelize kulukisa hatiso mwa puo ya bo susu, bo susu batokwa kufumana mavidio ao. Kwamulaho, nelubeyanga mavidio aluna fa makaseti ni fa matapa, kono kuli lueze cwalo, neluitusisanga masheleñi amañata mi nelutokwa kutanda nako yeñata ni kusebeza nako yetelele. Hamulaho wa kuunga mavidio, nelu alumelanga kwa kampani yeñwi kuli ilubeyele ona fa makaseti kamba fa matapa amañata. Zeo kaufela hase liezizwe, nelulumelanga liputeho makaseti ni matapa ao. Mwa 2013 feela, neluitusisize masheleñi afitelela K10,000,000 kuli mavidio a mwa puo ya bo susu abeiwe fa matapa.

 Bo susu nebaitebuhile hahulu lico za kwa moya zeo. Nihakulicwalo, nesi nto yebunolo kuitusisa mavidio ao, sihulu makaseti kamba matapa hanaabile amañata. Mwa miinelo yemiñwi, nekuitusiswanga matapa amañata hakuungiwa vidio ya buka iliñwi feela ya mwa Bibele. Muzwale yomuñwi wa kwa Brazil yabizwa Gilnei, utalusa kuli: “Nako kaufela hane lutokwa kubala liñolo leliñwi mwa Bibele, nelubatanga kaseti yeswanela ni kufumana liñolo lelubata. Nekuli taata kueza cwalo.” Kaizeli yomuñwi yabizwa Rafayane, yanaaitusisanga matapa a mavidio a mwa puo ya bo susu, utalusa kuli: “Nekukatalisa kueza tuto ya ka butu. Neku luungelanga nako yeñata kufumana mañolo ni litaba zeñwi zetalusa mañolo.” Mi mizwale ni likaizeli baluna hane bayanga kwa kukutaza, hañata nebashimbanga matapa a mavidio kamba makaseti, mi nebabuhisanga mavidio ao fa TV ya mutu yanaatabela kuituta. Mizwale babañwi mane nebashimbanga lipangaliko zabona za kuitusisa kwa kubuhisa mavidio. Nihakulicwalo, nakonyana kuzwa fo, lipangaliko zekona kulwaliwa fa kubuhela mavidio nelikalile kufumaneha mi mizwale babañata nebaitusisize zona. Muzwale yapila kwa America yabizwa Bobby, utalusa kuli: “Hamulaho wa kubuhisa mutu liñolo lililiñwi la mwa Bibele, hañata nelutokwa kucinca litapa kuli lukone kumubuhisa liñolo leliñwi. Kueza cwalo nekuunganga nako mi nekutahisa kuli kulubele taata kuitusisa Bibele hane luikambota ni batu.”

 Mwa 2013, kopano ya Jehova neilukisize Progilamu ya JW Library ya mwa puo ya bo susu, ili progilamu yekonisa mizwale ni likaizeli kuunga mavidio a mwa puo ya bo susu ni kuabuha ka kuitusisa mafoni abona kamba tupangaliko totuñwi. Progilamu yeo pili neilukisizwe mwa puo ya bo susu ya kwa America. Mi mwa 2017, neiuncafalizwe kuli kufumanehe lipuo kaufela za bo susu. Taba yeo neitabisize hahulu mizwale ni likaizeli baluna mwa lifasi kaufela. Muzwale yapila kwa Brazil yabizwa Juscelino, utalusa kuli: “Nenikomokile hahulu luli! Neninahanisisize mo ba Sitopa Sesietelela baboniseza lilato ku luna bo susu ni kulutusa kueza zwelopili ya kwa moya sina batu babañwi kaufela. Nenitabile hahulu, mi progilamu ye nei nisusuelize kubalanga hahulu Bibele.”

 Kacenu, lulukisanga mavidio a mwa puo ya bo susu akona kubuhelwa fa tupangaliko mi luabeyanga fa webusaiti yaluna ni fa Progilamu ya JW Library ya mwa puo ya bo susu. Kabakaleo, lihatiso zakona kutolokiwa mwa puo ya bo susu, kulukiswa mwa mufuta wa mavidio, mi bo susu bakona kulifumana mwa mazazi asikai feela kufita kulibelela likweli kamba lilimo sina mone kubelanga kwamulaho. Mane lihatiso za mwa lipuo zeñata za bo susu lifumanehanga ka nako yeswana ni lihatiso za mwa lipuo zeñwi kaufela.

 Haluutweñi maikuto a mizwale ni likaizeli baluna babaitusisa puo ya bo susu. Kaizeli yomuñwi yabizwa Klízia, utalusa kuli: “Ki ifi kopano yeisa hahulu pilu bo susu ni kubalukiseza lico za kwa moya zebakona kufumana ka bunolo? Ki kopano ya Jehova feela mi hakuna kopano yeñwi hape mwa lifasi yekona kueza cwalo.” Muzwale yabizwa Vladimir, utalusa kuli: “Mavidio anitusanga kulemuha kuli Jehova waisa pilu bo susu sina feela mwaiseza pilu batu babañwi kaufela.”

 Mwa mavidio aluna a mwa puo ya bo susu hañata kubulelwanga kuli: “Musebezi wa kulukisa hatiso ye, ki omuñwi wa misebezi yeeziwa mwa lifasi kamukana ya kuluta batu Bibele, ili misebezi yelifelwa ka linubu za kuitatela.” Luitumela hahulu ku mina kabakala linubu zemufanga, mi buñata bwa linubu zeo lifiwanga ka kuitusisa donate.pr418.com. Masheleñi a, alutusa kuhatisa Libibele ni lihatiso za kuituta ka zona Bibele zeitusiswa ki batu kaufela, kukopanyeleza cwalo ni babaitusisa puo ya bo susu.