Mwa January 2021, ba Sitopa Sesietelela nebazibisize za kuzwiswa kwa hatiso yenca yeitusiswa kwa kuituta Bibele ya Muikole Bupilo Kuya Kuile! a Nemuikutwile cwañi hane muutwile zibiso yeo? Muzwale yabizwa Matthew, wa kwa Canada, utalusa kuli: “Nenitabile hahulu kuutwa zibiso yeo! Mi tabo yaka neiekezehile hahulu hane ninze niteeleza kwa lingambolo ni kubuha mavidio anaatalusa libaka hatiso ye hane ilukisizwe ni mone ilikezwi. Neninyolezwi hahulu kuba ni buka ye ni kukala kuitusisa yona.”

 Hatiso ya Muikole Bupilo Kuya Kuile! ilukisizwe ka nzila yelutusa kuzamaisa lituto za Bibele ka kuitusisa muezezo omunca. Kono yeo haki yona feela shutano yeliteñi mwahalaa buka yenca ye ni lihatiso zeñwi zeneitusiswanga kwa kuituta Bibele ni batu. Haiba muitusisa buka ya Muikole Bupilo Kuya Kuile! yehatisizwe, mwendi mulemuhile kuli yashutana ni libuka zeñwi ka moiutwahalela mwa lizoho. Kuli luutwisise libaka hakuli cwalo, halunyakisiseñi litaba zeñwi ka za moilukiselizwe buka ye.

 Kuitusisizwe mapepa amukita. Ki kabakalañi hane kutokwahala kueza cwalo? Mwa buka ya Muikole Bupilo Kuya Kuile! kuitusisizwe maswaniso amande afitelela 600, ili palo yefitelela maswaniso aaitusisizwe mwa buka ya Bibele Ilulutañi? ibato ba halishumi! Fa makepe a buka yenca ye hape kunani libaka zeñata fokusina litaba zeñozwi kamba maswaniso. Miinelo yemibeli ye itahisa butata: Haiba pepa yeitusisizwe mwa buka ki yesisani, maswaniso a fa likepe leliñwi akona kubonahala fa likepe la kwabuse, nihaikaba kuli abonahala feela hanyinyani. Kuli batibele butata bo, mizwale ba mwa Liluko Leliokamela Musebezi wa Bahatisi Mwa Lifasi Kaufela lelifumaneha kwa Wallkill, mwa New York, kwa America nebalikile mifuta yemine ya mapepa asweli kuitusiswa ka nako ya cwale mwa lihatisezo zaluna. Ba Katengo ka Bañoli ka Sitopa Sesietelela nebatatubile pepa ni pepa mi baketa iliñwi yenesa beleli hahulu. Nihaike kuli pepa ye yatula kufita pepa yeitusiswanga mwa lihatiso zaluna zeñata, itusa kuli baituti ba Bibele hababala litaba za mwa buka ya Muikole Bupilo Kuya Kuile!, basike bahakanyehiswa ki maswaniso afumaneha fa makepe a kwabuse.

 Kuitusisizwe pulasitiki yeshutana fa kava. Kava ya buka yenca ye yashutana ni makava a libuka zeñwi ka moiutwahalela mwa lizoho kakuli kava yayona ikwahezwi ka pulasitiki yesisani-sisani yeisileleza, ili yeshutana ni yeitusisizwe fa libuka zeñwi. Kava ya buka yenca haisika kwahelwa ka mufuta wa pulasitiki yebenya yeitusiswanga, kono kuitusisizwe mufuta wa pulasitiki yesabenyi, ili kutusa kuli maswaniso afumaneha fa kava abonahale hande. Pulasitiki yeitusisizwe fa kava hape itusa kuli buka isike yasinyeha kabakala kuitusisa yona hañata-ñata. Nihakulicwalo, mufuta wa pulasitiki ya fa kava yesabenyi watula mi teko yayona ikona kufita teko ya pulasitiki ya fa kava yebenya haketalizoho. Kacwalo, liofisi za mutai lisikai nelisebelisani hamoho kubata mufuta wa pulasitiki yesabenyi yesatuli hahulu.

 Ki kabakalañi mizwale hane baketile kuitusisa lika zetula cwalo? Muzwale yomuñwi wa mwa Liluko Leliokamela Musebezi wa Bahatisi Mwa Lifasi Kaufela utalusa kuli: “Lwaziba kuli buka ye ikaitusiswa hahulu; kacwalo, lubata kuli izwelepili kubonahala hande niha ikaitusiswa hañata-ñata.” Muzwale yabizwa Eduardo, wa mwa Liluko la Bahatisi kwa mutai wa Brazil utalusa kuli: “Lutabile hahulu kubona mo kopano ya Jehova iitusiselize lika zeswanela luli kulukisa buka yende ye, yetiile, ni yeutwahala hande mwa lizoho, kono ka nako yeswana inze iitusisa hande linubu.”

 Nelukalile kuhatisa buka ya Muikole Bupilo Kuya Kuile! mwa March 2021. Musebezi wo neuezizwe ka nako ya butuku bobuyambukela bwa COVID-19, mi butuku bo, nebutahisize butata. Bakeñisa kuli hakuna batu bane bapila kwande a Betele bane balumelezwa kukena mwahali, mizwale ni likaizeli bane bato sebelezanga fa Betele kuzwa kwa mandu abona nebasa koni kutusa mwa lihatisezo, mi nekusa konahali kumema mizwale ni likaizeli babanca kuto sebeleza fa mutai. Kabakaleo, mwa lihatisezo zeñwi nekusina mizwale ni likaizeli babañata bane bakona kueza musebezi, mi libaka zeñwi kone kuhatisezwa lihatiso nelikwalilwe kabakala litaelo zenefilwe ki muuso.

 Butata bo, nebutatuluzwi cwañi? Libaka zeñwi kone kuhatisezwa hane likwaluzwi, mizwale ni likaizeli ba mwa maluko amañwi fa Betele nebakupilwe kusebeleza mwa liluko lelitalima za kuhatisa lihatiso ka nakonyana ilikuli batuse mwa musebezi wo. Muzwale yabizwa Joel wa mwa Liluko Leliokamela Musebezi wa Bahatisi Mwa Lifasi Kaufela utalusa kuli: “Moya wabona wa buitomboli ni wa kulata kuituta misebezi yemiñwi neutusize kuli musebezi wo upetwe.”

 Kusina taba ni miinelo yetaata yelukopani ni yona, lukonile kuhatisa libuka zeñata-ñata za Muikole Bupilo Kuya Kuile! Kuli luhatise buka ye, lutokwa kuba ni lika zeshutana-shutana zecwale ka tusipi twa litaku totuitusiswa kwa kuñola fa makepe, pulasitiki ya fa kava, pepa, inki, ni silamatela. Mwa likweli feela zeketalizoho kuzwa folukalela kuhatiseza buka, nekuitusisizwe masheleñi afitelela K50,600,000 kuli kulekiwe feela lika za kuitusisa kwa kuhatisa. Kuli luitusise hande linubu, lubonanga teñi kuli luhatisa feela palo ya libuka zekupilwe ki liputeho.

 Baluti ba Bibele ni baituti babona baikutwa cwañi ka za buka yeitusiswa kwa kuluta Bibele ye? Muzwale yabizwa Paul, wa kwa Australia, utalusa kuli: “Niikolanga hahulu kuitusisa buka ya Muikole Bupilo Kuya Kuile! kwa kuzamaisa lituto za Bibele. Buka ye ilukisizwe ka nzila yende hahulu mi isusueza hahulu muituti kuambola. Italusa hande litaba, inani lipuzo zende zefita kwa lipilu, mavidio, maswaniso, machati, ni lika zatokwa kueza muituti. Ilukisizwe ka nzila yende hahulu yenitusa kuekeza kwa buikoneli bwaka bwa kuluta.”

 Muituti yomuñwi wa Bibele wa kwa America naabulezi kuli: “Nalata buka yenca ye luli. Maswaniso aaitusisizwe mwateñi anitusanga kuutwisisa lisupo zetuna. Mavidio a mwateñi anifitanga kwa pilu ni kunisusueza kuunga muhato.” Muituti yo uitutanga habeli ka sunda mi ki wa kamita kwa mikopano ya puteho.

 Libuka zeñata-ñata za Muikole Bupilo Kuya Kuile! lisatokwa kuhatiswa mwa lipuo zeñata. Mane kuto fita la kacenu le, ba Sitopa Sesietelela bafile tumelezo ya kuli buka ye ihatiswe mwa lipuo ze 710, mi palo yeo ifita palo ya lipuo zene ilumelelizwe kuhatiswa ku zona buka ya Bibele Ilulutañi? ka lipuo ze 340!

 Musebezi wa kuhatisa wo ulifelwanga cwañi? Ulifelwanga ka linubu zefiwanga kwa musebezi wa mwa lifasi kaufela, mi buñata bwa linubu ze lifiwanga ka kuitusisa donate.pr418.com. Lwaitumela kwa moya wamina wa bufani, ili olutusa kulukisa lihatiso zeitusiswa kwa kuituta Bibele kuli lituse batu bababata kuituta ka za Jehova ilikuli ‘baikole bupilo kuya kuile.’—Samu 22:26.