Mwa July ni mwa August 2020, mizwale ni likaizeli mwa lifasi kaufela bakabuha mukopano omutuna oswana, ili ka nako yeswana, mi ki lwapili taba yeo kuezahala. Kuli kukonahale kueza cwalo, mukopano wo neutokwa kutolokiwa mwa lipuo zefitelela 500. Hañata, kuonga-onga musebezi wo, kutoloka ni kulekoda lingambolo ni mavidio a mukopano kukona kuunga silimo kamba kufitelela. Kono bakeñisa miinelo yetahisizwe ki butuku bwa coronavirus, mizwale ni likaizeli bane batoloka litaba za Mukopano Omutuna wa 2020 wa “Mube Babatabile Kamita”! nebatokwa kueza musebezi wo mwa nako yesakwani likweli zeene.

 Ba Likolo la Sebelezo ya Batoloki ni ba Liluko Lelitalima za Kuleka Liitusiso Mwa Lifasi Kaufela, zefumaneha kwa Ofisi Yetuna Yezamaisa Musebezi wa Lipaki za Jehova Mwa Lifasi Kaufela nebatusize kuli mungendenge-tuna wo ukonde. Ba Likolo la Sebelezo ya Batoloki nebalemuhile kuli batoloki babañata nebatokwa liitusiso zeñwi kuli bakone kueza musebezi wo, sihulu limaikrofoni zeipitezi zekona kuunga hande mulumo. Ba Liluko Lelitalima za Kuleka Liitusiso Mwa Lifasi Kaufela nebalukisize kuli kulekiwe limaikrofoni ze 1,000, mi hasamulaho, balilumela kwa libaka zebato eza 200.

 Kuli kopano isike yasinyehelwa hahulu, ba Liluko Lelitalima za Kuleka Liitusiso Mwa Lifasi Kaufela nebalekile limaikrofoni zeñata, mi limaikrofoni zeo neliisizwe kwa sibaka silisiñwi, hasamulaho zalumelwa kwa batoloki. Bakeñisa kuli limaikrofoni zeo nelilekilwe ka buñata, ka avareji teko ya maikrofoni ni maikrofoni, kukopanyeleza cwalo ni teko ya kulilumela kwa batoloki neli K2,000. Neluka tokwa kulifa masheleñi amañata hahulu kambe nelulekile maikrofoni iliñwi ka iliñwi.

 Ba Liluko Lelitalima za Kuleka Liitusiso Mwa Lifasi Kaufela nebalukisize za kuleka ni kulumela liitusiso zeo mwahalaa kweli ya April ni May 2020. Ka nako yeo, buñata bwa likampani nelikwalile lipisinisi zazona kabakala butuku bobuyambukela bwa coronavirus. Nihakulicwalo, hakuyo fitiwanga kwa mafelelezo a May 2020, buñata bwa batoloki ba fa liofisi za toloko, liofisi za mutai, ni libaka zeñwi kobapila batoloki nese baamuhezi kale liitusiso zebatokwa.

 Muzwale Jay Swinney, yena yaokamela Liluko Lelitalima za Kuleka Liitusiso Mwa Lifasi Kaufela, naabulezi kuli: “Likampani zenelekisa lika zene lutokwa ni ba maluko a fa Betele nebaswalisani hande mwa musebezi wa kuleka liitusiso zeo. Ki moya wa Jehova feela okonahalisize kuli lueze musebezi wo mwa nako yekuswani feela ni kuitusisa hande linubu ilikuli lutuse mizwale ni likaizeli baluna.”

 Muzwale Nicholas Ahladis, yaswalisana ni Likolo la Sebelezo ya Batoloki, naabulezi kuli: “Ka nako yeo, batoloki nebasa koni kuzwa mwa sibaka sene bali ku sona; kacwalo, nebaitebuhile hahulu hane baamuhezi liitusiso zeo. Kusina taba kuli nebainzi kwahule ni batoloki babañwi mwa sikwata sabona, nebasa kona kusebeza hamoho ni bona kutoloka ni kulekoda lingambolo, madrama, ni lipina, mwa lipuo zefitelela 500.”

 Musebezi wo ki omuñwi wa misebezi yemiñata yeneezizwe kuli kulukiswe Mukopano Omutuna wa 2020 wa “Mube Babatabile Kamita”! ili kutusa mizwale ni likaizeli mwa lifasi kaufela. Linubu zamina zemufile ka kuitusisa donate.pr418.com kamba linzila zeñwi ki zona zetusize kuli kulekiwe lika za butokwa ze.