Mwa silimo sa 2020, nekubile ni likozi za ka taho zeñata-ñata, mi mwa silimo sesiswana seo, butuku bwa COVID-19 nebukalile kuyamba mwa lifasi kaufela. Lipaki za Jehova batusize cwañi batu bane baamilwe ki likozi zeo?

 Mwa silimo sa sebelezo sa 2020, a Katengo ka Baswalisanisi ka Sitopa Sesietelela nekalumelelize kuli masheleñi afita fa K504,000,000 b aitusiswe mwa musebezi wa kutusa babawezwi ki likozi. Taba yeo neitusize batu babañata bane bawezwi ki likozi zefitelela 200, kukopanyeleza cwalo ni bane baamilwe ki butuku bobuyambukela bwa COVID-19, liñuli, muunda mwa Africa, kutaela kwa lico kwa Venezuela, ni linanga mwa Zimbabwe. Masheleñi anaazwisizwe ao, naaitusisizwe kwa kuleka lico, mezi, libyana, milyani, hamohocwalo ni kuleka lika zeñwi za kuitusisa kwa kukenisa, kulukisa, ni kuyaha sinca. Halunyakisiseñi mitala isikai ya musebezi olupetile.

 Butuku Bwa COVID-19. Mwa lifasi kaufela, butuku bobuyambukela bo, buamile mizwale ni likaizeli baluna kwa mubili, mwa maikuto, mane ni kutahisa butata bwa masheleñi. Kuli bakone kutusiwa, Tutengo Totutusa Babatezwi ki Likozi (DRC) totufitelela 800 netutomilwe mwa lifasi kaufela. Mizwale ba mwa tutengo to nebanyakisisize butokwi bone banani bona mizwale ni likaizeli baluna, mi kapili-pili baluma lipiho zenetusize ba mwa Katengo ka Baswalisanisi kuziba hande mone bakona kufela tuso.

 Mwahalaa silimo kaufela, ba Tutengo Totutusa Babatezwi ki Likozi batusize batu babañata kufumana lico, mezi, lika zetusa kubuluka makete, ni milyani. Mwa linaha zeñwi, ba mwa tutengo twa DRC hape nebaswalisani ni baana-bahulu mwa liputeho za mwa naha kutusa mizwale kufumana tuso kwa muuso.

 Batu babasi Lipaki za Jehova balemuhanga musebezi waluna wa kutusa batu babawezwi ki likozi. Ka mutala, mubusisi wa mwa sikiliti sa Nakonde, mwa Zambia yabizwa Field Simwinga, naataluselize mizwale baluna kuli: “Luitebuha hahulu musebezi omueza wa kutusa mabasi aziyelehile ka kubafa lika zebatokwa ka nako yeswanela.”

 Kutaela Kwa Lico Mwa Angola. Bakeñisa butuku bobuyambukela bwa COVID-19, lico nelitaezi mwa Angola mi zatula hahulu. Buñata bwa mizwale ni likaizeli baluna nebafumana hahulu taata kuleka lico.

 Mutai wa Brazil neukupilwe kulumela mizwale baluna ba mwa Angola lico. Kuli luitusise hande linubu, mizwale nebaezize lipatisiso ka za nzila yende ya kuleka lico ka buñata ni kuliluma. Kabakaleo, kuleka ni kuluma saka ni saka ya lico ka avareji neli feela K396 kono neieza likilo zebato eza 20, mi mwateñi nekunani lico zecwale ka laisi, manawa, ni saladi. Kuzwa nako yeo kuto fita kacenu, palo kaufela ya masaka a lico anaalumilwe neli 33,544, ili anaaeza likilo ze 654,080. Halikopanywa ni lico zenelekilwe mwa naha kone lilumezwi, lico zeo kaufela nelitusize batu babafitelela 50,000!

 Mizwale baluna baikutwa cwañi ka za lituso zene bafilwe? Muzwale yabizwa Alexandre, yapila kwa sibaka sa mwa matakanyani kwa Angola, utalusa kuli: “Bo luli ki bupaki bobubonisa kuli Jehova wanilata mi haniyo ninosi. Ni wa butokwa mwa kopano ya Jehova!” Kaizeli yabizwa Mariza, me yali likwasha, utalusa kuli: “Jehova ualabile tapelo yaka. Niitumela hahulu ku yena ni kwa kopano yahae!”

 Kutusa Babawezwi ki Kozi ya Linanga Mwa Zimbabwe. Mwa silimo sa sebelezo sa 2020, mwa Zimbabwe nekunani linanga lelituna, mi batu babañata-ñata nebashwa tala. Lipaki za Jehova babañata babapila mwa naha ya Zimbabwe nebasina lico zelikani.

 Tutengo Totutusa Babatezwi ki Likozi totuketalizoho netutomilwe ilikuli tutuse mizwale ni likaizeli baluna kuba ni lico. Bahasanyi babañata-ñata nebaitatezi kukubukanya ni kulonga lico, mi babañwi nebafanile limota zabona kuli lituse mwa musebezi wo. c Mwa silimo sa sebelezo sa 2020, masheleñi afita fa K12,448,098 naaitusisizwe kufumanela lico batu babafitelela 22,700!

 Mwa miinelo yemiñwi, lituso halito fitanga, mizwale nese bafelize kale lico zene basiyalezwi ki zona. Mizwale ni likaizeli baluna hane batiselizwe lico, balumbeka Jehova. Babañwi mane bakala kuopela lipina za Mubuso.

 Mwa sibaka sesiñwi, Lipaki za Jehova bababeli babali limbelwa nebaile kwa mukopano wa mwa silalanda, one ulukiselizwe kuikambota ka za tuso ya lico yene bakafiwa ki kopano yeñwi yesi ya muuso (NGO). Nihakulicwalo, mwa mukopano wo batu bakala kuambola hahulu za lipolitiki; kacwalo, likaizeli baluna baikatulela kuli nebasike baeza lika zenetokwiwa kuli bafumane tuso kwa kopano yeo. Hane bazwa mwa mukopano wo, batu bakala kubasheununa mi bababulelela kuli: “Musike mwataha ku luna kuto lukupa lico!” Niteñi, hamulaho feela wa lisunda zepeli kuzwa fo, mizwale baluna bapunya mwa sibaka seo ni kufa likaizeli zaluna lico—mane pili lituso za kopano ya NGO lisika punya kale!

 Hape musebezi wa kutusa babawezwi ki kozi utusize kuli taba yende ikutazwe mwa Zimbabwe. Ka mutala, halunyakisiseñi zanaakopani ni zona kaizeli yabizwa Prisca, yapila mwa munzi omuñwi omunyinyani. Kusina taba kuli bupilo nebutatafezi kabakala kuli nekunani linanga, bo Prisca nebaikatulezi kuli la Bulaalu ni la Bufaifi sunda ni sunda, nebaka yanga mwa bukombwa, mane nihaiba ka nako ya kukekela. Batu bane bapila mwa hae yabona neba basheununanga, ka kubulela kuli: “Mukalapisa lubasi lwamina kabakala kukutaza kwamina.” Bo Prisca nebaalabanga kuli: “Jehova kamita watusanga batanga bahae.” Kusika fita nako yetelele kuzwa fo, bo Prisca baamuhela lituso zezwa kwa kopano yaluna. Taba ye yakomokisa hahulu batu bane bapila bukaufi ni bo Prisca, mi babataluseza kuli: “Mulimu haasika milibala; kacwalo, lubata kuituta zeñata ka za hae.” Batu ba 7 babapila bukaufi ni kaizeli waluna cwale sebateelezanga kwa mikopano yaluna fa wayalesi.

 Halunze lusutelela hahulu kwa nako ya kufela kwa lifasi le, lukazwelapili kukopana ni likozi za ka taho. (Mateu 24:3, 7) Luitebuha hahulu linubu zemufanga ka kuitusisa linzila zeshutana-shutana zefumaneha fa donate.pr418.com. Liitusiswa kwa kutusa babawezwi ki kozi ka kubafa tuso yebatokwa ka nako yeswanela.