La March 2020, ba katengo ka World Health Organization hane bazibisize kuli butuku bwa COVID-19 ki butuku bobuyambukela, batu babañata nebasika libelela kuli butuku bo, nebuka zwelapili kubateñi hamulaho wa silimo kuzwa fo. Batu babañata-ñata, kukopanyeleza cwalo ni Lipaki za Jehova babañwi bakulile, kulembwala, mane ni kuipumana mwa butata bwa kutokwa hande masheleñi kabakala butuku bobuyambukela bo. Lipaki za Jehova baonga-ongile cwañi ni kufa lituso ka nako ye ya butuku bobuyambukela?

 Ka ketelelo ya Katengo ka Baswalisanisi ka Sitopa Sesietelela sa Lipaki za Jehova, kutomilwe Tutengo Totutalima Babatahezwi ki Likozi totufitelela 950 mwa lifasi kaufela kabakala butuku bwa COVID-19. Mwa libaka zeñwi, mizwale ni likaizeli babali mwa butokwi bafumananga tuso kwa mizwale ba mwa libaka zebapila ku zona, kono mwa libaka zeñwi mona, Lipaki bafumana tuso kwa muuso. Ba Tutengo Totutalima Babatahezwi ki Likozi ni bona hape balukisize kuli mizwale ni likaizeli babatokwile ba mwa linaha zeñata batusiwe.

 Ka mutala, halunyakisiseñi zeneezahezi kwa naha ya Paraguay. Mutende omuñwi neubihile kuli bakeñisa butuku bobuyambukela bo, batu habana masheleñi, mi “batu babañata babapila kwa Paraguay balobala ni tala.” Kono ba Tutengo Totutalima Babatahezwi ki Likozi nebakalile kale kufa mizwale baluna mikotana mokunani lika zekona kuitusiswa ka lisunda zepeli, ili zekona kukwana lubasi lwa batu babane. Mwa mikotana yeo nekubeilwe lico, lika za kuitusisa kwa kukenisa, ni lika zene batusa kuba ni buikangulo bobunde kwa mubili. Mukotana ni mukotana neunani lika zeleka masheleñi abato eza K570.

 Baitateli babatusanga ka nako ya likozi baisilelezanga cwañi ni kusileleza babañwi kuli basike bayambula butuku bwa COVID-19? Batinanga limasiki ni kusaba bukaufi ni batu babañwi. Hape babonanga teñi kuli likampani kobalekanga lico lilukisezanga lico zeo mwa libaka zekenile mi zalatelela litaelo ka za mwakuisileleleza kwa butuku bo. Taba yeo ikopanyeleza kubona teñi kuli batu kaufela babalonga lico zeo mwa mikotana batinile liitusiso zeswanela zebasileleza, limota zabona likenile mi lifaezwi mulyani, mi babeya mikotana yeo fa libaka zefaezwi mulyani. Hape babonanga teñi kuli mutu kaufela yaisa lico zeo kwa mizwale ni likaizeli baluna hayemi bukaufi ni mizwale babaamuhela lico zeo.

 Hakuto fitwanga mwa kweli ya January 2021, ba Katengo ka Baswalisanisi ka Sitopa Sesietelela nebalumelelize kuli masheleñi afitelela K525,000,000 aitusiswe kwa kutusa batu babaziyelehile kabakala butuku bwa COVID-19. Mitai ni ba Tutengo Totutalima Babatahezwi ki Likozi baitusisanga hande linubu zeo mi baezanga mobakonela kaufela kuleka lika zetokwahala fa teko yende. Ka mutala, kwa naha ya Chile, mizwale babaonga-onga musebezi wa kutusa babawezwi ki likozi nebabata kuleka mufuta omuñwi wa manawa a likilo ze 750. Kono mwa kweli iliñwi feela, teko ya manawa ao yaekeza hahulu luli kuli mane neiminahanyize habeli teko ya makalelo! Hamulaho wa lihora zepeli kuzwa mizwale baluna fobalumelelana ni mulekisi wa manawa kuli nebaka leka manawa ao fa teko yetula yeo, mulekisi yo abataluseza kuli kunani muleki yomuñwi yanaa muzibisize kuli naasike aleka manawa anaaswanela kuleka. Kacwalo, mwa sibaka sa kuleka manawa ao fa teko yetula yene balumelelani, mulekisi yo alekisa mizwale baluna manawa anaakutisizwe ao fa teko yecipile ya kweli yenefelile!

 Kono mizwale baluna hane baile kuyo nga manawa ao, mulekisi yo acinca munahano wahae, mi atameleza mizwale baluna kuli nebasa abeli hande lico, sina mone liezeza likopano zeñwi. Muzwale yomuñwi hasaalapezi tapelo yekuswani mwa pilu, ataluseza mulekisi kuli mwa puteho ni puteho nekuezizwe lipatisiso kuli bazibe batu luli bane bali mwa butokwi. Mizwale hape bamutaluseza kuli bakeñisa kuli batu babafiwa lituso banani lisimuluho zeshutana-shutana, mwa mukotana ni mukotana kulongiwanga lika zekona kutusa hande lubasi ni lubasi. Mi bataluseza mulekisi kuli linubu kaufela zefiwanga kwa Lipaki za Jehova ni misebezi yebaezanga ki za kuitatela. Mulekisi yo naatabisizwe hahulu ki taba yeo. Naasika lumela feela kubalekisa manawa ao fa teko yecipile, kono hape fa musipili one utatami, afa mizwale baluna nubu ya manawa a likilo ze 400.

 Bo Lusu ki limbelwa ba basupali babapila kwa Liberia, mi bapila mwa lubasi lwa batu ba 6. Zazi leliñwi hane banze baca sico sa kakusasana, hamulaho wa kunyakisisa liñolo la zazi, muikulyaa bona wamushimani wa lilimo ze 7, naalemuhile kuli nebafelezwi ki lico mwa ndu. Abuza kuli: “Cwale lukacañi?” Bo Lusu bamutaluseza kuli nebalapezi kale ku Jehova kuli abatuse, mi nebanani buikolwiso bwa kuli naaka bafumanela lico. Fa lizazi leliswana leo musihali, baana-bahulu ba mwa puteho yabona balizeza bo Lusu ni kubataluseza kuli baye bayo nga lico. Bo Lusu batalusa kuli: “Muikulyange ubulelanga kuli cwale saziba kuli Jehova wautwanga ni kualaba litapelo kakuli Jehova naaalabile tapelo yaka.”

 Musali yomuñwi wa kwa naha ya Democratic Republic of Congo upila mabapa ni lubasi lwa Lipaki za Jehova. Musali yo hanaaboni lubasi lo haluamuhela lico kwa mizwale babona, abulela kuli: “Butuku bobuyambukela bo habuka fela, ni luna lukaba Lipaki za Jehova bakeñisa kuli bazwezipili kubabalela mizwale ni likaizeli babona ka nako yetaata ye.” Bo muunaa bona bababuza kuli: “Kona kuli mubata kuba yomuñwi wa Lipaki za Jehova kabakala saka iliñwi ya laisi?” Musali yo abaalaba kuli: “Batili, kono saka ya laisi yale ibonisa kuli banani lilato la niti.”

 Lipaki za Jehova bakonile kutusa kapili mizwale ni likaizeli baluna babatokwa tuso ka nako ye ya butuku bobuyambukela kabakala linubu zamina zeñata zemufanga. Lwaitumela luli kwa linubu zemusweli kufa ka kuitusisa linzila zefumaneha fa donate.pr418.com.