Kwa Latin America kunani batu babañata-ñata bababulela lipuo zeshutana-shutana ni babanani lizo zeshutana-shutana. Mwahalaa batu bao, kunani mizwale ni likaizeli baluna ba kwa moya babañata, ili babalata lizo zabona. Mizwale ni likaizeli bao batolokanga ni kuhasanya lihatiso za Lipaki za Jehova mwa lipuo zefitelela 130 za kwa Latin America ilikuli batuse batu kuituta niti ya mwa Bibele. a Nihakulicwalo, babañwi ku bona nebalwanisizwe bakeñisa kusebeleza Jehova ni kuhana kuikenya mwa lizo zesi za ka Mañolo zebalatelela batu babañata mwa libaka zebapila ku zona. Linubu zemufanga libatusize cwañi?

 Kwa Mexico, mizwale ni likaizeli baluna ba Mahuichol, babapila mwa sibaka sa malundu sesibizwa Jalisco State, ka likute nebahanile kueza lika zeñwi za bulapeli zene baikutwa kuli nelisa lumelelani ni likuka za mwa Bibele. b Taba yeo neinyemisize hahulu batu babañwi mwa sibaka sene bapila ku sona. La December 4, 2017, sikwata sa batu bane babifile salwanisa Lipaki za Jehova ni batu babañwi bane bali ni bona. Sikwata seo sabaleleka mwa silalanda sabona, sasinya maluo abona, mi safumba kuli nesika bulaya mutu ufi kamba ufi yanaaka kutela mwa sibaka seo.

 Lipaki za Jehova bane bapila mwa litolopo zeneli bukaufi batusa mizwale ni likaizeli baluna kufumana lika zene batokwa. Niteñi, mizwale ni likaizeli bao nebasa zibi za kueza kuli bakutele habo bona. Muzwale yomuñwi yabizwa Agustín utalusa kuli: “Nelusina masheleñi a kulifa caziba wa mulao kuli alutuse kuzeka taba ye, mi nelusa zibi mutu yanaakona kulufa ketelelo ya ka mulao mwa taba ye.”

 Bakeñisa kuli mizwale baluna nebalwaniswa mi nebasina tukuluho ya kulapela, ofisi ya mutai wa Central America yaanga muhato kapili-pili. Pili, nebakupile makwambuyu ba muuso ba mwa sibaka seo kubatisisa ka za likezo zemaswe zeo. Hasamulaho, bafiwa tumelezo ki ba Katengo ka Baswalisanisi ka Sitopa Sesietelela sa Lipaki za Jehova kuli basebelisane ni ba Liluko Lelitalima za Mulao leli kwa ofisi yetuna yezamaisa musebezi waluna mwa lifasi kaufela, kuisa taba yeo kwa kuta ilikuli batuse mizwale ni likaizeli baluna ba Mahuichol. Hamulaho wa nako, taba yeo yayo talimwa mwa Kuta Yetuna ya mwa naha ya Mexico.

 Licaziba za mulao bane bazwa mwa linaha zeshutana-shutana nebazekile hande taba ye ka kubulela kuli sina feela batu babañwi habaswanela kukuteka lizo za bana ba naha, bana ba naha ni bona baswanela kulemuha tukuluho yanani yona mañi ni mañi mwahalaa bona ya kueza lika mi hakuna yaswanela kupaleliswa yomuñwi kuikola tukuluho yeo. Nebatalusize kuli mutu ni mutu unani liswanelo zahae kusina taba ni kwapila.

 La July 8, 2020, baatuli ba Kuta Yetuna kaufelaa bona bayemela Lipaki za Jehova. Balaela kuli batu kaufela bane balelekilwe mwa sibaka sene bapila ku sona bakutele habo bona. Bo Agustín, bababulezwi kwamulaho batalusa mo bona ni babañwi nebaitebuhezi tuso yene bafilwe, bali: “Lwaitumela luli mi lutabile hahulu kabakala zeba luezelize mizwale baluna. Ka ili luna feela, nelusike lwakona kutatulula butata bone luli ku bona.”

 Mizwale ni likaizeli baluna babapila mwa munzi wa San Juan de Ilumán ofumaneha mwa muleneñi wa Otavalo Valley kwa Ecuador, ili mokupila batu babañata ba mwa sibaka seo, ni bona balwaniswa ka nzila yeswana. Ka silimo sa 2014, nebakalile kuyaha Ndu ya Mubuso hamulaho wa kufiwa tumelezo. Nihakulicwalo, muprisita yomuñwi hamoho ni sikwata sa batu babafitelela 100 aatumela mizwale baluna ni kubatuhelisa kuyaha. Hasamulaho, batu mwa sibaka seo balaela Lipaki za Jehova kutuhela kukopana hamoho kuli balapele Mulimu.

 Liluko Lelitalima za Mulao la kwa mutai wa Ecuador lasebelisana hamoho ni liluko leli kwa ofisi yetuna yezamaisa musebezi waluna mwa lifasi kaufela kuyemela litukelo za mizwale ni likaizeli baluna kuli basike bapaleliswa kuba ni tukuluho ya kulapela. Mizwale baluna baisa taba yeo kwa kuta. Batu ba mwa sibaka seo hane balemuhile cwalo, batuhela kulwanisa mizwale baluna, mi babalumeleza kukalisa kukopana hamoho ni kufeleleza kuyaha Ndu ya Mubuso. Kono licaziba za mulao bane bayemela mizwale baluna bakupa likuta zeñwi zetuna kutatulula taba yeneka tusa kuli kwapili litukelo za mizwale baluna likutekiwe ka kubuza kuli: Kana bayahi ba naha baswanela kukuteka litukelo zebanani zona batu mwa lifasi kaufela?

 La July 16, 2020, Kuta Yetuna ya Naha ya Ecuador yatalima taba yeo. Mizwale babali licaziba za mulao kwa Ecuador bayemela mizwale ni likaizeli ba mwa sibaka seo. Kuzwa fo, mizwale baluna babane babali licaziba za mulao babazwa mwa linaha lisili, ili base baezize musebezi wo ka nako yetelele nebaambozi kwa kuta. Bakeñisa butuku bobuyambukela bwa COVID-19, mizwale bao nebaambozi ka kuitusisa liprogilamu zekonahalisa kuli batu babonane inze bali mwa linaha zahabo bona. Lo ki lona lwapili kuta hailumeleza sikwata sesiyemela Lipaki za Jehova mwa lifasi kaufela kuzeka taba ka nzila ye. c Sikwata seo nesitalusize zene babulezi licaziba za mulao mwa linaha zeshutana-shutana kubonisa kuli bana ba naha habaswaneli kufulalela litukelo zabona bakeñisa sibaka sebapila ku sona.

 Mizwale ni likaizeli baluna babapila mwa muleneñi wa Otavalo Valley banyolezwi kuziba katulo yekafiwa ki Kuta Yetuna. Mi baitebuha hahulu tuso yebafilwe ki mizwale babona. Muzwale yabizwa César, yali muuna-muhulu mwa Puteho ya Ilumán Quichua, utalusa kuli: “Jehova ki yena feela yakona kuezeza batu basikai lika zetuna ka kuitusisa kopano yahae.”

 Licaziba za mulao babatusa kutalima taba ye kaufelaa bona ki Lipaki za Jehova, mi baitatela kuitusisa zibo yabona kuli batuse mizwale babona kusina kulifiwa sesiñwi. Nihakulicwalo, kuisa litaba ze kwa kuta, kuitukiseza mizeko, ni kuzeka mwa kuta ki musebezi otokwa nako ni masheleñi. Mizwale baluna babali licaziba za mulao ni mizwale babañwi nebatandile lihora zefitelela 380 kuitukiseza mizeko, ni lihora zeñwi ze 240 kutoloka litaba mwa muzeko wa kwa Mexico. Ibato ba licaziba za mulao ba 40 babazwa mwa linaha zeshutana-shutana nebatandile lihora zeñata-ñata kutusa mwa taba ya kwa Ecuador. Lukonile cwañi kulifela lisinyehelo zeamiwa mwa musebezi wa kuyemela litukelo za mizwale baluna mwa kuta? Linubu zemufanga ka kuitusisa linzila zeshutana-shutana zebonisizwe kwa donate.pr418.com ki zona zelutusize kueza cwalo. Lwaitumela luli kwa bufani bwamina.