Buñata bwa batoloki ba lihatiso zaluna basebeleza fa liofisi za toloko (RTO) isiñi fa liofisi za mutai. Ki kabakalañi taba ye haili yetusa? Ki liitusiso zecwañi zebatokwa batoloki kuli basebeze hande fa RTO? Sibaka sebasebeleza ku sona batoloki sibatusanga cwañi mwa musebezi wabona?

 Kuba ni RTO kutusa batoloki kusebeleza kwa sibaka koibulelwa hahulu puo yebatoloka. Kaizeli yabizwa Karin, yatoloka mwa puo ya Low German, utalusa kuli: “Kuzwa feela folututela kwa RTO ya kwa Cuauhtémoc, mwa Chihuahua, kwa Mexico, luitusisanga feela puo ya Low German haluikambota ni batoloki babañwi, haluli mwa bukombwa, ni haluyo leka lika. Lupila mwahalaa batu bababulela puo yaluna. Batu baitusisanga linguli zende zese luutwile kale, mi lusweli lwaituta manzwi amanca aitusiswa mwa puo.”

 Bo James, baba mwa sikwata sesitoloka mwa puo ya Sifrafra kwa Ghana, batalusa kuli fokuñwi batondanga siango sene babanga ni sona ni mizwale ni likaizeli ba fa Betele. Kono hape nebaize: “Nalata kusebeleza fa RTO. Nibanga ni tabo yetuna hanikutaza mwa puo yahesu ni kubona mo batu baitebuhela taba yende.”

 Mizwale banyakisisangañi habalukisa za koiswanela kubela RTO? Muzwale yabizwa Joseph, yaswalisana ni Liluko Lelitalima za Kuyaha Mwa Lifasi Kaufela, lelifumaneha kwa Warwick, mwa New York kwa America, utalusa kuli: “Butata bobuñwi bolukopananga ni bona ki bwa kuli mwa libaka zeñwi fokuñwi hakubangi ni malaiti, mezi kamba Intaneti yetusa kuli batoloki bakone kulumelwa musebezi oswanela kutolokiwa. Kacwalo, halulukisa za koiswanela kubela RTO, lunyakisisanga libaka zeshutana-shutana mwa libaka moibulelwa puo yeo.”

 Hañata, mizwale bakonanga kuyaha kapili RTO mi habasinyehelwangi hahulu haiba bayahela fa mubu oswana fokuyahezwi Sibaka sa Mikopano, Ndu ya Mubuso, kamba ndu ya balumiwa, mi batoloki bazwanga kwa mandu kuyo eza misebezi yabona fa RTO. Haiba miyaho yecwalo haiyo, kopano ifanga tumelezo ya kuli kulekiwe mandu ni miyaho yemiñwi mobakona kuina ni kusebeleza batoloki. Haiba miinelo ya batoloki icinca, miyaho yeo ikona kulekiswa ka bunolo mi masheleñi akona kuitusiswa kwa lika zeñwi za butokwa.

 Mwa silimo sa sebelezo sa 2020, neluitusisize masheleñi afita fa K234,000,000 kulifela lisinyehelo zenebile teñi fa ma RTO. Mizwale ni likaizeli babasebeleza fa ma RTO batokwa likompyuta, maprogilamu a fa kompyuta abatusa mwa musebezi wabona, lisebeliso za kuitusisa kwa kulekoda litaba, Intaneti, ni lika zecwale ka mezi ni malaiti. Lika kaufela za likompyuta zatokwanga mutoloki ni mutoloki likona kuleka masheleñi afita fa K15,750. Fa likompyuta, kubeiwanga maprogilamu a kuleka ni progilamu yebizwa Watchtower Translation System, ili yetusa batoloki kuonga-onga hande musebezi wabona ni kufumana kapili litaba zebatokwa mwa musebezi wabona.

 Fa RTO, batoloki hape bafiwanga lisebeliso za kuitusisa kwa kulekoda. Lisebeliso zeo nelitusize luli kakuli butuku bobuyambukela bwa COVID-19 habukalisa, batoloki babañata nebaisize lika zeo kwa mandu abona, mi nebazwezipili kulekoda litaba zetolokilwe ni mavidio.

 Baitateli babapila bukaufi ni RTO hañata batusanga mwa musebezi wa kutatuba lihatiso zetolokilwe ni kueza misebezi ya kubabalela sibaka. Muzwale yabizwa Cirstin yasebeleza fa RTO ya Siafrikans yefumaneha mwa Cape Town, kwa South Africa, utalusa kuli: “Bahasanyi babañata ni mapaina ba kamita batahanga kwanu kuto tusa mwa misebezi.”

 Baitateli bao baitebuha tohonolo ya kutusa mwa misebezi yecwalo. Kaizeli yomuñwi yatusanga mwa misebezi ya fa RTO utalusa kuli kueza cwalo kumutahisezanga “tabo yetuna.” Mizwale ni likaizeli babañwi ba mwa silalanda bakupiwanga kuya fa RTO kuli bayo lekodiwa. Kaizeli yabizwa Juana, yatoloka mwa puo ya Sitotonac mwa sibaka sesibizwa Veracruz, kwa Mexico, utalusa kuli: “Bakeñisa kuli cwale seluli bukaufi ni batu bababulela puo yaluna, sekuli bunolo kufumana mizwale ni likaizeli ba kuto tusa kubala lihatiso ni kulukisa mavidio aluna.”

 Kono kana kuba ni ma RTO kutusize kubolosola musebezi wa batoloki? Batu babañata-ñata bababalanga lihatiso zaluna baikutwa cwalo luli. Muzwale yabizwa Cédric, yaswalisana ni sikwata sesitoloka mwa puo ya Sikongo kwa Democratic Republic of Congo, utalusa kuli: “Mizwale ni likaizeli babañwi nebatalusanga kuli Sikongo sene luitusisanga halutoloka neli ‘Sikongo sa mwa lihatiso za Watch Tower,’ kakuli manzwi ane luitusisanga mwa lihatiso haki ona ane baitusisa batu mwa lingambolo zabona za ka zazi ni zazi. Kono cwale babulelanga kuli lihatiso zaluna litolokilwe mwa Sikongo sa miteñi ye, mi manzwi aitusiswanga ki ona abaitusisanga batu habaambola zazi ni zazi.”

 Muzwale yabizwa Andile, yaswalisana ni sikwata sesitoloka mwa puo ya Sikosa, ni yena naalemuhile nto yeswana kwa South Africa. Utalusa kuli: “Batu babañata balutalusezanga kuli balemuhile kuli mutolokelo waluna ucincize. Mane nihaiba banana bane babalanga magazini ya Tawala ya Mulibeleli mwa Sikuwa cwale seba ibalanga mwa Sikosa. Sihulu baikolanga kubala Bibele ya Toloko ya Lifasi Lelinca yebolosozwi sinca kakuli itolokilwe ka kuitusisa puo yebabulela batu zazi ni zazi.”

 Lisinyehelo kaufela zeama kuyaha ma RTO, kuababalela, ni kulukisa kuli kube ni babeleki fateñi lilifelwanga ka linubu za musebezi wa mwa lifasi kaufela, kukopanyeleza cwalo ni linubu zefiwanga ka kuitusisa donate.pr418.com.