Lipina ki mpo yende yezwa ku Jehova. Zakona kucinca moluikutwela mane ni kulususueza. Kusina kukakanya, lipina zaluna zelusa opelangi kwa Ndu ya Mubuso likona kulutusa ka nzila yeswana. Mane sa butokwa nikufita kikuli, lipina zeo likona kulutusa kusutelela ku Jehova.

 Kuzwa feela ka 2014, kulukisizwe lipina zecwalo zefitelela 70, mi ka nako ya cwale, lipina za mufuta wo selifumaneha mwa lipuo zefitelela 500! Kono mwendi mukile mwaipuza kuli: ‘Ki bo mañi babaopelanga lipina ze, mi lilukiswanga cwañi?’

 Lipina zaluna zelusa opelangi kwa Ndu ya Mubuso lilukiswanga ki sikwata sa mizwale ni likaizeli babalukisanga lipina mwa Liluko Lelitalima za Lipina ni Mavidio, ili babasebeza mwatasaa ketelelo ya Katengo ka Tuto ka Sitopa Sesietelela. Mwa sikwata sesilukisanga lipina seo kufumaneha mizwale ni likaizeli ba 13 babatusanga kuñola lipina, kuunga mulumo ni kubabalela lisebeliso za mulumo, kulukisa tomahanyo, ni kueza misebezi yemiñwi ya butokwa. Kutuha fo, ba Katengo ka Tuto balumelelize kuli baitateli mwa lifasi kaufela babacwale ka bañoli ba lipina, balizi, ni baopeli batuse mwa musebezi wo. Mizwale ni likaizeli babaikokobeza bao baitusisanga buikoneli bwabona kuli batuse mwa musebezi mi hababatangi kufiwa tumbo kabakala musebezi wabona.

 Lipina zaluna zelusa opelangi kwa Ndu ya Mubuso lilukiswanga cwañi? Pili, ba Katengo ka Tuto baketanga liñolo foika toma pina ni kunyakisisa mobaka ikutwela bateelezi habaka iutwa. Hasamulaho, sikwata sesilukisanga lipina siñolanga pina ni kulukisa manzwi. Pina yeo yarekodiwanga. Kihona cwale ba Katengo ka Tuto baka iteeleza ni kufa liakalezo zabona. Hasamulaho, sikwata sesilukisanga lipina cwale saibolosolanga ni kuirekoda sinca, mi ibanga yona pina yeitusiswanga. Lipina ze lirekodiwanga mwa libaka zeshutana-shutana, kukopanyeleza cwalo ni kwa liofisi za mutai ni mwa mandu a batu mokunani liitusiso za kurekoda ka zona.

 Mizwale baluna baitusisanga liprogilamu za fa kompyuta zeshutana-shutana kuli bañole lipina zaluna zelusa opelangi kwa Ndu ya Mubuso ni kulirekoda. Hape baitusisanga lika zecwale ka liliziso za lipina, liprogilamu zetusa kukopanya manzwi, lipangaliko zetusa kuhulisa mulumo, masipika, ni limaikrofoni. Yeñwi ni yeñwi ya limaikrofoni zeo ikona kuleka masheleñi akalela mwa K1,720 kuisa K17,200. Mwa silimo sa 2020, neluitusisize masheleñi afita fa K2,088,000 kwa kuleka lika za kuitusisa kwa kurekoda lipina.

 Ki buikatazo mañi bobueziwanga kuli linubu liitusiswe hande? Mwa sibaka sa kuba ni sikwata sesituna sa batu babalukisa lipina fa Betele, kuitusiswanga baitateli babañata babapila mwa libaka zeshutana-shutana. Kutuha fo, kufita kuba ni sikwata sesituna sa baopeli mwa sibaka sesiswana ni kulukisa kuli sirekodiwe, mizwale hañata bañolanga lipina ni kulirekoda ka kuitusisa progilamu ya fa kompyuta yekona kuliza milumo ya liliziso za lipina zeshutana-shutana.

 Mizwale ni likaizeli baikolanga kuteeleza kwa lipina zaluna zelusa opelangi kwa Ndu ya Mubuso. Kaizeli yabizwa Tara, yapila kwa Germany, utalusa kuli: “Lipina ze liniwisanga pilu hanibilaezwa ki nto yeñwi. Hani liteelezanga mwa puo yaka, niikutwanga inge yakumbatiwa ki Jehova.” Muzwale wa kwa Kazakhstan wa libizo la Dmitry utalusa kuli: “Niikolanga kuteeleza kwa lipina ze mi hanitokwangi kuikalelwa kuli lika nisusueza kueza lika zemaswe sina feela moliinezi lipina za lifasi. Kutuha fo, lipina ze linitusanga kuisa pilu kwa lika zetiisa silikani saka ni Jehova.”

 Kaizeli wa libizo la Delia, yapila kwa South Africa, utalusa mwaikutwela ka za lipina zaluna zelusa opelangi kwa Ndu ya Mubuso, uli: “Lipina ze litiisanga tumelo yaka. Hanizwafile kamba hanikopana ni muinelo omuñwi otaata, kamita nifumananga pina yenitiisanga yetalusa hande muinelo oswana ni onikopana ni ona. Hañata, mulilelo feela wa pina unitusanga kucinca moniikutwela!”

 Mizwale ni likaizeli babañata banani lipina zebalata hahulu. Kaizeli yabizwa Lerato, yapila kwa South Africa, ni yena utalusa kuli: “Lipina zecwale ka ‘Lifakaufi Luli’ ni ‘Lifasi Lelinca’ linitusanga kunyolelwa nako yenika amuhela bo ma habaka zusiwa kwa bafu. Nako kaufela haniteeleza kwa lipina zeo, nababonanga mwa munahano inze banimatela kuto nikumbata.”

 Pina yeñwi neitusize hahulu kaizeli yomuñwi wa kwa Sri Lanka yasali yomunca. Utalusa kuli: “Bo muluti baluna ba sayansi neba niomanyize maswe fapilaa bonikena ni bona mwa kilasi kabakala kuba yomuñwi wa Lipaki za Jehova. Naikalelwa hahulu, mi nenisa zibi za kubulela. Hanikuta kwa ndu, bo ma banisusueza kuteeleza kwa pina yenani toho ya taba yeli, ‘Study Makes You Strong.’ Pina yeo nei nitusize kulemuha kuli nenitokwa kueza lipatisiso ni kuitukiseza mone nikaalabela. Habusa, naambola ni bo muluti. Bateeleza mi banitaluseza kuli neni batusize kuutwisisa hande litaba zebalumela Lipaki za Jehova. Naitumela kwa kopano ya Jehova kabakala kululukiseza lipina zesusueza zecwalo.”

 Lukonanga cwañi kulifela lisinyehelo zebanga teñi hakulukiswa lipina ze? Taba yeo ikonahala ka linubu zefiwanga kuli lituse mwa musebezi wa mwa lifasi kaufela, mi buñata bwa linubu ze lifiwanga ka kuitusisa yeñwi ya linzila zetalusizwe fa donate.pr418.com. Lwaitumela kwa linubu zamina zeñata zemufanga.