Lipaki za Jehova mwa lifasi kaufela nebatabile hahulu kuutwa zibiso ye, yeli: “Ba Sitopa Sesietelela baatuzi kuli kukala sunda ya April 1, liputeho kaufela zakona kukalisa kukopananga hamoho kwa Mandu A Mubuso haiba muuso walumeleza kueza cwalo mwa silalanda.” Zibiso yeo neibeilwe fa jw.org kwa makalelo a March 2022. Kono butuku bobuyambukela bwa COVID-19 nebusa liteñi. a Ki licinceho mañi zenetokwa kueziwa mi ki lika mañi zenetokwa kulekiwa kuli baputehi basike bayambula butuku bo? Kana Mandu A Mubuso naakakona kuitusiswa hape hase kufitile lilimo zepeli asaitusiswi?

 Niti kikuli, mizwale baluna nese baitukiselize ka likweli zeñata kukalisa kuezeza mikopano kwa Mandu A Mubuso.

 Hamulaho feela wa kweli iliñwi kuzwa folutuhelela kukopana hamoho mwa 2020, ba Liluko Lelitalima za Kuyaha Mwa Lifasi Kaufela (WDC), mwa Warwick, kwa New York, bakala kunyakisisa mo butuku bwa COVID-19 nebuka amela moluitusiseza Mandu A Mubuso aluna ni mihato yenetokwa kuungiwa kuli batu basilelezwe habali kwa libaka zaluna za kukopanela.

 Zenetokwahala mwa sibaka sesiñwi sa lifasi hañata nelishutana ni zenetokwahala mwa sibaka sesiñwi. Muzwale yomuñwi yabizwa Matthew De Sanctis, wa mwa WDC, utalusa kuli: “Mwa linaha zeñwi, nekunani butata bwa kutokwa lika zebakona kuitusisa batu kuli batape kwa mazoho. Haiba hakuna mezi fa Ndu ya Mubuso, mezi atokwa kulekiwa kamba kuyo kiwa mwa nuka ya mwa silalanda kamba mwa lisima. Mwa linaha zeñwi, milonga yemiñwi neiezize licinceho kuamana ni lika zetusa kuli kube ni moya obata mwa muyaho, kuli moya ukene ni kuzwa mwa muyaho, ni ka za lisupo za kuitusisa zeama buikangulo bwa mubili ni makete.”

 Mizwale baluna nebatatuluzi cwañi butata bo? Bo Matthew batalusa kuli mizwale nebalemuhile kuli mwa Mandu A Mubuso amañata, “nekutokwahala feela lika zeleka masheleñi amanyinyani kuli butata bo butatululwe.” Ka mutala, kwa Papua New Guinea, nekulukisizwe libaka za kutapela kwa mazoho kone kubeilwe lihemele za pulasitiki mokukona kubeiwa mezi aeza malita a 20 mi nelinani lipompi. Kacwalo, mizwale baluna nebakona kufumana lika zetokwahala ka kuitusisa feela masheleñi aeza K624 kuli Ndu ya Mubuso ye mwa matakanyani ikone kuba ni lika zeo. Liputeho za mwa Africa zona nelilekezwi lika za kuitusisa kwa kutapa kwa mazoho zetiile zefitelela 6,000 kwa kampani yeñwi ya kwa Asia.

 Licinceho zeñwi zeneezizwe neli kubeya kamba kulukisa lika zetusa kuli kube ni moya obata kamba kuli moya ukene ni kuzwa mwa Ndu ya Mubuso. Liputeho zeñata nelilekile mamaikrofoni anani maswalelo amatelele ilikuli baputehi basike baaswala kono akone feela kuswaliwa ki mutu alimuñwi yazamaisa maikrofoni. Nekuezizwe buikatazo bwa kupukutanga ka mulyani libaka zeswaliwanga hahulu, inge cwalo maswalelo a likwalo ni lipompi, ili lika zekona kutahisa kuli batu bayambule butuku. Liputeho zeñwi nelilukisize kuli mwa limbuzi kube ni lipompi zesatokwi kukwalulwa ka mazoho kuli mezi azwe. Mwa Chile, ka avareji nekuitusiswanga masheleñi aeza K21,840 kuli kubeiwe lika zeo fa Ndu ya Mubuso yeñwi ni yeñwi.

 Kwandaa kubona teñi kuli batu basilelezwa habali kwa Mandu A Mubuso, mizwale baluna hape nebaezanga mone bakonela kaufela kuitusisa hande linubu. Ka mutala, mwa linaha zeñwi, ba muuso nebalukisize kuli mutu wakona kusalifela mutelo lika za kutapela kwa mazoho ni maswalelo amatelele a mamaikrofoni mi mizwale baluna nebaitusisanga tukiso yeo. Liofisi za mutai nelisebelisani hamoho ka kuleka lika ka buñata ilikuli linubu likone kuitusiswa hande. Liofisi za mutai ni ba Liluko Lelitalima za Kuleka Lika fa Mutai Mwa Lifasi Kaufela hañata nebalukisanga kuli lika lilekiwe kwa bapangi bazona luli, mi kueza cwalo nekutusa kuli lika lilekiwe fa teko yende ni kuamuhelwa ka bunako.

 Litukiso zeneezizwe kwa Mandu A Mubuso kuli batu basike bayambula butuku litusize kuli batu basilelezwe ni kuikutwa kuli baiswa pilu habakopana hamoho. Kaizeli yomuñwi yabizwa Dulcine, yapila kwa Peru, uitumelela kuli “naaikalezwi” hanaautwile kuli neluka kalisa kukopana hamoho kwa Ndu ya Mubuso. Utalusa kuli: “Nenikulile butuku bwa COVID-19 habukalisa feela. Kacwalo, nenisika ikutwa kulukuluha ka za kukopana hamoho kwa Ndu ya Mubuso kakuli neninahana kuli nikasuhana nayambula butuku bo hape. Kono hane niile kwa Ndu ya Mubuso, nenilemuhile kuli baana-bahulu nebaezize lika zeñata kuli balusileleze, inge cwalo kulukisa libaka za kutapela kwa mazoho ni kuitusisa mamaikrofoni anani maswalelo amatelele, hape nekuezizwe tukiso ya kukenisanga mwa Ndu ya Mubuso ka milyani yebulaya maikolokuwawa pili mukopano usika kalisa kale ni hamulaho wa mukopano. Lika zeo kaufela neli nitusize kuikutwa kusilelezwa luli.” b

 Kaizeli yomuñwi yabizwa Sara, yapila kwa Zambia, yena naakopani ni butata busili. Utalusa kuli: “Bo muunaaka babulailwe ki butuku bwa COVID-19 likweli zeñata kwamulaho. Nenisa zibi mone nikaikutwela hane nikaya kwa mukopano lwapili ninosi.” Baikutwa cwañi cwale? Batalusa kuli: “Kukopana hamoho kunikolwisize kuli Jehova uinzi ni luna mwa mazazi a mafelelezo a. Ka nako ya cwale, niikutwa kususuezwa, kulatiwa, ni kutusiwa hahulu ki baana-bahulu ni mizwale ni likaizeli kaufela mwa puteho kufita lili kaufela.”

 Mizwale ni likaizeli baluna mwa lifasi kaufela baitebuha tohonolo ya kukopana hamoho hape kwa Mandu A Mubuso. Lwaitumela kwa linubu zamina, mi linubu zeñata kwa linubu zeo nelifilwe ka kuitusisa donate.pr418.com. Linubu ze nelitusize kuli libaka kwa kulapelela Mulimu ka nzila yelukile lilukiswe hande ni kuli batu basilelezwe habakopana hamoho.