Lipaki za Jehova baiyakatwa mizwale ni likaizeli babona luli. (1 Pitrosi 2:17) Buñata bwaluna luikutwa sina mwaikutwela kaizeli yabizwa Tannis yapila kwa Kenya. Kaizeli yo utalusa kuli: “Nitabela hahulu kuziba zeezahala kwa mizwale ni likaizeli baka mwa lifasi kaufela.” Bo Tannis ni Lipaki za Jehova babañwi babañata-ñata bazibanga cwañi zeezahala kwa mizwale babona? Kuzwa feela silimo sa 2013, fa webusaiti yaluna ya jw.org, fa kalulo ya Newsroom nekukalile kufumanehanga litaba zecwalo.

 Fa kalulo ya Newsroom, kufumanehanga litaba za niti ka za Lipaki za Jehova zecwale ka litaba zebulela za kuzwisa Libibele, musebezi wa kutusa batu babawezwi ki likozi, musebezi wa kuyaha, ni litaba zeñwi za butokwa. Kalulo yeo ilutusanga kuziba litaba ka za mizwale ni likaizeli baluna babalengilwe mwa litolongo kabakala tumelo yabona. Hape fa kalulo ya Newsroom, kufumaneha litaba zesusueza za mizwale ni likaizeli baluna bane batusize mwa musebezi oipitezi wa kukutaza ni kumemela batu kwa Kupuzo. Ki bo mañi babaezanga lipatisiso ka za makande a, mi alukiswanga cwañi?

 Ba Liluko Lelitalima za Kuhasanya Litaba Kwa Nyangela ki bona babatalima litaba zefumaneha fa kalulo ya Newsroom. Liluko le, lifumaneha kwa ofisi yetuna yezamaisa musebezi waluna mwa lifasi kaufela mi lietelelwa ki ba Katengo ka Baswalisanisi ka Sitopa Sesietelela. Mwa Liluko Lelitalima za Kuhasanya Litaba Kwa Nyangela kufumaneha mizwale ni likaizeli babafitelela 100, mi buñata bwabona ki baitateli, kukopanyeleza cwalo ni bañoli, babaeza lipatisiso, baswanisi, ni batoloki. Babañwi baambolanga ni makwambuyu ba muuso, licaziba babañwi ni baluti, hamohocwalo ni mitai ya makande. Liluko Lelitalima za Kuhasanya Litaba Kwa Nyangela litusiwa ki liofisi zefitelela 80 zetalima litaba zehasanywa kwa nyangela, ili zefumaneha mwa mitai yeshutana-shutana mwa lifasi kaufela.

 Kuli balukise makande, ba Liluko Lelitalima za Kuhasanya Litaba Kwa Nyangela baswalisananga ni Liofisi Zetalima Litaba Zehasanywa Kwa Nyangela. Mizwale baluna habalemuha kuli taba yeñwi yaswanela kuhasanywa, baezanga lipatisiso ka za teñi ni kufumana litaba za niti ka za taba yeo. Kueza cwalo kukopanyeleza kubuisana ni batu babañwi ni kuambola ni licaziba. Hase baezize lipatisiso ni kufumana niti ka za taba yeo, likande leo lañolwanga, kubolosolwa, kubaliwa, kulukisa maswaniso, ni kulilumela kwa Katengo ka Baswalisanisi kuli balumeleze kuhasanya taba yeo kwa nyangela.

 Mizwale ni likaizeli baluna baikutwa cwañi ka za kalulo ye ya Newsroom? Kaizeli yabizwa Cheryl, yapila kwa Philippines, utalusa kuli: “Hanizuha kakusasana, nto yapili yenitabela kueza ki kubala makande ka za kopano ya Jehova ni batanga bahae.”

 Batu babañata balemuhile kuli makande afumaneha fa webusaiti yaluna ya jw.org fa kalulo ya Newsroom ashutanela kwahule ni makande a lifasi. Kaizeli yabizwa Tatiana, yapila kwa Kazakhstan, utalusa kuli: “Niitebuha hahulu kuli makande a fa jw.org asepeha. Makande ao ki a niti.” Kaizeli yapila kwa Mexico yabizwa Alma utalusa kuli: “Ka kushutana ni likezahalo zemaswe zeluutwanga mwa makande a lifasi, makande afumaneha fa kalulo ya Newsroom ona asusueza.”

 Makande afumaneha fa Newsroom ki a niti mi atiisa tumelo yaluna. Muzwale yabizwa Bernard, yapila kwa Kenya, utalusa kuli: “Litaba zefumaneha fa kalulo ya Newsroom linitusize kuunga mizwale ni likaizeli baka mwa lifasi kaufela sina lubasi lwaka, kusina taba ni kobapila. Hanilapela, napundanga mabizo abona ni miinelo yebakopana ni yona mwa bupilo.” Kaizeli yabizwa Bybron, yapila kwa Kenya, utalusa kuli: “Nitabanga hahulu hanibala taba yebulela za kuzwiswa kwa Bibele mwa puo yeñwi! Litaba zeo linihupulisanga kuli Jehova haana ketululo.”

 Mane nihaiba makande abulela za mizwale baluna babasweli kunyandiswa akona kulususueza. Bo Jackline babapila kwa Kenya, batalusa kuli: “Kunahanisisa bundume bobabonisa mizwale ni likaizeli ba, kutiisize tumelo yaka. Nibatanga kuziba zebatusanga kuitiisa. Nilemuhile kuli lika zebakeshebisa batu zecwale ka kulapela, kubala Bibele, ni kuopela, litusize hahulu mizwale ni likaizeli baluna kuzwelapili kuitiisa.”

 Kaizeli yapila kwa Costa Rica, yabizwa Beatriz uitebuhanga hahulu makande abulela za likezahalo za ka taho. Utalusa kuli: “Makande afumaneha fa kalulo ya Newsroom anitusanga kubona mo kopano yaluna itusezanga mizwale ni likaizeli baluna kufumana lika zebatokwa kapili-pili, ka nzila yende, ni yelilato. Taba yeo initusanga kukolwa kuli ye ki kopano ya Jehova.”

 Kaniti luli, luitebuha hahulu kuba ni litaba zenca ka za mizwale ni likaizeli baluna ba mwa lifasi kaufela! Nto yeo neisike yakonahala kusina linubu zemufanga kuli lituse mwa musebezi wa mwa lifasi kaufela, mi buñata bwa linubu zeo lifiwanga ka kuitusisa donate.pr418.com. Lwaitumela luli kwa bufani bwamina.