Lipaki za Jehova nebanyolwezi hahulu kubuha vidio yapili ya Likande la Bupilo Bwa Jesu silimo se. Batu babañata babuhile vidio ye. Mi ye ki yona vidio yapili kwa mavidio a 18! Ki musebezi mañi obasweli kueza mizwale ni likaizeli kuli balukise mavidio a, mi musweli kutusa cwañi mwa musebezi wo?

 Fa mutai wa Australasia, ili fokusweli kulukisezwa buñata bwa mavidio a Likande la Bupilo Bwa Jesu, ibatoba batu ba 50 kuisa 80 bafumanehanga ka nako yekulukiswa kalulo ni kalulo ya vidio. a Mizwale ni likaizeli balukisezanga batu babalukisa vidio lico za musihali, manzibwani ni lico zeñwi zebunolo. Balelelanga cimo lico zebaka lukisa. Bo Esther bababelekela mwa liluko lelitalima za lico babulela kuli, “Lulekanga lico kwa libaka zeshutana-shutana kuli lukone kufumana lico zende ka teko yende. Lulukisanga lico zeshutana-shutana zelikani ili kuli lusike lwasinya lico.” Zazi ni zazi luitusisanga masheleñi abato eza K105 kulekela mutu alimuñwi lico.

 Kwandaa feela a kufiwa lico, mizwale ni likaizeli babasweli kulukisa drama hape batokwa kusilelezwa. Kusilelezwa kwa nto mañi? Ka linako zeñwi, kwa Australia kwa cisanga hahulu mi hape kunani mufutumala ozwanga kwa lizazi okona kutahiseza batu butata. Mizwale ni likaizeli bababeleka ka taata balukisanga litende ni libaka zebatisa mobakona kupumulela mi babonanga teñi kuli banani mafula asileleza litalo, likuku, ni mezi kuli babasileleze kwa lizazi ni mukatalo. Bo Kevin, babasebeleza mwa liluko la mulumo ni mavidio batalusa kuli: “Buñata bwa mizwale ni likaizeli babasweli kutusa mwa musebezi wo ki baitateli babato tusanga fa Betele. Mi baeza musebezi wo ni yemiñwi yemiñata ka buikokobezo ni tabo. Nelusike lwakona kupeta musebezi wo kokusina tuso yabona”

 Likalulo zeñwi za drama halikoni kubonahala hande haiba liingelwa fa ofisi ya mutai, ibe fa sibaka kobaangelanga mavidio kamba mwa situdiyo. Mwa miinelo yecwalo, balukisi batokwanga kuya kwa libaka za kwahule ni kuyo ngela kwateñi likalulo zeo. Kuli bakone kulukisa mavidio a bonisa libaka za mwa linako zene iñolwa Bibele, hañata mizwale ni likaizeli ba, batokwanga kuya kwa libaka za kwahule hahulu ili kokusina mihala ya malaiti, ni kokusina mikwakwa ni mandu a mwa miteñi ye. Lika kaufela zetokwahala liswanela kulongiwa, ni kuisiwa kwa sibaka kobayo ngela vidio ili kolikayo bulukiwa hande. Pili basika kalisa kale kuunga mavidio, baswalisanisi baba talima za kulukisa mavidio babonanga teñi kuli mishini yetusa kuli kube ni malaiti, mezi amande, ni limbuzi zafumaneha. Balukisi ba drama bafitelanga kwa mandu a mizwale ni likaizeli ba mwa liputeho zeli bukaufi, mi babañwi bona bafitelanga mwa mahotela ni mwa mandu amanyinyani.

 Kuungela mavidio kwa libaka za kwahule kwakona kutula hahulu, kusinya nako yeñata, mi kwakatalisanga mizwale ni likaizeli babasebeleza fa vidio yeo. Kacwalo, mwa silimo sa 2023, ba Sitopa Sesietelela nebafile tumelezo ya kuli kulekiwe mushini omutuna wa teko yefita fa K66,125,000 ili otahisa kuli vidio ibonahale inge kuli neingezwi kwa sibaka sisili kono hailifo neingezwi mwa situdiyo. Mushini wo uitusisanga masikirini abonisa hande maswaniso a mwa vidio ili anani liseli lelituna ilikuli vidio yeo haika fela ibonahale inge kuli neingezwi fande ka nako ya musihali. Kabakaleo, lwakona kukusufaza kwa lisinyehelo zene lukakona kuba ni zona hane lukaangela mavidio mwa libaka zeo luli. Bo Darren, ba mwa katengo ka Mutai wa Australasia, batalusa kuli: “Kuunga vidio ka kuitusisa mushini wo kutusa babapali ba drama kuli basike bakatala mi itusa babaanga vidio kukuta-kutela kuunga likalulo zeñwi za vidio haiba kwatokwahala kueza cwalo. Ka mutala, haiba neluungela vidio fande, nelukaba ni mizuzu feela isikai ya kukopa lizazi pili lisika likela kale. Kono ka kuitusisa mushini wo, lwakona kukuta-kutela kupanga kazazi kakalikela kufitela luikolwisisa kuli siswaniso selupangile ki sona luli.”

 Kutokwahala babapali babañata mane ni babaanga vidio ni vidio ya mwa drama ya Likande la Bupilo Bwa Jesu. Mizwale ni likaizeli babalukisa drama ye, baikutwa cwañi ka za musebezi obasweli kupeta mizwale ni likaizeli wa kubababalela?

 Bo Amber, bane bazamaile likilomita ze 700 kuzwa ku bona kwa Melbourne kuli bayo tusa mwa musebezi wo, batalusa kuli: “Nisafita feela kwa libala la fulai, mizwale ni likaizeli ba fa Betele neba nibabalezi hande. Mizwale ni likaizeli babasebeleza fa Betele neba nimemile kwa sico kamba kuyo nwa ni bona tii. Hane luli kwa sibaka kone kuungelwa mavidio, kaufelaa bona neba nitusize kuikutwa kulukuluha ni kulatiwa. Neniamuhezi limbuyoti zeñata mwa musipili wo. Nenisika ikutwa kuli niezize buitomboli!”

 Bo Derek bababeleka mwa liluko la kupanga mavidio. Batalusa kuli: “Lutusizwe ki batu ba mwa maluko amañata kuzwa feela kwa makalelo a musebezi wo. Naaitumela kwa mizwale ni likaizeli babaitombozi nako, maluwo ni maata abona kuli batuse mwa musebezi wo. Baeza mobakonela kaufela kutusa, kuitatela, ni kubonisa sishemo. Jehova ulufuyauzi kaufela luna luli. Nikozwi kuli haisi feela pilu kwa lika zezwa mwa musebezi olueza kono mane waisanga pilu ni molupetela musebezi.”

 Lwaitumela ku mina kwa kufa linubu zetusa mwa musebezi wa kulukisa mavidio a, ili kukopanyeleza ni linubu zefiwanga ka kuitusisa donate.pr418.com.