Tawala ya Mulibeleli ya Sikuwa ya June 1, 1912 neibulezi cwana: “Buñata bwa batu bababalanga lihatiso zaluna baziba batu babali libofu. Bafumananga litaba za kubala kusina kulifa sesiñwi . . . . Mufuta wo oñolezwi libofu ulukisizwe ka nzila yebakonisa kuli babale litaba.” Tawala ya Mulibeleli yeo neiekelize kubulela kuli: “Buñata bwa batu babali libofu baitebuha hahulu lushango lwa kuli hona cwale-cwale fa, batu bakaikola limbuyoti zeñata mwa lifasi lelinca.”

 Ka nako yanaañolwa manzwi ao, linaha zeshutana-shutana zeneitusisa puo ya Sikuwa neliitusisa mifuta yeshutana-shutana ya mwakuñolela muñolo wa libofu. Kono mane ka yona nako yeo, Lipaki za Jehova nebanze batusa kuli niti ya mwa Bibele ifumanehe mwa muñolo wa libofu. Mane lusaeza cwalo ni kacenu! Cwale selunani lihatiso zeñozwi mwa muñolo wa libofu mwa lipuo zefitelela 50. Lihatiso zeo lilukiswanga cwañi?

 Nto yapili yetokwa kuezwa hakulukiswa litaba za libofu ki kucinca litaku kuli libe mwa muñolo wa libofu. Bo Michael Millen, babasebeleza mwa liluko lelitalima za molilukisezwanga litaba mwa muñolo wa libofu kwa Patterson, mwa New York, batalusa kuli: “Kwamulaho, neluitusisanga liprogilamu zepangilwe ki batu basili kuli luñole litaba mwa muñolo wa libofu, kono nelusa koni kuitusisa zona mwa lipuo zeñwi. Cwale seluitusisa progilamu ya Watchtower Translation System, yekonahalisa kuli luñole litaba mwa muñolo wa libofu mwa lipuo zeñata za libofu zebulelwa mwa lifasi kaufela. Hanisepi kuli kunani progilamu yeñwi yekona kueza cwalo.”

 Litaba za mwa muñolo wa libofu likopanyeleza litaba zefumaneha mwa hatiso hamohocwalo ni litaba zetalusa maswaniso. Ka mutala, siswaniso sa fa kava ya buka ya Muikole Bupilo Kuya Kuile! mwa muñolo wa libofu sitalusizwe cwana: “Muuna uzamaya mwa nzila ya makona-kona, mi mwa matuko kunani likota ni lipalisa zende ni malundu.” Muzwale yali sibofu yasebeza sina sikombwa sa puteho ni paina, yabizwa Jamshed, utalusa kuli: “Niitebuha hahulu litaba ze zetalusa maswaniso.”

 Hamulaho wa kuñola litaba, lilumiwanga kwa liofisi za mitai zelukisanga lihatiso za mwa muñolo wa libofu. Teñi ko, lihatiso liyo lukiswanga ka kukanta litaba fa mapampili atiile asakoni kupunyeha kamba kusinyeha hamulaho wa kuitusiswa hañata-ñata hape. Hamulaho wa fo, makepe ao akopanyiwanga hamoho, kunungiwa, mi kihona likalumiwa hamoho ni lihatiso zelumelwanga kwa puteho kamba ka kuitusisa tukiso ya “free matter for the blind” yetusa kuli lusike lwalifa masheleñi amañata haiba ba ofisi ya poso banani tukiso yecwalo. Hakutokwahala, mitai mane yalukisanga kuli lihatiso zeo lilumiwe ka nzila yekonahalisa kuli lifite kapili ilikuli mizwale baluna ba libofu kamba babasa boni hande bakone kuba ni lihatiso zeluitusisanga kwa mikopano.

 Musebezi wo utandanga nako ni masheleñi amañata kuli ukone kupetiwa. Mane kwa Wallkill, mwa New York, nako yelutandanga kuhatisa Libibele ze 50,000 mwa lihatisezo ilikana ni nako yelutandanga kulukisa Libibele feela zepeli mwa muñolo wa libofu. Bibele ya Sikuwa mwa muñolo wa libofu ya sitopa sabubeli inani livolyumu ze 25, mi teko ya liitusiso zetokwahala kuli lukone kulukisa livolyumu zeo ikona kuminahanywa ha 123 haibapanywa kwa teko ya liitusiso zetokwahala kuli lulukise Libibele zeñwi. a Makava feela a Bibele iliñwi ya livolyumu ze 25 aleka masheleñi abato aeza K2,495!

 Batu babalukisanga lihatiso mwa muñolo wa libofu baikutwa cwañi ka za musebezi obaeza? Kaizeli yabizwa Nadia yasebeleza kwa mutai wa South Africa, utalusa kuli: “Mizwale ni likaizeli baluna babali libofu ni babasa koni kubona hande baziyelehile; kacwalo, niikutwa kuli ki tohonolo yetuna kulukisa lika zesweli kubatusa. Kusina kukakanya, musebezi wo ubonisa kuli Jehova ubalata hahulu.”

 Kucwañi haiba mutu yali sibofu haakoni kubala muñolo wa libofu? Lilimo lisikai kwamulaho, neluzwisize buka yeli, Learn to Read Braille, mokufumaneha litaba za mwa muñolo wa libofu ni zehatisizwe. Buka yeo iñolezwi kutusa mutu yabona hamohocwalo ni libofu kuli babale litaba zeo hamoho. Broshuwa yeo inani liitusiso zekona kutusa sibofu kuñola muñolo wa libofu. Mutu yaituta muñolo wa libofu uitusisa liitusiso zeo kuli akone kuñola litaku za muñolo wo yena muñi. Kueza cwalo kutusa kuli muituti ahupule zeiyemela taku ni taku ni kumutusa kuiziba haaiswala.

 Mizwale ni likaizeli babali libofu ni babasa koni kubona hande batusizwe cwañi ki lihatiso ze? Muzwale yabizwa Ernst, yapila kwa Haiti, naafumanehanga kwa mikopano ya puteho, kono naasina nihaiba hatiso iliñwi ya mwa muñolo wa libofu. Kabakaleo, naapetanga litaba zanaaka bulela hanaabanga mwa sikolo ni hanaabata kualaba. Muzwale yo utalusa kuli: “Cwale senikona kuyemisa lizoho ni kualaba monilatela kaufela. Niikutwa kuli niswalisani ni mizwale ni likaizeli baka. Kaufelaa luna lufiwa lico zeswana za kwa moya!”

 “Muzwale yabizwa Jan, muuna-muhulu yapila kwa Austria, yasaboni hande, ili yazamaisanga Tuto ya Tawala ya Mulibeleli ni Tuto ya Bibele ya Puteho utalusa kuli: “Lihatiso zaluna za mwa muñolo wa libofu lilukisizwe hande kufita lihatiso zeñwi za libofu zenikile nabala. Ka mutala, lunani makepe, lukona kufumana litaluso ze kwatasi ka bunolo, mi litaba zetalusa maswaniso linepahalile.”

 Kaizeli yabizwa Seon-ok, yali paina, yapila kwa South Korea, ki sibofu mi ki susu. Kwamulaho, naatokwanga kumutusa kuziba zebulelwa ka kueza lisupo zeñwi inze bamusweli fa mubili haali kwa mikopano, kono cwale sakona kuipalela Bibele ya mwa muñolo wa libofu yena muñi. Kaizeli yo utalusa kuli: “Lihatiso zeñwi za mwa muñolo wa libofu litaata kulibala kakuli kunani tundolindoli totusiyo, mibamba isikami, mi mapepa aitusisizwe ki amasisani hahulu. Kono Lipaki za Jehova bona baitusisanga mapepa atiile mi tundolindoli tulukisizwe hande; taba yeo initusa kubala litaba zeo ka bunolo.” Kaizeli yo uekeza kubulela kuli: “Kwamulaho, nenikona feela kuituta lihatiso zetomile fa Bibele ka kutusiwa ki babañwi. Kono cwale senikona kuituta zona ninosi. Nibanga ni tabo yetuna kuitukiseza mikopano ya puteho sunda ni sunda ni kualaba monikonela kaufela. Nibalanga lihatiso kaufela zelukisizwe mwa muñolo wa libofu. Hanikoni feela kutuhela kulibala.”

 Sina feela lihatiso kaufela zeluhatisanga, lihatiso zaluna za mwa muñolo wa libofu ni zona linani taba ye, yeli: “Hatiso ye hailekiswi. Musebezi wa kuihatisa ki omuñwi wa misebezi yeeziwa mwa lifasi kamukana ya kuluta batu Bibele, ili misebezi yelifelwa ka linubu za kuitatela.” Lwaitumela kwa linubu zemusweli kufa ka kuitusisa yeñwi ya linzila za mwakufela linubu zebonisizwe fa donate.pr418.com. Bufani bwamina butusa kuli batu kaufela bafumane lico za kwa moya, kukopanyeleza cwalo ni batu babali libofu ni babasa boni hande.