Muzwale yomuñwi naabulezi kuli: “Seni ilibelezi ka nako yetelele, lilimo ze 19!” Ki nto mañi yanaalibelezi muzwale waluna yo? Naalibelezi kuzwisiwa kwa Toloko ya Lifasi le Linca ya Mañolo A Sigerike A Sikreste mwa puo yahae ya Sibengali. Batu babañata baikutwanga cwalo ni bona Bibele ya Toloko ya Lifasi Lelinca haizwisiwa mwa puo yabona. Kono kana mwaziba zeamiwa mwa musebezi wa kutoloka ni kulukisa Libibele ze?

 Pili, kuketiwanga sikwata sa batoloki kuli baeze musebezi wo ka kuetelelwa ki Katengo ka Bañoli ka Sitopa Sesietelela. Musebezi wa kutoloka Bibele uunganga nako yekuma kai? Muzwale Nicholas Ahladis, wa mwa Likolo la Sebelezo ya Batoloki mwa Warwick, kwa New York, utalusa kuli: “Musebezi wo uitingile fa lika zeñata zecwale ka palo ya batoloki babali teñi, milao ya mwakuñolela puo, haiba bañi ba puo bautwisisa mone buinezi bupilo ka nako yene iñolwa Bibele, ni ka za haiba kunani shutano yeliteñi yeama moibulelelwa puo yeo mwa libaka zeshutana-shutana. Ka avareji, batoloki kubaangelanga silimo silisiñwi kuisa ku zetaalu kuli batoloke feela Mañolo A Sigerike A Sikreste, mi musebezi wa kutoloka Bibele mukatumbi uunganga lilimo zeene kamba kufitelela. Kono musebezi wo uunganga nako yetelele nikufita haiba Bibele itolokiwa mwa puo ya bo susu.”

 Kwandaa batoloki, kunani babañwi babatusanga mwa musebezi wa kutoloka Bibele. Sikwata sa mizwale ni likaizeli ba lisimuluho zeshutana-shutana, ili bao fokuñwi bazwanga mwa linaha lisili, batatubanga musebezi obaezize batoloki basalibeleli kulifiwa sesiñwi. Mizwale ni likaizeli bao batusanga batoloki kutoloka Bibele yenepahalile ni yebunolo kuiutwisisa. Muzwale yomuñwi wa kwa South Africa yalutanga batoloki musebezi wa kutoloka Bibele naabulezi kuli: “Batoloki baikutwanga kuli banani buikalabelo bobutuna ku Jehova ni kwa batu babaka bala Linzwi lahae.”

 Bibele hase ifelizwe kutolokiwa, iswanela kuhatiswa ni kumanekiwa. Kacwalo, maluko a bahatisi atokwanga lika zelishumi zelatelela kuli ahatise Bibele: mapepa, inki, mapepa a kuitusisa kulukisa kava, lilametiso, lisila la kuitusisa fa kava, likabiso za silivera, mihala, lisila la kumameka kwa mafelelezo a buka kuli liswale mapepa hamoho, muhala wa kutiisa buka mwa makona, ni lisila la fa kava la mwahali. Mwa 2019, masheleñi afitelela K280,000,000 naaitusisizwe kwa kuleka feela lika zeo zenetokwahala mwa musebezi wa kulukisa Bibele. Babasebeleza mwa liluko la Bahatisi nebatandile lihora zefitelela 300,000 mwa silimo seo kuli bahatise ni kulumela Libibele kwa libaka zeshutana-shutana.

 Ki kabakalañi haluitusisanga nako ni masheleñi amañata cwalo kuli lueze misebezi yeo? Muzwale Joel Blue wa mwa Liluko Leliokamela Musebezi wa Bahatisi Mwa Lifasi Kaufela utalusa kuli: “Bibele ki yona buka ya butokwa hahulu yeluhatisanga. Kacwalo, lubata kuli ponahalo yayona ikanyise Mulimu yelulapela ni kubonisa butokwa bwa lushango lolukutaza.”

 Kwandaa kuhatisa Bibele ya Toloko ya Lifasi Lelinca mwa mufuta wa kamita, Bibele yeo hape ilukiswanga mwa mifuta yemiñwi ilikuli ituse babakopana ni miinelo yeshutana-shutana. Ka mutala, Bibele ya Toloko ya Lifasi Lelinca ya mwa muñolo wa libofu ifumaneha mwa lipuo zelishumi. Kulukisa Bibele mutumbi mwa muñolo wa libofu kukona kuunga lihora ze 8, mi Bibele iliñwi ibanga ni likopi zeñata-ñata zekona kuunga sibaka sesifitelela hanyinyani limita zepeli. Hape luhatisanga Bibele ye mwa mufuta oipitezi olukiselizwe batu babali mwa litolongo, ili babalumelezwa feela kuba ni libuka zenani kava ya pepa.

 Bibele ya Toloko ya Lifasi Lelinca yatusanga batu baba ibala. Ka mutala, halunyakisiseñi puteho yeñwi yeitusisa puo ya Sikiluba, yefumaneha mwa sibaka sesibizwa Tombe, kwa Democratic Republic of the Congo. Sibaka se, sifumaneha likilomita zefitelela 1,700 kuzwa mwa muleneñi omutuna wa naha yeo. Lipaki za Jehova bane bapila mwa sibaka seo nebanani feela Bibele iliñwi, mi mwateñi nekuitusisizwe manzwi a Sikiluba akale. Mizwale kaufela nebaitusisanga Bibele iliñwi yeo ka kuyapana ilikuli baitukiseze lingambolo zabona. Kono kuzwa feela ka August 2018, mizwale ni likaizeli kaufela mwa puteho yeo banani Bibele ya Toloko ya Lifasi Lelinca yekwanile mwa puo ya Sikiluba mi iñozwi ka kuitusisa puo ya miteñi ye.

 Kaizeli yomuñwi yabulela puo ya Sijelemani naabulezi cwana ka za Bibele ya Toloko ya Lifasi Lelinca yenetolokilwe mwa puo yahabo: “Hanisa bulelanga kuli nikatokwa kubala Bibele. Kono mane niipuzanga kuli: ‘Ki lili hape fonika balela Bibele?’” Muuna yomuñwi yapika tolongo naañozi kuli: “Mutu yomuñwi naanifile Bibele ya Toloko ya Lifasi Lelinca mi isweli yanitusa kucinca bupilo bwaka. Bibele ye initusize kuutwisisa hande Linzwi la Mulimu kufita toloko ifi kamba ifi. Nibata kuziba zeñata ka za Lipaki za Jehova mi nibata kuba yomuñwi wabona.”

 Batu kaufela babaipalelanga Bibele ya Toloko ya Lifasi Lelinca baitebuha linubu zefiwanga kuli Bibele ye ikone kulukiswa. Linubu zeo lifiwanga kuli lituse mwa musebezi wa mwa lifasi kaufela ka kuitusisa yeñwi ya linzila zebonisizwe fa donate.pr418.com. Lwaitumela luli kwa bufani bwamina.