Bibele neipolofitile kuli mwa mazazi aluna kukaba ni lindwa, lizikinyeho, matuku ayambukela, ni ‘lika zeñwi zesabisa.’ (Luka 21:10, 11) Manzwi a bupolofita ao azwezipili kutalelezwa mwahalaa silimo sa sebelezo sa 2022. a Ka mutala, ndwa ya mwa Ukraine neizwezipili, mi neiamile bupilo bwa batu babañata. Butuku bwa COVID-19 nebusika fela kale mwa linaha zeñata. Kuzwa fo, batu babañata neba amilwe ki likozi za ka taho, zecwale ka lizikinyeho mwa Haiti ni mañungwa amatuna mwa Central America, mwa Philippines, ni kwa mboela-upa wa Africa. Lipaki za Jehova nebatusize cwañi batu bane ba amilwe ki likozi zeo?

 Mwa silimo sa sebelezo sa 2022, kopano yaluna neitusize batu bane baipumani mwa likozi zebato ba 200! Masheleñi kaufela ane luitusisize kwa kutusa batu bane batahezwi ki likozi abato eza madola a 12 milioni. b Mubone mo linubu zefiwanga neliitusiselizwe kwa kutusa batu bane batahezwi ki likozi mwa linaha zetaalu.

 La August 14, 2021, nekubile ni zikinyeho yetuna hahulu kwa mboela wa naha ya Haiti. Ka bumai, Lipaki babalaalu nebashwile, ili likaizeli bababeli ni muzwale alimuñwi. Batu bane bapunyuhile nebaholofezi ni kusinyehelwa ki lika zabona mi neba katalizwe ki lipilaelo zene tahisizwe ki zikinyeho yeo. Muzwale wa libizo la Stephane utalusa kuli: “Batu babañata mwa muleneñi nebashwile kuli mane sunda ni sunda nekubanga ni maswabi amañata ka likweli zefitelela zepeli.” Muzwale yomuñwi wa libizo la Éliézer naabulezi kuli: “Lipaki babañata nebasina mandu, liapalo, makatulo, ni lika zeñwi za kuitusisa mwa bupilo. Ka likweli zeñata, batu babañata nebapilile ka sabo kabakala lizikinyeho zenyinyani zene swalelela kuezahala hamulaho wa zikinyeho yetuna.”

 Kopano yaluna neitusize kapili-pili. Mutai wa Haiti neudocument lico zeeza matani a zefitelela 53, hamoho cwalo ni litende, ma matilesi, ni macaja a ma foni aitusisa sola. Kuzwa fo, mwahalaa silimo sa sebelezo sa 2022, mandu afitelela 100 naalukisizwe kamba kuyahiwa sinca. Neluitusisize masheleñi afitelela madola aeza 1 milioni mwa musebezi wo wa kutusa babatahezwi ki likozi.

 Mizwale ni likaizeli baluna baitumezi hahulu. Bo Lorette batalusa kuli: “Zikinyeho neisinyize ndu yaluna ni sibaka kone luezezanga pisinisi yaluna. Nelusina za kuca. Kono kopano ya Jehova neilutusize ka kulufa lika kaufela zene lutokwa.” Bo Micheline babulela kuli: “Zikinyeho neisinyize ndu mone nipila ni bana baka bababeli babashimani. Nenisa zibi za kueza kwandaa kulapela kukupa tuso, mi Jehova naalabile ka kuitusisa kopano yahae. Fa cwale selunani ndu yende molukona kupila. Niikatulezi kueza ka monikonela kaufela kuli nibonise buitumelo bwaka ku Jehova.”

 Ba muuso nebalemuhile buikatazo bone luezize bwa kutusa babatahezwi ki likozi. Muzamaisi wa tolopo ya L’Asile naabulezi kuli: “Naitumela ku mina kabakala muhato omuungile wa kutaha kapili-pili kuto tusa. Namilumba kabakala kuli mubonisanga likute lelituna ku ba muuso. Nitabile kakuli nilemuhile kuli hamubati masheleñi. Kono mubata kutusa batu. Muezanga lika ka lilato.”

 La January 24, 2022, nekubile ni Liñungwa lelibizwa Ana mwa Mozambique mi kihona liya kwa wiko kuyo kena mwa Malawi. Liñungwa leo nelitahisize pula yeñata ni moya omuñata one umata ka lubilo lolueza likilomita ze 100 ka hora (62 mph). Nelisinyize mihala ya malaiti, kukukisa mitano, ni kutahisa muunda omutuna.

 Liñungwa leo neli amile Lipaki babafitelela 30,000 mwa Malawi ni mwa Mozambique. Muzwale Charles, ili yanaatusize mwa musebezi wa kutusa babatahezwi ki likozi, utalusa kuli: “Hane niboni mone banyandela mizwale ni lika zene basinyehezwi, neniikutwile hahulu bumaswe mi nenifelezwi ki maata.” Muinelo wo neli omaswe hahulu bakeñisa kuli lico zabona zene babulukile ni zene balimile kaufelaa zona neli kukisizwe. Batu babañata nebasinyehezwi ki mandu abona. Ka bumai, muzwale yomuñwi naashwezwi ki musalaa hae ni bana bahae bababeli, mukolo one uto bayangwela hane utibile.

 Liñungwa leo nelisabisa. Ka nako ya 01:00 mwa Nchalo, kwa Malawi, lubasi lwa bo Sengeredo neluutwile mulumo osabisa wa mezi anaabuba. Linuka zepeli nelibayuzi! Muzwale Sengeredo aatula kuli bazwe mwa ndu. Wo neli muhato omunde kakuli nakonyana kuzwa fo, muunda watahisa kuli ndu yabona iwe. Lika zabona nelisinyehile kamba kukukiswa. Lubasi lo lwaikatulela kuya kwa Ndu ya Mubuso, ili musipili oba zamayanga mizuzu ye 30 ka mahutu. Kono ka nako ye, neba uzamaile ka lihora zepeli. Nebafitile inze bakolobile hahulu ni kukatala, kono nebafitile hande.

 Kapili-pili mutai wa Malawi ni wa Mozambique wakalisa musebezi wa kutusa babatahezwi ki likozi. Balaela baokameli ba mupotoloho ni baana-bahulu kuli bazibe zebatokwa mizwale ni likaizeli bane baamilwe ki liñungwa ni kuli babasusueze. Tutengo Totutalima Babatahezwi ki Likozi netufilwe musebezi wa kuokamela musebezi wa kutusa babatahezwi ki likozi, mi honafo feela tutengo to twakalisa kutusa mizwale baluna kufumana lico ni lika zeñwi zene batokwa. Nekuitusisizwe masheleñi afitelelela $33,000 kwa kutusa batu ni afitelelela $300,000 kwa kulukisa ni kuyaha sinca mandu.

 Tutengo Totutalima Babatahezwi ki Likozi netuitusisize hande masheleñi, mi kueza cwalo neli kwa butokwa bakeñisa muinelo wa kutula kwa lika. Ka mutala, mwa likweli zapili ze 7 mwa musebezi wa kutusa babatahezwi ki likozi, teko ya bupi bwa mbonyi, ili sico sesiciwa hahulu mwa Malawi, neipahami ka 70 pesenti. Teko ya mafula a mwa limota ni yona neipahami. Kuli mizwale bababalele masheleñi, nebalekile lico ni lika za kuitusisa kwa kuyaha ka buñata, mi nebasika lilekela kwahule. Kueza cwalo nekutahisize kuli bakutisezwe kwa liteko ni kuli basike basinyehelwa ki masheleñi amañata kwa nzila.

 Musebezi wa kutusa babatahezwi ki likozi neutabisize hahulu batu ba Jehova. Muzwale Felisberto, wa mwa Mozambique, naabulezi kuli: “Hanisika bona fateñi kopano yekile yafa lika zeñata cwana zecwale ka: liyahiso, linzila, bayahi, lico, ni ketelelo ye lilato. Musebezi wo wa kutusa babatahezwi ki likozi ki mutala omunde hahulu obonisa lilato la mizwale lanaabulezi Jesu kwa Joani 13:34, 35.” Kaizeli Ester, mbelwa yapila kwa Malawi ili yo ndu yahae neisinyizwe, naabulezi kuli: “Neniziyelehile hahulu bakeñisa kuli nenisina masheleñi a kuyahisa ndu isili. Kacwalo mizwale hane batile kuto niyahela ndu, naikutwa kuli nenili kale mwa Paradaisi.”

 Lifasi lelinca halinze liatumela, lulibelela kuli likozi lika ekezeha hahulu. (Mateu 24:7, 8) Nihakulicwalo, lwaitumela kwa linubu zamina, lunani buikolwiso bwa kuli batu ba Jehova bakafumana lituso zebatokwa. Linzila za momukona kufela linubu litalusizwe hande fa donate.pr418.com. Lwaitumela kwa bufani bwamina.