Mwahalaa silimo sa sebelezo sa 2021, a batu mwa lifasi bazwezipili kunyanda kabakala butuku bobuyambukela bwa COVID-19. Sina feela mone kuboniselizwe mwa taba yeli, “Kutusa Mizwale Baluna Mwa Lifasi Kaufela ka Nako ya Butuku Bobuyambukela Bobuyambile Lifasi Kaufela,” luitusisize masheleñi amañata-ñata  b kuli lutuse mizwale ni likaizeli babaamilwe ki butuku bobuyambukela, mi kutomilwe Tutengo Totutalima Babatahezwi ki Likozi totufitelela 950.

 Ka nako ya butuku bobuyambukela bo, mizwale ni likaizeli baluna mwa lifasi kaufela hape nebawezwi ki likozi za ka taho ni likozi zeñwi zetahisizwe ki batu. Bakeñisa likozi zeo zefitelela 200, ba Katengo ka Baswalisanisi ka Sitopa Sesietelela nebalumelelize kuli masheleñi afitelela K168,000,000 aitusiswe kutusa batu babawezwi ki likozi zeo kukopanyeleza cwalo ni masheleñi anaazwisizwe kuli lutuse babaziyelehile kabakala butuku bwa COVID-19. Halunyakisiseñi mo linubu zene mufile nelituselize batu bane baamilwe ki likozi zepeli zesazo ezahala.

 La May 22, 2021, Lilundu la Nyiragongo, lelifumaneha kwa Democratic Republic of the Congo, lakala kutunya sitipwi-tipwi sa mulilo. Sitipwi-tipwi sa mulilo seo sasinya mandu, likolo, ni masa. Kono sitipwi-tipwi seo nesi sona feela sene sibeile bupilo bwa batu mwa lubeta. Hamulaho wa mazazi kuzwa folitunyeza lilundu leo, mwa tolopo ya Goma kwaba ni musi okola kabakala lilundu leo lene litunyize mi kwaba ni lizikinyeho zenyinyani za lifasi. Buñata bwa batu bane bapila mwa muleneñi wo balaelwa kuzwa mwateñi. Batu babañata-ñata babaleha, babañwi batula museto mi basilela mwa Rwanda.

 Lipaki za Jehova babato eza 5,000 ni bona nebatutile mwa sibaka seo. Babañwi ku bona nebasinyehezwi ki mandu abona lilundu hane litunyize mulilo, babañwi nebauzwelizwe libyana zabona hase babalehile. Tutengo Totutalima Babatahezwi ki Likozi twa mwa Rwanda ni mwa Democratic Republic of the Congo twaswalisana kutusa babatahezwi ki kozi yeo. Mutai wa Congo (Kinshasa) ubulela cwana ka za katengo kakañwi kakatusa babatahezwi ki likozi: “Nihaike kuli miinelo mwa muleneñi neisiyo hande, katengo kao katusa batu ka kubafa lico, mezi, likubo, ni liapalo, pili batu basika laelwa kale kuzwa mwa sibaka seo.” Mwa tolopo yeñwi kone bakubukani mizwale ni likaizeli baluna babafitelela 2,000, katengo kakatalima babatahezwi ki likozi nekatomile litende, kufa batu mamasiki, ni kubataluseza mone bakona kutuseza kuli butuku bwa COVID-19 ni kolera busike bwayambukela babañwi ka bubebe.

 Mwahalaa likweli zetaalu kuzwa fokubela ni kozi yeo, mizwale baluna batusa batu ka kubafa laisi yefitelela likilo ze 6,000, bupi bobufitelela likilo ze 6,000, saladi yefitelela malita a 8,000, ni mezi afitelela malita a 8,000. Kuli lusike lwasinyehelwa ki masheleñi amañata, mutai walukisa kuli kulekiwe lico zeñata za mwa naha kufita kuleka lico zetula mwa linaha lisili.

 Kaizeli yomuñwi yanaasinyehezwi ki ndu yahae yenca naabulezi kuli: “Neluzwafile hahulu mi nelutomohile lipilu.” Kono yena ni lubasi lwahae bafumana lituso za kwa mubili mi basusuezwa kuzwelapili kusepahala ku Mulimu. Cwale kaizeli yo utalusa kuli: “Jehova usweli walutusa kufumana lika zelutokwa. Luiponezi kuli Jehova walwalanga mushimbo waluna mi uubisanga obubebe kuli luulwale.”

 Ka lilimo zeñata, naha ya Venezuela ibile ni butata bobutuna bwa kutotobela kwa sifumu. Mizwale ni likaizeli baluna bafumana taata kupila kwateñi, lico litaezi, mi kwateñi kunani bukebenga bobuñata. Niteñi, kopano ya Jehova haisika bayubeka.

 Mwahalaa silimo sa sebelezo sa 2021, neluitusisize masheleñi afitelela K31,500,000 kuleka ni kuluma lico ni milola kwa mabasi anaatokwile. Mutai wa Venezuela ubiha kuli: “Haki nto yebunolo kuluma lico zeñata-ñata zeeza likilo ze 130,000 mwa naha kaufela kweli ni kweli ni kubona teñi kuli mizwale ni likaizeli babali mwa butokwi bafumana lituso zeo.” Kuli lico lisike zaisinyehela, hañata mizwale babonanga teñi kuli baluma lico zekona kuina nako yetelele. Mutai wo uzwelapili kutalusa kuli: “Lulekanga lico zeñata mi lulilekanga ka nako yelikutulwa kakuli lilekiswanga ka kucipa kwateñi hanyinyani ka nako yeo. Hasamulaho, lulilumanga ka nzila yesatuli hahulu.”

 Muzwale Leonel, yali mwa Katengo Kakatusa Babatezwi ki Likozi kwa Venezuela, walata musebezi wahae. Utalusa kuli: “Musebezi wa kutusa babatezwi ki likozi ki omunde hahulu. Uniomba-ombile hahulu hamulaho wa lifu la musalaaka yene nilata yanaabulailwe ki butuku bobuyambukela bwa COVID-19. Nitukufalezwi kueza musebezi wo mi niikutwa kuli nieza sesiñwi kuli nituse mizwale babali mwa butokwi. Mwa bupilo bwaka, niiponezi mo Jehova atalelelize sepiso yahae ya kuli haana kuyubeka batanga bahae.”

 Muzwale yomuñwi yanaafilwe lituso naabanga mwa Katengo Kakatusa Babatezwi ki Likozi kwamulaho. Utalusa kuli: “Cwale neli na yanaatokwa kutusiwa. Nelusika fiwa feela lituso za kwa mubili. Mizwale hape nebatusize na ni musalaaka kusabilaela hahulu. Neba lubabalezi, kuluomba-omba, ni kulususueza.”

 Likozi zeñwi litahanga ka kusalibelela. Kono ka tuso ya linubu zemufanga kwa musebezi wa mwa lifasi kaufela, hañata kopano ya Jehova yalekanga lituso ni kuliluma kapili-lili. Linzila zeñwi za kufa ka zona linubu libonisizwe fa donate.pr418.com. Lwaitumela kabakala moya wamina wa bufani.