Sitopa Sesietelela sibata kuitusisa linubu kwa kulukisa miyaho yelutusa kupeta hande musebezi wa kukutaza taba yende ya Mubuso. Ka mutala, mwa silimo sa sebelezo sa 2023, likopano za muuso zene iitusiswa ki mitai ya Lipaki za Jehova neliitusisize madola afitelela 500 milioni kwa kuleka, kuyaha, kulukisa sinca, ni kwa kubabalela Mandu A Mubuso ni Libaka za Mikopano mwa lifasi kaufela. a Masheleñi a aekezwa kwa masheleñi anaaitusisizwe ki liputeho mwa lifasi kaufela kwa kubabalela Mandu A Mubuso.

 Hape, linubu zefiwanga liitusiswanga kwa kuyaha ni kubabalela miyaho yefa mitai, ili yetusa kwa kuonga-onga musebezi wa kukutaza mwa lifasi kaufela. Lunolofalize misebezi yeluezanga fa mitai ilikuli lukone kuitusisa hande masheleñi kwa musebezi wa kuyaha ni kulukisa sinca Mandu A Mubuso ni Libaka za Mikopano. Niteñi, lusatokwa masheleñi amañata kuli lukone kulukisa sinca kamba kututiseza mitai kwa libaka lisili. Ki kabakalañi misebezi ye haili ya butokwa? Mitai itusanga cwañi mwa musebezi wa butokwa oeziwa mwa simu? Haluboneñi.

 Mitai yemiñata seifitelela lilimo ze 30 kamba ze 40 kuzwa foiyahelwa! Bo Nicholas, ba mwa Liluko Lelitalima za Kuyaha Mwa Lifasi Kaufela, batalusa kuli: “Nihaiba muyaho obabalelwa hande wakona kukalisa kusinyeha. Kulukisa sinca muyaho kutusanga kuli muyaho uzwelepili kuitusiswa ka nako yetelele.”

 Miyaho yefa mitai ni yona iswanela kulukiswanga sinca ilikuli izamaelele ni licinceho zesweli kuezahala mwa kopano. Kuzwa feela fokuyahelwa mitai yemiñata, palo ya bahasanyi iekezehile hahulu mwa lifasi kaufela. Luzwezipili kubata baitateli babañata kuli batuse mwa misebezi yeeziwa fa mitai yeo kakuli palo ya bahasanyi izwelapili kuekezeha. Kabakaleo, miyaho yefa mitai yene yahilwe ka kuya ka palo ya baitateli bane batokwahala kwamulaho seli yeminyinyani kabakala baitateli babañata base batokwahala!

 Nto yeñwi ya butokwa hahulu ki kutibela likozi. Bakeñisa kuli lupila mwa mazazi a mafelelezo a lifasi le, luzwelapili kutalimana ni likozi za ka taho zeñata zetahisa kuli bupilo bwaluna bube mwa lubeta. (Luka 21:11) Haiba luitusisa miyahelo yeminca ya mwakuyahela miyaho ka nako yelulukisa sinca muyaho, lutusa kusileleza mizwale ni likaizeli babasweli kusebeleza mwa libaka zeo. Licinceho ze hape likona kutusa kuli mizwale baitusise miyaho yeo mwa musebezi wa kutusa babatahezwi ki likozi ni kuli bazwelepili kutusa mwa musebezi oeziwa mwa simu hamulaho wa kozi ya ka taho.

 Ka ketelelo ya ba Sitopa Sesietelela, mizwale nebaezize misebezi ya kuyaha fa mitai ye 43 mwa silimo sa sebelezo sa 2023. Taba ye italusa kuli ibato ba hafu ya liofisi za mitai mwa lifasi kaufela neisweli kulukiswa sinca. Mitala yelatelela ibonisa butokwa bwa musebezi osweli kupetiwa.

 Kwa Angola. Bo Matt, babañwi ba mwa Katengo ka Mutai wa Angola, babulela kuli: “Lunani tohonolo ya kuiponela bupolofita bobu kwa Hagai 2:7 inze butalelezwa ka nzila yeipitezi. Mwa lilimo zelishumi feela, luiponezi palo ya bahasanyi hai ekezeha ka 60 pesenti! Palo ya ba lubasi lwa Betele neitokwa kutaimiswa halaalu kuli bahasanyi ba batusiwe hande. Nihakulicwalo, bakeñisa bunyinyani bwa sibaka saluna nelusa koni kumema baitateli babañata kuli bato eza musebezi kulikana ni ka mone kutokwahalela. Kueza cwalo nekutahisize kuli ba lubasi lwa Betele babe ni musebezi omutuna hahulu ili nto yenetahisize kuli babelekange ni hamulaho wa nako ya kukotoka.”

 Mizwale nebafilwe musebezi wa kunyakisisa zene batokwa kueza kuli miyaho ya fa Betele ibe yemiñata. Sapili, nebaboni kuli nto feela yenekona kutusa ki kulukisa sinca miyaho yeo yene iliteñi. Kono hamulaho wa kueza lipatisiso, balemuha kuli hane bakalukisa sinca miyaho nebasike baitusisa hande linubu. Kacwalo, balumelelana kuleka ni kulukisa sinca muyaho one uli bukaufi. Bo Matt batalusa kuli: “Mizwale ba mwa Katengo ka Mutai hane bataluselizwe kuli kulekiwe ni kulukisa sinca muyaho one uliteñi, nelunahana kuli muyaho wo neusike wapeta hande musebezi kakuli neuka shutana ni muyaho one lukaicahela luna beñi. Kono fa cwale lwaiponela hande mousweli kulutuseza muyaho wo. Jehova ufuyauzi katulo ye.”

 Kubonahala kuli sibaka sa mutai wa Angola sikatokwa kuekeziwa kwapili. Nihakulicwalo, muyaho omunca wo, hamohocwalo ni mizuzu ya malobalo ye fa Betele ni ye kwa libaka zeñwi yelifelwa, litahisize kuli ofisi ya mutai ibe ni sibaka sesitokwahala kuli musebezi wa mwa simu uzwelepili.

 Kwa Japan. Miyaho yapili ye fa mutai wa Japan neiyahilwe lilimo zebato ba ze 40 kwamulaho mi buñata bwayona haisika lukiswa sinca kuzwa fone iyahezwi. Kuezizwe lika zeñata kuli miyaho yeo ibabalelwe, kono nihaike kuli mizwale babelekile ka taata kuli baibabalele, neluitusisize yona ka nako yetelele hahulu kufita nako yene iswanela kuitusiswa. Ki lona libaka halusweli kulukisa sinca miyaho ye.

 Hape, bupilo bwa fa Betele buzwezipili kucinca ka lilimo zeñata. Pili lusika fita kale mwa silimo sa 2015, ba lubasi lwa Betele nebalukisezwanga lico. Kacwalo, mizuzu yemiñata ya fa Betele mwa Japan neinani sibaka sesinyinyani hahulu mwa kulukiseza lico. Ka nako ya cwale, ba lubasi lwa Betele sebakona kuikapehela lico. Mwa mizuzu yelukisizwe sinca ye kuekelizwe sibaka mwa kulukiseza lico ili sesikonisa ba lubasi lwa Betele kuikapehela lico ka nzila yebunolo. Kaizeli Kumiko yasebeleza fa mutai wa Japan, ubulela kuli, “Nitabile hahulu kabakala kuba ni sibaka sesinde sa kuapehela, mi kunitusanga kulatelela litukiso zenca zeeziwa fa Betele.”

 Misebezi yepetiwa fa mutai wa Japan ki yemiñwi ya misebezi ya butokwa hahulu yepetiwa mwa lifasi kaufela. (Mateu 28:19, 20) Mutai wa Japan ki omuñwi wa mitai yemibeli yehatisanga Libibele. Kabakaleo, kalulo yeñwi ya musebezi wa kuyaha ki kubeya mushini oanya liluli ni kupuma mapampili mwa Lihatisezo ilikuli mizwale bababelekela mwateñi basilelezwe kwa liluli. Kuleka ni kutoma mushini wo mwa lihatisezo kukona kueza madola afita fa 1 milioni, kono bunde bwaona ki bwa kuli utusa kuli mutai ukone kuzwelapili kuhatisanga lihatiso, sihulu Bibele, ni kubona teñi kuli lihatiso zeo liyofita kwa mizwale ni likaizeli mwa lifasi kaufela.

 Mizwale nebaboni teñi kuli musebezi wa kuhatisa Libibele neuzwezipili ka nako yene usweli kulukiswa sinca muyaho. Bo Trey, babañwi ba mwa Katengo ka Mutai wa Japan, batalusa kuli: “Ka nako yene luyaha, kopano yaluna neizwezipili kuzwisa Libibele zeñata, mi batu babañata mwa lifasi kaufela nebabata hahulu Libibele. Nelutokwa kusebelisana hamoho ni maluko ni batu babashutana-shutana kuli lukone kutoma mushini omunca ni kuziba fone luka kaliseza kuhatiseza lihatiso.” Kusina taba ni miinelo yetaata ye, kweli ni kweli nekuhatiswanga Libibele ze 220,000 kukala mwa kweli ya March kuisa mwa kweli ya August 2023—ka nako yene kueziwa musebezi omutuna wa kuyaha Lihatisezo. Musebezi wo kaufela neufelile kusina kuitusisa masheleñi amañwi hape.

 Kubukeleza mulilo wa malaiti ki kalulo yeñwi ya butokwa mwa musebezi wa kulukisa sinca miyaho. Lukabeya masola amanca, ilikuli kubukelezwe masheleñi abato eza madola a $120,000 anaaka itusiswa kwa kuleka malaiti silimo ni silimo. Lukabeya mahaulo anani magilasi amalaalu akopanyizwe hamoho, ili aka lutusa kuitusisa malaiti amanyinyani, kutalusa kuli silimo ni silimo lukabukelezanga masheleñi abato eza madola a $10,000. Nihaike kuli lika zetusa kuli kusike kwaitusiswa hahulu malaiti amañata zatula, kuakalezwa kuli likatusa kubukeleza madola afitelela 3.5 milioni abukelezwe mwahalaa nako yeluka itusisa masola ni mahaulo a. Hape likatusa kuli miyaho yeluyaha isike yatahisa butata kwa sibaka foiyahiwa.

 Misebezi ya kuyaha yepetiwa fa mitai yemibeli ye, ibonisa musebezi omutuna oluezanga kuli miyaho yaluna ya fa Betele ituse mwa musebezi wa kukutaza wa mwa kalulo ya simu ya mitai. Nihakulicwalo, musebezi hausika fela. Bo Aaron, ba mwa Liluko Lelitalima za Kuyaha Mwa Lifasi Kaufela batalusa kuli: “Kuezizwe zeñata kuli musebezi wo upetiwe, kono kusanani lika zeñata zesatokwa kupetiwa”. Musebezi wo ukapetiwa cwañi? Bazwelapili kubulela kuli: “Kwandaa linubu zefiwanga ka kuitatela, ili zetusanga kwa kulifela lisinyehelo za misebezi ya butokwa ye, hape lwaitumela kwa moya omunde wa buitomboli obabonisize mizwale ni likaizeli bane baitatezi kutusa mwa musebezi wo ni babasweli kulukisa miinelo yabona kuli bakone kutusa kwapili. Tuso yebasweli kufa mizwale ni likaizeli ni linubu zetusa mwa musebezi wo lilukolwisa kuli Jehova usweli wafuyaula musebezi wo.”—Samu 110:3.

 Musebezi waluna wa kuyaha ni kulukisa sinca miyaho usweli kupetiwa ka tuso ya linubu zamina za kuitatela, mi buñata bwa linubu zeo lifiwanga ka kuitusisa donate.pr418.com. Lwaitumela hahulu kwa moya wamina wa bufani omuzwelapili kubonisa.