Mwa Piho Yabu 6 ya Sitopa Sesietelela ya 2020, Muzwale Geoffrey Jackson naabulezi litaba zesusueza, naaize: “Kwamulaho, hakuna yanaaziba kuli lukakonanga kubala ni kuikola lico za kwa moya fa tupangaliko.” Naazwezipili kubulela kuli: “Kono ki fa, mi munahane feela mone kukabela ka nako ya butuku ye kambe nelusina Progilamu ya JW Library. Jehova ki yena yanaa lutusa kuitukiseza mwakuitiiseza mwa miinelo yeswana sina ye.” Kusina kukakanya, kaufelaa luna lwalumelelana ni manzwi ao.

 Jehova ulutusize cwañi kuitukiseza? Kupanga Progilamu ya JW Library nekuamañi, mi ki lika mañi zetokwahala kuli progilamu ye izwelepili kusebeza hande ni kubolosolwa?

 Mwa May, ka silimo sa 2013, ba Sitopa Sesietelela nebakupile liluko la MEPS Programming, lelifumaneha kwa ofisi yetuna yezamaisa musebezi waluna mwa lifasi kaufela, kulukisa progilamu fone kukafumaneha Bibele ya Toloko ya Lifasi Lelinca yebolosozwi sinca. Muzwale Paul Willies, yasebelisana ni liluko la MEPS Programming utalusa kuli: “Kuzwa feela kwamulaho, nelusikaba kale ni progilamu kamba App ifi kamba ifi yefumaneha fa sibaka fokubeiwanga ma App fa Intaneti kuli batu baikungele yona. Kacwalo, lwaketa mizwale ni likaizeli bane bakaeza musebezi wo, lwalilimalisa misebezi yemiñwi yene lueza, mi lwasebelisana ni maluko amañwi kuli lupange progilamu ye, kulukisa moika bonahalela ni litaba zeneka fumanehanga fateñi. Nelulapelanga hahulu ka za teñi, mi ka tuso ya Jehova, progilamu ye neikonile kuzwiswa fa mukopano wa ka silimo one ubile teñi likweli zeketalizoho kuzwa fo!”

 Kono musebezi omuñwi omutuna one lutokwa kueza neli wa kulukisa kuli progilamu ye ibe sifalana luli sesinani lihatiso zeshutana-shutana mwa lipuo zeshutana-shutana. Mwa January, ka silimo sa 2015, lihatiso zeñwi zaekezwa fateñi mwa Sikuwa, buñata bwazona ki zona zesali teñi ni kacenu, mi hamulaho feela wa likweli ze 6 kuzwa fo, lihatiso zeo nese lifumaneha ni mwa lipuo zeñwi zeñata-ñata.

 Kuzwa feela nako yeo, mizwale ni likaizeli babasebeleza fa Progilamu ya JW Library bazwezipili kuibolosola mwa linzila zeshutana-shutana, inge cwalo kulukisa kuli ibe ni mavidio, kulukisa kuli litaba kaufela zetokwahala ka nako ya mukopano wa puteho ni mavidio azona libe mwa sibaka silisiñwi fa kalulo ya mukopano, ni kutusa kuli mutu hasina fa timana yeñwi ya mwa Bibele, akone kubala litaba zeñwi mwa lihatiso zefumaneha mwa Buka ya Lipatisiso.

 Progilamu ya JW Library ikwalulwanga fa lipangaliko zebato eza 8 milioni ka zazi ni zefitelela 15 milioni kweli ni kweli! Ki lika mañi zetusa kuli progilamu yeo isebeze hande fa lipangaliko zeo? Muzwale Willies utalusa kuli: “Halupanga app yeñwi ya kuitusisa fa tupangaliko, hakutalusi kuli lufelize kuilukisa luli. Luzwelangapili kuekeza lika zenca fa app yeo ni kuilukisa hande kuli kubele bunolo batu kuitusisa yona. Bakeñisa kuli bañi ba likampani bazwelangapili kuuncafaza liprogilamu zabona za fa kompyuta, ni luna lutokwanga kuuncafaza app ya JW Library hape ni hape kuli ikone kusebelisana hande ni liprogilamu zeo. Hape lutokwanga kulukisa hande progilamu yaluna ya JW Library ni kuiuncafaza bakeñisa lihatiso zenca ni litaba zeñwi zezwelangapili kulukiswa.” Kacenu, fa JW Library kufumaneha lihatiso zebato eza 200,000 ni litaba za kuteeleza ni mavidio zefitelela 600,000 mwa lipuo zeshutana-shutana!

 Lisebeliso zecwale ka likompyuta haki zona feela zetokwahala kuli Progilamu ya JW Library izwelepili kusebeza. Mizwale batokwanga kulifa masheleñi kuli bakone kuitusisa maprogilamu amañwi a fa kompyuta. Ka mutala, kuli baitusise progilamu iliñwi feela ya fa kompyuta, batokwanga kulifa masheleñi aeza K23,790 silimo ni silimo. Kutuha fo, ba liluko la MEPS Programming batokwanga kulifa masheleñi abato eza K158,600 silimo ni silimo kuli baleke lipangaliko kwa likampani zeshutana-shutana zetusanga kuli balikele fateñi Progilamu ya JW Library kubona haiba ikasebeza hande fa lipangaliko zenca zecwale ka likompyuta, matabuleti, ni mafoni.

 Progilamu ya JW Library itusize kufukuza kwa masheleñi atokwahala kuli lihatiso lihatiswe, kumanekiwa ni kuisiwa kwa libaka zeñwi. Mutala ki wa bukanyana ya Kutatuba Mañolo ka Zazi ni Zazi. Neluhatisize likopi zebato eza 12 milioni za bukanyana ya Kutatuba Mañolo ya silimo sa 2013. Kono neluhatisize feela likopi zebato eza 5 milioni za bukanyana ya Kutatuba Mañolo ya silimo sa 2020, nihaike kuli palo ya bahasanyi nese iekezehile ka bahasanyi bababato eza 700,000 mwa lifasi kaufela. Ki kabakalañi hane kuhatisizwe likopi zenyinyani cwalo? Bakeñisa kuli mizwale ni likaizeli baluna babañata nebakona kuipalela bukanyana yeo fa Progilamu ya JW Library. a

 Progilamu ya JW Library hape itusa mwa linzila zeñwi zeñata. Kaizeli yabizwa Geneviève, yapila kwa Canada, utalusa kuli Progilamu ya JW Library imutusize kueza tuto ya ka butu kamita. Utalusa kuli: “Kubulela feela niti, nenisike nakona kuitutanga zazi ni zazi kakusasana kambe nenitokwa kushokotola libuka kaufela za kuitusisa nako kaufela hanitokwa kuituta. Kono bakeñisa kuba ni Progilamu ya JW Library, sesitokwahalanga feela ki kuunga tabuleti yaka mi lika kaufela zenitokwa liteñi fateñi. Kueza tuto ya ka butu kamita kunitusize kutiisa tumelo yaka ni silikani saka ni Jehova.”

 Progilamu ya JW Library ilutusize hahulu sihulu ka nako ya butuku bobuyambukela bwa COVID-19. Kaizeli yabizwa Charlyn wa kwa America utalusa kuli: “Kuzwa feela fobuyambela butuku bwa COVID-19 mwa lifasi kaufela, hanisika amuhela nihaiba kopi iliñwi yehatisizwe kwa lihatiso zenca zezwisizwe ka nako yefitelela silimo. Kono fa Progilamu ya JW Library, kunani litaba zeñata zelutusa kutiisa silikani saluna ni Jehova, mi niitumela ku Jehova kwa mpo yende hahulu ye.”

 Kaizeli yabizwa Faye, yapila kwa naha ya Philippines, utalusa mwaikutwela ka za progilamu ya JW Library, ili kulumelelana ni mobaikutwela batu babañata. Utalusa kuli: “Niitusisanga app iliñwi ya butokwa hahulu ye kuli nitiise silikani saka ni Jehova. Zazi ni zazi kakusasana, nikalanga ka kubala litaba zefumaneha fa app ye. Niteelezanga kwa lipina zefumaneha fateñi haninze nieza misebezi ya fa lapa. Niitusisanga app ye haniitukiseza mikopano ya puteho. Niitusisanga yona haniitukiseza tuto ya Bibele. Nibuhanga mavidio afumaneha fateñi ka nako yeniishumusa. Nibalanga litaba za mwa lihatiso kamba za mwa Bibele zefumaneha fateñi ka nako yenilibelela mwa mulaini. Progilamu ya JW Library yatusa luli.”

 Progilamu ya JW Library hape itusize babañata mwa bukombwa. Ka mutala, kaizeli yomuñwi kwa Cameroon hanaanzaa kutaza, naabata kuitusisa liñolo leliñwi la mwa Bibele lanaaitusisize kaizeli yomuñwi lisunda lisikai kwamulaho. Kono naalibezi liñolo leo. Utalusa kuli: “Ka litohonolo, nenihupuzi manzwi amañwi afumaneha mwa liñolo leo. Kacwalo, nakwalula Progilamu ya JW Library, naya mwa Bibele, mi nabata manzwi ao. Honafo feela, nafumana liñolo leo. Kuitusisa Progilamu ya JW Library kunitusanga kufumana mañolo enilibala ka linako zeñwi.”

 Linubu zemufanga, ka kuitusisa yeñwi ya linzila zetalusizwe kwa donate.pr418.com, lilutusize kupanga, kubolosola, ni kulukisa kuli Progilamu ya JW Library izwelepili kusebeza hande, ili kutusa mizwale ni likaizeli mwa lifasi kaufela. Lwaitumela kwa moya wamina wa bufani.

1. Mwa October 2013—Nekuzwisizwe Progilamu ya JW Library, ili yenani Bibele ya Toloko ya Lifasi Lelinca yebolosozwi

2. Mwa January 2015—Lihatiso zeñwi nese lifumaneha fa app ye mwa puo ya Sikuwa, mi hasamulaho ni mwa lipuo zeñwi

3. Mwa November 2015—Nekuekelizwe kalulo yekonahalisa kulala litaba

4. Mwa May 2016—Nekuekelizwe kalulo ya mikopano ya puteho

5. Mwa May 2017—Nekuekelizwe kalulo yekonisa kuñola litaba

6. Mwa December 2017—Nekuekelizwe kalulo yekonisa kubala litaba za mwa Bibele ya Kuituta

7. Mwa March 2019—Nekuekelizwe kalulo yekonisa kuikungela litaba za kuteeleza, kubuha mavidio a fa app ye, ni kubala litaba za mwa lihatiso zefumaneha mwa Buka ya Lipatisiso

8. Mwa January 2021—Nekuekelizwe lika zekonisa kuikola litaba zeñwi zefumaneha mwa buka ya Muikole Bupilo Kuya Kuile!