Lipaki za Jehova baeza musebezi wa butokwa otusa batu mwa linaha zefitelela 200. Nihakulicwalo, mizwale ni likaizeli ba mwa linaha zebato eza 35 ki bona feela babakonanga kuzwisa linubu kuli bakwahele lisinyehelo zebabanga ni zona. Kono cwale mizwale ni likaizeli babapila mwa linaha zeshebile bona bakonanga cwañi kukwahela lisinyehelo zebabanga ni zona?

 Ba Sitopa Sesietelela banyakisisanga miinelo kuli bazibe zebatokwa Lipaki za Jehova mwa lifasi kaufela kuli bakone kulapela Jehova ni kukutaza taba yende. Banyakisisanga ka tokomelo kubona masheleñi atokwahala mi baitusisanga hande masheleñi kulikana ni mokulukiselizwe. Haiba ofisi ya mutai yeñwi iamuhela linubu zeñata hahulu kufita linubu zenetokwahala kuli musebezi uezwe mwa naha yeo, masheleñi asiyezi alumelwanga kwa mizwale babañwi mwa linaha zetokwa tuso. Ka kueza cwalo, balikanyisa mutala wa Bakreste ba kwa makalelo bane batusize Bakreste babañwi kuli “kuezwe ka kulikanelela.” (2 Makorinte 8:14) Bakreste bao nebaitusisize za ñambekelo zabona kuli bacimbule Bakreste babañwi bane bataelezwi.

 Mizwale baluna babaamuhezi linubu kuzwelela kwa mizwale babañwi baikutwa cwañi? Ka mutala, kwa Tanzania, buñata bwa batu babapila mwa naha yeo baipilisa ka masheleñi asakwani K40 ka zazi. Mizwale hane baamuhezi masheleñi ao, nebaitusisize ona kwa kulukisa Ndu ya Mubuso yene iitusiswa ki Puteho ya Mafinga. Puteho yeo neiñozi kuli: “Kuzwa feela foilukisezwa Ndu ya Mubuso, palo ya batu babafumanehanga kwa mikopano yaluna iekezehile hahulu! Lufitisa buitumelo bobutuna kwa kopano ya Jehova ni kwa mizwale baluna mwa lifasi kaufela kabakala bufani bwabona bobukonisize kuli lube ni muyaho omunde molukona kulapelela Mulimu.”

 Mizwale ni likaizeli baluna babañwi mwa naha ya Sri Lanka bakopana ni butata bwa kutokwa lico bakeñisa butuku bobuyambukela bwa COVID-19. Babañwi ku bona ki kaizeli yabizwa Imara Fernando ni mwanaa hae yomunyinyani wa libizo la Enosh. Kono ka tuso ya linubu za mizwale babona ba kwa linaha lisili, sebakona kufumana lika zebatokwa. Nebañozi cwana fa kadi yene balukisize bona bañi: “Lwaitumela kwa mizwale baluna baba lubonisize lilato ka nako yetaata ye. Lutabile hahulu kuli lu mwa lubasi lo, mi lulapela kuli Jehova azwelepili kutusa mizwale ni likaizeli baluna kaufela mwa mazazi a mafelelezo a.”

 Mizwale ni likaizeli mwa lifasi kaufela baitatela kuikabela ni babañwi zebanani zona. Ka mutala, Enosh, naalukisize kambokisi ka linubu mwanaaka beyanga linubu kuli atuse mabasi amañwi a mwa butokwi. Kaizeli yabizwa Guadalupe Álvarez ni yena ubonisa moya oswana. Upila kwa Mexico, mi mwa sibaka sapila ku sona, ki batu ba sikai feela babafiwanga tuwelo yabona ya ka kweli, mi fokuñwi mane habafiwangi feela sesiñwi. Nihakulicwalo, kaizeli yo uezanga mwakonela kaufela kufa nubu. Naañozi kuli: “Naitumela ku Jehova kabakala lika zende zaniezelize ni lilato lelituna lanibonisize. Naziba kuli nubu yaka ikakopanywa kwa linubu za babañwi mi ikatusa mizwale ni likaizeli baka babatokwile.”

 Mizwale babasebeleza kwa liofisi za mutai zelumanga masheleñi kuli atuse babañwi babanga ni tabo kuli batusa mizwale babona. Muzwale yabizwa Anthony Carvalho, ya mwa Katengo ka Mutai mwa naha ya Brazil naabulezi kuli: “Ka lilimo zeñata, nelutokwa tuso ya mizwale ba mwa linaha zeñwi kuli lukone kuba ni masheleñi ane lutokwa kuli lupete musebezi mwa naha yaluna. Bakeñisa tuso yene lufilwe, luboni zwelopili yetuna mwa naha yaluna. Ka nako ya cwale, lika selili kwateñi hande, mi lunani tohonolo ya kutusa babañwi ka kufa linubu. Mizwale ni likaizeli baluna mwa Brazil sebanahananga za musebezi omutuna wa kukutaza otokwa kuezwa mwa lifasi kaufela mi babata linzila za mwakutuseza kuli musebezi wo upetiwe.”

 Ki lika mañi zebakona kueza Lipaki za Jehova kuli batuse hande mizwale ni likaizeli babona babatokwa tuso? Bakona kutusa ka kufa linubu za musebezi wa mwa lifasi kaufela mwa sibaka sa kuluma masheleñi aya kwa liofisi za mutai mwa linaha lisili. Linubu zeo likona kubeiwa mwa mbokisi ya linubu za puteho fokuñozwi kuli “Musebezi wa Mwa Lifasi Kaufela” kamba kufa linubu ka kuitusisa donate.pr418.com. Linubu zeo kaufela zaitebuhiwa.