MUZWELEPILI KUTONA!
2022: Silimo Sesitahisize Hahulu Lipilaelo—Bibele Ibulelañi fa Taba Yeo?
Mwa silimo sa 2022, luutwile hahulu lipiho za makande zebulela ka za lindwa, kutotobela kwa sifumu, ni likozi za ka taho. Bibele ki yona feela yebulela zetahisa luli miinelo yeo.
Lika zetahisize miinelo yeezahezi mwa 2022
Lika zeezahezi mwa silimo sesifelile liekeza feela kwa bupaki bwa kuli lupila mwa mazazi eibiza Bibele kuli ki “mazazi a mafelelezo.” (2 Timotea 3:1) Mazazi ao naakalile ka silimo sa 1914. Mulemuhe mo lika zesazo ezahala liswalisanela ni lika zene ipolofitile Bibele ka za nako yelupila ku yona:
“Lindwa.”—Mateu 24:6.
“Silimo sa 2022 ki Sona Silimo Seo Lika Zemaswe Hahulu Zetahiswa ki Lindwa Neliezahezi Hape Mwa Europe.” a
Mubone taba yeli, “Naha ya Russia Itaseza Naha ya Ukraine.”
‘Kutaela kwa lico.’—Mateu 24:7.
“2022: Silimo Fokubezi ni Tala Yetuna Hahulu.” b
Mubone taba yeli, “Ndwa Yeezahala Kwa Ukraine Itahisa Kuli Lico Litaele Hahulu Mwa Lifasi Kaufela.”
“Matuku ayambukela.”—Luka 21:11.
“Kukuta kwa butuku bwa polio, kubateñi kwa butuku bwa monkeypox ni kuzwelapili kwa butuku bwa COVID-19, kutahisize kuli kube ni matuku amañata ayambukela ni kuli batu babe mwa lubeta.” c
Mubone taba yeli, “Batu ba 6 Milioni Babulailwe ki COVID.”
“Lika zesabisa.”—Luka 21:11.
“Kucisa hahulu, linanga, mulilo wa mwa mushitu, ni muunda. Mbumbi ya silimo sa 2022 ikahupulwa hahulu kabakala kucisa kokutuna kokutahisize kusinyeha kwa lika, mafu a batu babañata, ni kutahisa kuli batu babañata basinyehelwe ki mandu abona.” d
Mubone taba yeli, “Mwa Lifasi Kucisa Hahulu.”
“Mifilifili [kamba, “kukwenuhelana,” litaluso ze kwatasi].”—Luka 21:9.
“Bakeñisa kuli batu nebanyemisizwe hahulu ki kutotobela kwa sifumu, sihulu kabakala kupahama kwa liteko, nekubile ni mifilifili yemiñata yetahiswa ki likwata zelwanisa muuso mwa 2022.” e
Mubone taba yeli, “Liteko Lisweli Kupahama Hahulu Mwa Lifasi Kaufela.”
Ki lika mañi zekaezahala silimo sesitaha?
Hakuna yakona kutalusa luli zekaezahala mwa silimo sa 2023. Zeluziba feela kikuli honacwale-cwale fa Mubuso wa Mulimu, kamba mubuso wa kwa lihalimu ukatahisa licinceho zetuna fa lifasi. (Daniele 2:44) Mubuso wo ukafelisa lika zetahiseza batu manyando ni kubona teñi kuli tato ya Mulimu yaeziwa fa lifasi.—Mateu 6:9, 10.
Lumisusueza kulatelela kelezo ya Jesu Kreste ya kuli “muzwelepili kutona” kuli mubone mo lika zeezahala mwa lifasi litaleleleza bupolofita bwa mwa Bibele. (Mareka 13:37) Muambole ni yomuñwi wa Lipaki za Jehova kuli muitute zeñata ka za mo Bibele ikona kumituseza ka nako ya cwale ni moikona kumituseza ni lubasi lwamina kuba ni sepo yende ya za kwapili.
a “Silimo sa 2022 ki Sona Silimo Seo Lika Zemaswe Hahulu Zetahiswa ki Lindwa Neliezahezi Hape Mwa Europe,” piho ya Jill Lawless, ya la December 8, 2022 fa mutai wa makande wa AP.
b Katengo ka World Food Programme, “Kutaela Kwa Lico Mwa Lifasi Kaufela.”
c Piho ya ba JAMA Health Forum, “Kupila ka Nako ya Matuku Ayambukela—Kuzwa Kwa Butuku Bwa COVID-19 Kuya Kwa Butuku Bwa Monkeypox, Polio, ni Butuku Bwa X,” neibihilwe ki Lawrence O. Gostin, JD, la September 22, 2022.
d “Ki Nto Mañi Yetahisize Kuli Mbumbi ya Silimo sa 2022 Icise Hahulu?” piho ya Martina Igini, ya la October 24, 2022 fa webusaiti ya Earth.Org.
e Katengo ka Carnegie Endowment for International Peace, “Bunyemi Bobutahisizwe Ki Kutotobela Kwa Sifumu Butahisize Mifilifili Mwa Lifasi Kaufela Mwa 2022,” piho ya Thomas Carothers ni Benjamin Feldman, ya la December 8, 2022.
Hape Mwendi Mwakona Kutabela Litaba Ze
TAWALA YA MULIBELELI
Mulimu Atuha Afelisa Manyando Kaufela
Lukona kuziba cwañi kuli Mulimu atuha aanga muhato wa kufelisa manyando kaufela ni kusaluka?
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
MAVIDIO A LITUTO ZA BUTOKWA ZA MWA BIBELE
Mubuso wa Mulimu Ukalile Kubusa ka 1914
Lilimo zefitelela 2,500 kwamulaho, Mulimu naatahisize kuli mulena yomuñwi yamaata abone tolo yesweli kutalelezwa mwa linako zaluna.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
