Halunze lukala silimo sa 2023, kaufelaa luna lunani sepo ya kuli lika lika luzamaela hande ni lubasi lwaluna. Ki kabakalañi halukona kuba ni sepo?

 Mwa Bibele kunani taba yende ya kuli miinelo yetaata yelukopana ni yona cwale ki ya ka nakonyana feela mi ikatuha ifela. Mane litaba ze mwa Bibele “neliñolezwi kululuta, kuli . . . ka kuomba-ombiwa ki Mañolo lukone kuba ni sepo.”—Maroma 15:4.

•   Kuli muitute zeñata ka za lisepiso za mwa Bibele, mubale taba yeli “A Real Hope for a Better Tomorrow.”

 Sepo ya mwa Bibele ikona kuba sina “ankora ya bupilo bwaluna.” (Maheberu 6:19) Sepo yeo yakona kulutusa kutiyela miinelo yetaata yelukopana ni yona ka nako ya cwale, kuba ni mubonelo omunde, ni kuba ni tabo yesafeli. Ka mutala:

•   Mulemuhe mo sepo ya mwa Bibele neituselize muuna yomuñwi kutuhela mukwa omaswe. Mubuhe vidio yeli, Neninyikwile Mupilelo Waka.

•   Mubone mo sepo ya mwa Bibele ikona kulutuseza halushwezwi ki mutu yelulata. Mubuhe vidio yeli, Zekona Kuomba-Omba Babashwezwi.

 Batu babañata banani milelo yebabata kupeta kwapili, kono habana buikolwiso bwa kuli bakapeta milelo yeo. Nto yeo yashutana ni zeisepisa Bibele. Ki kabakalañi? Kakuli lisepiso za mwa Bibele lizwa ku Jehova Mulimu a luli, “yasakoni kupuma.” (Tite 1:2) Jehova ki yena feela yanani maata a kutaleleza lisepiso zahae; wakona kueza “zalata kaufela.”—Samu 135:5, 6.

 Lwamimema kuli mutusiwe ki lisepiso za mwa Bibele zelukona kusepa. Mwakona kusepa hahulu lisepiso ze ka ‘kutatuba Mañolo ka tokomelo.’ (Likezo 17:11) Muiponele taba yeo ka kuamuhela tuto ya Bibele yesalifelwi. Mukale silimo sa 2023 inze munani sepo ya za kwapili!