MUZWELEPILI KUTONA!
Silimo sa 2023 Sitahisize Hahulu Lipilaelo—Bibele Ibulelañi fa Taba Yeo?
Mwa silimo sa 2023, kuezahezi lika zeñata mwa lifasi kaufela zebonisa kuli lupila mwa mazazi abulezwi mwa Bibele kuli “mazazi a mafelelezo.” (2 Timotea 3:1) Mulemuhe mo lika zesweli kuezahala kacenu lilumelelanela ni lika zene ipolofitile Bibele kuli lika ezahala mwa mazazi aluna.
Bibele ni lika zesweli kuezahala mwa lifasi kaufela
“Lindwa ni lipiho za lindwa.”—Mateu 24:6.
“Lindwa lizwelapili kuekezeha mwa libaka zeñata za mwa lifasi.” a
Mubone taba yeli, “Ki Mañi Yakasileleza Batu Kwa Lindwa Kamba Mifilifili?” ni yeli, “Mibuso Mwa Lifasi Kaufela Iitusisize Masheleñi Afitelela Madola A Kwa America A 2 Trilioni Mwa Lindwa.”
“Lizikinyeho mwa sibaka sesiñwi kuya ku sesiñwi.”—Mareka 13:8.
“Kuzwa feela kwa makalelo a silimo sa 2023, kubile ni lizikinyeho ze 13 zetuna hahulu mwa lifasi kaufela, ili palo yetuna hahulu ya lizikinyeho zeezahezi mwa silimo silisiñwi.” b
Mubone taba yeli, “Kuezahala Zikinyeho Yetuna Mwa Turkey ni Mwa Syria.”
“Lika zesabisa.”—Luka 21:11.
Bo António Guterres, bañoli ba kopano ya UN nebabulezi kuli: “Kucisa kokusweli kuekezeha mwa lifasi kacenu kutahisa kuli lifasi licise hahulu nikufita.” c
Mubone taba yeli, “Kucisa Hahulu Mwa Lifasi Kaufela ka Nako ya Mbumbi ya Silimo sa 2023.”
‘Kutaela kwa lico.’—Mateu 24:7.
“Mwa silimo sa 2023, batu babañwi babile ni lipilaelo zeñata hahulu kabakala kupalelwa kufumanela mabasi abona lico.” d
Mubone taba yeli, “Kutaela Kwa Lico Mwa Lifasi Kaufela Kabakala Lindwa ni Butata Bwa Kubata Kamba Kucisa Hahulu.”
“Linako zetaata, zeziyeza.”—2 Timotea 3:1.
“Mwa lifasi kaufela, mutu alimuñwi mwahalaa batu ba 8 ukula butuku bobuñwi bwa mwa munahano.” e
Mubone taba yeli, “Butuku Bwa Mwa Munahano Buzwelapili Kuekezeha ku Babanca.”
Ki lika mañi zelukona kulibelela mwa 2024?
Hakuna mutu yaziba luli zekaezahala mwa 2024. Kono lika zesweli kuezahala mwa lifasi libonisa kuli honacwale-cwale fa Mubuso wa Mulimu, kamba mulonga wa kwa lihalimu, ukafelisa mibuso ya batu ni kufelisa lika kaufela zetahisa manyando ni lipilaelo.—Daniele 2:44; Sinulo 21:4.
Ka nako ya cwale, haluikutwa kuba ni lipilaelo luitinge ku Mulimu kuli alutuse. Bibele ibulela kuli:
“Hanisabile, nisepanga wena.”—Samu 56:3.
Lukona kubonisa cwañi kuli lusepile Mulimu? Lwamimema kuli muitute zeñata ka za sepiso ya mwa Bibele yebulela za lifasi mokusike kwaba ni manyando. Mulike kuamuhela tuto yaluna ya Bibele yesalifelwi kuli mubone mo lisepiso za mwa Bibele likona kutuseza mina ni lubasi lwamina.
a Litaba za Linaha Lisili, “Lifasi Lelitezi Lindwa: Ki Lika Mañi Zetahisa Lindwa Zeñata Mwa Lifasi Kaufela?” piho ya bo Emma Beals ni bo Peter Salisbury, ya la October 30, 2023.
b Makande Abulela za Lizikinyeho, “Silimo sa 2023: Palo ya Lizikinyeho Zetuna Zebile Teñi,” piho ya mwa May, 2023.
c Kopano ya United Nations, “Manzwi a Makalelo a Muñoli wa kopano ya UN Kwa Mukopano One Ubulela za Kucisa ni Kubata,” la July 27, 2023.
d Piho ya ba World Food Programme yebulela za “Butata Bwa Kutaela Kwa Lico Mwa Lifasi Kaufela.”
e Piho ya ba World Health Organization fa lizazi la “World Mental Health Day 2023,” la October 10, 2023.
Hape Mwendi Mwakona Kutabela Litaba Ze
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
LIKALABO KWA LIPUZO ZA BIBELE
Kana Mwakona Kufumana Manzwi Aomba-Omba Mwa Bibele?
Litimana za mwa Bibele liomba-ombile batu babañata babakopana ni miinelo yetaata ni babazwafile.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
