Bibele Ibulelañi ka za Butata Bwa Kutokwa Mezi Akenile Mwa Lifasi Kaufela?
Kaufelaa luna lutokwa mezi akenile kuli lupile. Kono bo António Guterres bañoli ba kopano ya UN nebabulezi kuli: “Bakeñisa kuli kutokwahala mezi amañata mwa lifasi kaufela, lutalimana ni butata bobutuna hahulu bwa kutokwa mezi akenile.” Batu babañata-ñata mwa lifasi kaufela kacenu bakopana ni butata bwa kusafumana hande mezi a kunwa akenile.
Strdel/AFP via Getty Images
Kana butata bo bukatatululwa nako yeñwi? Kamba kana bukazwelapili? Bibele ibulelañi fa taba yeo?
Zeisepisa Bibele ka za mezi
Bibele ibulela kuli butata bwa kutokwa mezi akenile bukafeliswa kwapili. Mane, kukaba ni mezi amande amañata.
“Mezi akawelauka mwa lihalaupa, mi linukana likabuba mwa lihalaupa. Naha yecisa, yeomile ikafetuha sibaka sa mezi sa mataka, mi naha yesina mezi ikawelauka mezi.”—Isaya 35:6, 7.
Ki kabakalañi halukona kulumela sepiso yeo? Munyakisise zeibulela Bibele ka za taba yeñwi yebonisa molibupezwi lifasi laluna.
Zeibulela Bibele ka za lifasi ni mupotoloho walona wa mezi
‘[Mulimu] naasika bupa feela [lifasi] kusina mulelo, kono naaliezize kuli liyahiwe.’—Isaya 45:18.
Bakeñisa kuli Mulimu naabupile lifasi ka nzila yetahisa kuli zepila kaufela lizwelepili kupila, naaezize lika zetahisa kuli kube ni mezi amande amañata.
“[Mulimu] uhohela malotoli a mezi kwahalimu; abupeha kuba pula kuzwa fa mbundu yahae; cwale malu kihona anelisa pula; ashulumukiseza batu mezi.”—Jobo 36:27, 28.
Taba ye italusa ka bukuswani mo Mulimu naabupezi lifasi ka nzila yetahisa kuli mezi azwelepili kubateñi fa lifasi. Mezi azwanga fa lifasi ni mwa mawate kuya mwa mbyumbyulu, ni kuyobupeha kuba malu mi hasamulaho ashulumukelanga fa lifasi sina pula, ili nto yetahisa kuli fa lifasi kuzwelepili kuba ni mezi amande akenile akona kuitusiswa ki batu ni lifolofolo.—Muekelesia 1:7; Amosi 5:8.
“Nika mineliseza pula ka nako yeswanela, mi naha ikabeya lico, ni likota za naheñi likabeya miselo yazona.”—Livitike 26:4.
Mulimu naasepisize kufuyaula Maisilaele ba kwamulaho bane bali balimi, ka kubafa kutulo yende mi naaezize cwalo ka kutahisa kuli pula inelange nako kaufela. Waziba kuli, kuli lukone kulima lico zeñata, lutokwa pula ka nako yeswanela.
Mulimu atuha aezeza lifasi kaufela lika zanaaezelize Maisilaele ba kwamulaho. (Isaya 30:23) Ka nako ya cwale, mwa libaka zeñata mwa lifasi kaufela, batu bazwelapili kukopana ni butata bwa kutokwa mezi amande, mi yeñwi ya lika zetahisa butata bo ki kusanela hande kwa pula. Ki lika mañi zeñwi zeibulela Bibele ka za zekona kutatulula butata bwa kutokwa mezi akenile bobakopana ni bona batu kacenu?
Mobuka tatululelwa butata bwa kutokwa mezi akenile
Bibele ibulela kuli Mulimu ukafelisa lika zesweli kusinya lifasi laluna kukopanyeleza cwalo ni butata bwa kutokwa mezi akenile ka kuitusisa Mubuso wahae. (Mateu 6:9, 10) Mubuso wa Mulimu ki mulonga okwa lihalimu okabusa lifasi kaufela. (Daniele 2:44; Sinulo 11:15) Hape, Mubuso wa Mulimu ukaeza lika zeisa koni kueza milonga ya lifasi le—ili kufelisa lika zetahisa butata bwa kutokwa mezi akenile.
Butata: Butata bwa kubata kamba kucisa hahulu buamile hahulu mupotoloho wa mezi. Butahisize kuli mwa libaka zeñwi kube ni linanga lelituna hamoho cwalo ni muunda omutuna, okona kutahiswa ki pula yeñata hahulu kamba kuekezeha kwa mezi a mwa mawate.
Tatululo: Mubuso wa Mulimu ukalukisa sinca lifasi ilikuli libe mwa muinelo omunde hape. Mulimu usepisize kuli: “Bona! Lika kaufela nilieza zenca.” (Sinulo 21:5) Mwa libaka zeomile kukaba ni mezi amañata amande, ili nto yekatahisa kuli zepila kaufela liikole kupila ni mwa libaka mokusa koni kupila batu ka nako ya cwale. (Isaya 41:17-20) Jesu Kreste ukaba ni maata fahalimwaa lifasi, Mubuso wa Mulimu hauka busa lifasi.
Jesu hanaali fa lifasi, naaombalisize liwate mi ka kueza cwalo naabonisize maata anaamufile Mulimu. (Mareka 4:39, 41) Mwatasaa puso ya Kreste, yena Mulena wa Mubuso wa Mulimu, likozi za ka taho likafeliswa. Batu bakaikola kozo ya luli ni buiketo mi habana kuikalelwa ka za kozi ifi kamba ifi.
Butata: Batu babasina taba ni butata bobukona kuzwa mwa likezo zabona ni tutengo twa batu babanani mukwañuli baezanga lika zetahisa kuli mezi a mwa linuka, masa hamohocwalo ni mezi a kwatasaa mubu abe a masila, ili kuekeza kwa butata bwa kutokwa hande mezi akenile.
Tatululo: Mulimu ukakenisa lifasi mi ukatahisa kuli masa, linuka, mawate ni mubu libe zekenile. Lifasi likaba paradaisi. Ka manzwi a litoko, Bibele ibulela kuli: “Lihalaupa ni naha yeomile likanyakalala, mi lihalaupa likawabelwa ni kutubula lipalisa sina safrani.”—Isaya 35:1.
Ki lika mañi zekaezahala kwa batu babasa babaleli lifasi ni babasa isi pilu batu babañwi? Mulimu usepisa kuli ‘ukasinya babasinya lifasi.’—Sinulo 11:18; Liproverbia 2:21, 22.
Butata: Batu habaitusisi hande lika zetahisa kuli kube ni mezi amañata, ili nto yetahisa kuli kusinyehe mezi amañata hahulu kufita mezi aliteñi mwa lifasi.
Tatululo: Mubuso wa Mulimu, ukatahisa kuli tato yahae “iezwe fa lifasi”—isiñi tato ya batu babanani buitati. (Mateu 6:9, 10) Mubuso wa Mulimu ukafa babusiwa baona tuto yende hahulu ka kufitisisa. Isaya 11:9 ibulela kuli, “Lifasi likatala zibo ya Jehova.” a Batu habakaba ni zibo yetuna ye, hamohocwalo ni lilato lelituna ku Mulimu ni kwa pupo yahae, bakababalela hande lifasi laluna lelinde ni lika zeinzi mwateñi.
Kuli muzibe zeñata ka za zeuka eza Mubuso wa Mulimu, mubone taba yeli, “Mubuso wa Mulimu Ukaezañi?”
Mubale buka ya mwa Bibele ya Isaya kauhanyo 35, ilikuli muipalele ka za mo lifasi likabela paradaisi.
Mubuhe vidio yeli, Mulimu Naabupeziñi Lifasi? kuli muzibe zeñata ka za mulelo wa Mulimu ka za lifasi ni batu.
a Jehova ki lona libizo la Mulimu. (Samu 83:18) Mubale taba yeli, “Jehova ki Mañi?”
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Bibele Ibulelañi ka za Likozi za ka Taho?
Kana likozi za ka taho ki koto yezwa ku Mulimu? Kana Mulimu watusanga batu babatahezwi ki likozi za ka taho?
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
