Ka kuya ka katengo kakatalima za makete mwa lifasi kaufela ka World Health Organization (WHO), haluto fitanga la May 23, 2022, butuku bwa COVID-19 nese bubulaile batu babafita fa 6.27 milioni. Nihakulicwalo, mwa makande anaahatisizwe la May 5, 2022, katengo ka, (WHO) neka akalelize kuli palo ya batu babashwile ki yetuna hahulu kufita yeo. Nekabulezi kuli mwahalaa silimo sa 2020 ni 2021, “palo kaufela ya bane babulailwe ki butuku bwa COVID-19 luli kamba bane babulailwe ki miinelo yemiñwi yeswalisana ni butuku bo . . . nebabato eza 14.9 milioni.” Kana kunani zeibulela Bibele ka za miinelo yetomohisa pilu yeswana ni yeo?

•   Jesu naabulezi cimo kuli kukaba ni matuku ayambukela kamba kuata kwa “matuku abulaya” mwa nako yebizwa “mazazi a mafelelezo.”—Luka 21:11, Contemporary English Version; 2 Timotea 3:1.

 Bupolofita bwa Jesu busweli bwatalelezwa kacenu. Kuli muzibe zeñata, mubale taba ya sikuwa yeli “What Is the Sign of ‘the Last Days,’ or ‘End Times’?”

•   ‘Mulimu yaomba-omba mwa miinelo kaufela, waluomba-omba mwa manyando aluna kaufela.’—2 Makorinte 1:3, 4.

 Batu babañata babashwezwi ki balatiwa babona baomba-ombilwe ki litaba ze mwa Bibele. Muitute zeñata mwa taba yeli “Kutiyela Muinelo wa Kushwelwa—Zemukona Kueza Cwale” ni yeli “Zekona Kutusa Hande Babashwezwi.”

•   “Mubuso wahao utahe. Tato yahao iezwe fa lifasi, sina moiezezwa kwa lihalimu.”—Mateu 6:10.

 Honacwale-cwale fa “Mubuso wa Mulimu” ukatahisa kuli kusike kwaba ni mutu “yayahile mwa naha yakali: ‘Nakula.’” (Mareka 1:14, 15; Isaya 33:24) Mubuhe vidio yeli Mubuso wa Mulimu ki Nto Mañi? kuli muzibe ka za mubuso wa kwa lihalimu wo ni zeuka eza.

 Lwamimema kuli muitute zeñata ka za zeibulela Bibele ili kuli mina ni lubasi lwamina mutusiwe ki likelezo zende ni lisepiso zetabisa ze kuyona.