Kuzwisiwa musebezi kukona kutahisa kuli kumibele taata kufumana lika zemutokwa ni lubasi lwamina, ni kutahisa kuli muikutwe hahulu bumaswe. Kunyakisisa liakalezo zelatelela zetomile fa likuka za Bibele kwakona kumitusa.

•   Mutaluseze babañwi momuikutwela.

   Zeibulela Bibele: “Mulikani wa niti ubonisa lilato ka nako kaufela.”—Liproverbia 17:17.

   Hamulaho wa kuzwisiwa musebezi, mukona kuikutwa hahulu bumaswe, kunyema, kusaziba za kueza, kamba kuikutwa kuli hakuna zemukona kueza mwa bupilo. Haiba mutaluseza ba lubasi lwamina ni balikani bamina momuikutwela, bakona kumitusa kuikutwa hande. Hape bakona kumifa kelezo yekona kumitusa kufumana musebezi usili.

•   Muambuke kubilaela hahulu.

   Zeibulela Bibele: “Musike mwabilaela za lizazi lelitatama, kakuli lizazi lelitatama litaha ni lipilaelo zalona.”—Mateu 6:34.

   Bibele ilususueza kulelelanga cimo za kwapili. (Liproverbia 21:5) Nihakulicwalo, hape ilususueza kuambuka kubilaelanga hahulu ka za kwapili. Hañata lubilaezwanga ki lika zesike zaezahala. Neikaba hande kuisa pilu ku zemukona kueza mwa lizazi leo ni kusabilaela za kamuso.

   Bibele hape ifa kelezo yeñwi yende ya zemukona kueza hamuziyelehile sina momuikutwela ka nako ya cwale. Kuli muzibe zeñata mubale taba yeli: “Zemukona Kueza Hamuziyelehile.”

•   Mueze licinceho ka za momuitusiseza masheleñi.

   Zeibulela Bibele: “Niitutile . . . mwakupilela haniatezwi ni mwakupilela hanisina sesiñwi.”—Mafilipi 4:12.

   Mueze licinceho kulikana ni muinelo omuli ku ona. Taba ye ikopanyeleza kucinca mone muitusisezanga masheleñi kuli mukone kuitusisa feela masheleñi emunani. Mutokomele kuli hamubi ni likoloti zesaswaneli.—Liproverbia 22:7.

   Kuli muzibe zeñata ka za momukona kuitusiseza hande masheleñi, mubone taba yeli, “Mo mu Kona ku Pilela ha mu si na Hande Mali.”

•   Muitusise hande nako yamina.

   Zeibulela Bibele: “Muzwelepili kuzamaya ka butali . . . , inze muitusisa hande nako yamina.”—Makolose 4:5.

   Nihaike kuli hamusa latelela tomahanyo ya kwa musebezi kone mubeleka, muzwelepili kuitusisa hande nako yamina. Haiba mueza cwalo mukaezanga lika ka nako yeswanela mi hamuna kuikutwa kuli hakuna zemukona kueza mwa bupilo bwamina.

•   Mube babacinca-cina.

   Zeibulela bibele: “Musebezi kaufela oezwa ka taata watusa.”—Liproverbia 14:23.

   Muikatulele kueza musebezi nihaiba oshutana ni one muezanga. Mwakona kueza nihaiba misebezi yeengiwa kuba ya kwatasi kamba yesakoni kumifumanisa masheleñi alikana ni ene muholanga kwa musebezi ofelile.

•   Musike mwazwafa.

   Zeibulela Bibele: “Cala peu yahao kakusasana, mi lizoho lahao lisike lapumula kuisa manzibwana; kakuli hauzibi kuli ki peu ifi yekakonda.”—Muekelesia 11:6.

   Muzwelepili kubata musebezi. Mutaluseze babañwi kuli mubata musebezi. Muambole ni bahabo mina, batu bemuziba, bane mubelekana ni bona, ni bomuyahile ni bona. Mukene fa ma webusaiti afundota ka za misebezi, ni kubalanga mapepa amamekilwe fa miyaho kamba fa likota. Mubate misebezi yeshutana-shutana mi mufe babaka buisana ni mina hamukupa musebezi litaba zamina za ka butu mi mwendi mwakona kufumana musebezi.