Batu bababato ba 5 bilioni bakabuha babapali babazwa mwa linaha ze 206 babaka bapala mwa likangisano zekaeziwa mwa silimo se sa 2024 ka nako ya mbubi. Mueteleli wa Katengo ka Likangisano za Mwa Lifasi Kaufela yabizwa Thomas Bach naabulezi kuli: “Lueza nto yetahisa kuli batu baswalisane ka kozo mwa lifasi kaufela. Haike kaufelaa luna luswalisane ni kupilisana ka kozo kusina taba kuli lu batu ba lisimuluho zeshutana-shutana, mi wo ki ona mulelo wa Lipapali ze.”

 Kana Lipapali za Likangisano zakona kutahisa kuli batu baswalisane? Kana luli nako yeñwi lukakona kuswalisana ni kupilisana ka kozo?

 Lipapali za Likangisano za silimo se, litahisize kuli batu basike banahana feela ka za lipapali. Lipapali ze likoñomekile hahulu lika zeama mupilelo wa batu ni litaba za lipolitiki, ili zekauhanyanga batu. Lika zeo likopanyeleza liswanelo za batu, ketululo ya mubala, ketululo ya bulapeli, ni kuunga batu kuli bashutana.

 Lipapali za mwa lifasi kaufela zecwale ka Lipapali za Likangisano zatabisanga batu. Nihakulicwalo, lipapali ze hape litahisanga kuli batu babonise mikwa yetahisanga kuli bakauhane kufita kuli baswalisane ni kupilisana ka kozo.

 Bibele neipolofitile kuli batu kacenu nebakaba ni mikwa yene ikatahisa kuli batu mwa lifasi kubabele taata kuswalisana. (2 Timotea 3:1-5) Kuli muzibe zeñata ka za bupolofita bwa mwa Bibele bo, mubale taba yeli, “Kana Bibele Neipolofitile ka za Munahanelo ni Mikwa Yebanani Yona Batu Kacenu?”

 Bibele ibulela za nto iliñwi feela yekakona kutusa batu kuswalisana ni kupilisana ka kozo mwa lifasi kaufela. Isepisa kuli batu kaufela fa lifasi bakaswalisana habaka busiwa ki mulonga wa kwa lihalimu, ona “Mubuso wa Mulimu.”—Luka 4:43; Mateu 6:10.

 Mulena wa Mubuso wo, yena Jesu Kreste, ukatahisa kuli batu mwa lifasi kaufela bapilisane ka kozo. Bibele ibulela kuli:

•   “Yalukile ukakonda, mi kozo ikaekezeha.”—Samu 72:7.

•   “Ukalamulela mubotana yalilela kutusiwa . . . Uka balamulela kwa buhateleli ni kwa mifilifili.”—Samu 72:12, 14.

 Nihaiba kacenu, lituto za Jesu litusize batu babañata babazwa mwa linaha ze 239 kuswalisana. Ka kuba Bakreste, Lipaki za Jehova mwa lifasi kaufela, baitutile mwakupilisanela ka kozo. Kuli muzibe zekonile kubatusa kueza cwalo, mubale Tawala ya Mulibeleli yenani toho ya taba yeli, “Zekona Kulutusa Kufelisa Sitoyo.”