Mukopano wa United Nations Climate Change Conference (COP27) neufelile la Sunda, November 20, 2022. Nihaike kuli batu bane bafumanehile kwa mukopano wo nebalumelelani kuli linaha zeshebile lifiwe masheleñi akuitusisa kwa kutiyela butata bwa kubata ni kucisa hahulu, batu babañata nebabulezi kuli kueza cwalo hakuna kutatulula butata bo.

•   La November 19, 2022, António Guterres, yomuhulu wa kopano ya UN naabulezi kuli, “Nalumelelana ni muhupulo wa kufa linaha zeshebile masheleñi a kuitusisa kwa kutiyela butata bwa kubata ni kucisa hahulu. Kono kueza cwalo hakusika likana . . . Lifasi laluna limwa muinelo omaswe hahulu.”

•   La November 20, 2022, Mary Robinson, yanaabanga mueteleli wa naha ya Ireland mi hape naabanga Mueteleli Yomuhulu wa Kopano ya UN yatalima za Litukelo za Batu, naabulezi kuli, “Muinelo wa lifasi wa kubata ni kucisa hahulu ukatuha utotobela hahulu ni kutahiseza batu kaufela butata.”

 Babanca sihulu baikalezwi hahulu ka za zekaezahala kwa lifasi laluna kwapili. Nihakulicwalo, kana mibuso yakona kuswalisana kuli ikone kutaleleza sepiso ya yona ya kutatulula butata bwa kubata ni kucisa hahulu? Bibele ibulelañi ka za taba yeo?

 Bibele ibonisa hande kuli nihaike kuli mibuso ikaeza sesiñwi kuli itatulule butata bwa kubata ni kucisa hahulu, haina kukona kufeza butata bo. Munyakisise mabaka amabeli haisike yakona kueza cwalo:

•   “Sesikopami hasikoni kuotololwa.”—Muekelesia 1:15.

   Taluso: Mibuso haikoni kueza lika kaufela bakeñisa kuli batu nebasika lukisezwa kubusa batu babañwi. (Jeremia 10:23) Mibuso nihaneika beleka ka taata ni kuswalisana, neisike yakona kutatulula miinelo yetaata ye mwa lifasi.

•   “Kakuli batu bakaba baitati, babalata masheleñi, . . . babañañelela mihupulo yabona.”—2 Timotea 3:2, 3.

   Taluso: Bibele neipolofitile ka kunepahala kuli batu babañata mwa mazazi aluna nebakaba baitati ni babasa lati kubeleka hamoho kuli batuse babañwi.

 Nihakulicwalo, lika zekaezahala kwa lifasi laluna kwapili halisika itinga fa lisepiso za mibuso ya batu. Mulimu uketile Mubusi wa lifasi yaswanela, yena Jesu Kreste. Bibele ibulela ka za hae kuli:

•   “Mubuso ukaba fa liheta lahae. Mi ukabizwa Muelezi Yomunde, Mulimu Yamaata, Ndate wa Kamita, Nduna wa Kozo.”—Isaya 9:6, litaluso ze kwatasi.

 Jesu ki Mulena wa Mubuso wa Mulimu, kamba mubuso wa kwa lihalimu. (Mateu 6:10) Unani maata, butali, ni takazo ya kubabalela lifasi laluna ni libupiwa zepila mwateñi. (Samu 72:12, 16) Mwatasaa zamaiso ya Jesu Kreste, mubuso wa kwa lihalimu wo uka yundisa batu “babasinya lifasi” mi ukatahisa kuli lifasi libe lelinde hape.—Sinulo 11:18; Isaya 35:1, 7.

 Kuli muitute zeñata ka za zeka tatulula butata bwa kubata ni kucisa hahulu, mubale taba yeli “Climate Change and Our Future—What the Bible Says.”