Kana ni mina semubona kuli kuzwelapili kuba taata kuziba litaba za niti ni za buhata? Batu kacenu babonahala kuli balumelanga litaba kulikana ni mobaikutwela ka za taba yeo ni ka kuya ka zebanahana kufita kulumela litaba kabakala kuli litomile fa niti. Mwa lifasi kaufela kacenu, batu babañata balumela kuli hakuna niti.

 Mubonelo wo haki omunca. Ibato ba lilimo ze 2,000 kwamulaho, Mubusisi wa Muroma Ponse Pilato naasheunuzi Jesu ka kumubuza kuli: “Niti kiñi?” (Joani 18:38) Nihaike kuli Pilato naasika libelela kuli Jesu amualabe, puzo yanaabuzize ki ya butokwa. Bibele ialaba puzo ya butokwa yeo ka nzila yekona kumikolwisa, mi yakona kumitusa kuziba litaba za niti ni za buhata mwa lifasi le mokunani batu babasa zibi niti.

Kana niti iteñi luli?

 Eni. Bibele iitusisa linzwi la “niti” kuama kwa litaba zetomile fa niti ni kwa lika zelukile. Mane Bibele iluta kuli Jehova a Mulimu ki yena Simbule sa niti ya luli, mi ubizwa kuli ki “Mulimu yanani niti.” (Samu 31:5) Mwa Bibele kufumaneha niti yezwa ku Mulimu, mi ibapanya niti yeo kwa liseli, kakuli yakona kuluetelela mwa miinelo yeshutana-shutana yeliteñi mwa lifasi kacenu.—Samu 43:3; Joani 17:17.

Mukona kufumana cwañi niti?

 Mulimu habati kuli lulumele niti ya mwa Bibele kusina kunahanisisa. Kono, ulukupa kuli lutatube niti yeo ka kuitusisa maata aluna a kunahana kufita kuitinga fa maikuto aluna. (Maroma 12:1) Ubata kuli lumuzibe ni kumulata ka ‘munahano waluna kaufela,’ mi ulususueza kuli luikolwisise kuli zeluituta mwa Bibele ki za niti.—Mateu 22:37, 38; Likezo 17:11.

Ki mañi yanaakalile kubulela buhata?

 Bibele ibulela kuli buhata nebukalisizwe ki Satani Diabulosi yena sila sa Mulimu, yabizwa mwa Bibele kuli ki “ndatahe buhata.” (Joani 8:44) Naabulelezi batu bapili litaba za buhata ka za Mulimu. (Genese 3:1-6, 13, 17-19; 5:5) Kuzwa feela nako yeo, Satani uzwezipili kuhasanya litaba za buhata ni kupata niti ka za Mulimu.—Sinulo 12:9.

Ki kabakalañi bupumi habuatile hahulu kacenu?

 Mwa linako zaluna, ili zebizwa mwa Bibele kuli “mazazi a mafelelezo,” Satani usweli wakukueza batu ni kubapuma hahulu kufita lili kaufela. Batu hañata babulelanga buhata kuli bapume babañwi ni kubaeza maswe. (2 Timotea 3:1, 13) Hape buhata buatile hahulu mwa bulapeli bobuñata kacenu. Sina feela mone ipolofitezi Bibele ka za linako zaluna, batu ‘baikubukanyeza baluti kuli bababulelele zebalata kuutwa mwa mazebe abona,’ mi baiketela ‘kuhana kuteeleza kwa niti.’—2 Timotea 4:3, 4.

Ki kabakalañi niti haili ya butokwa?

 Niti ikona kutusa batu kusepana. Kusasepana kukona kutahisa kuli bulikani busike bwatiya ni kuli kusike kwaba ni swalisano mwa libaka zelupila ku zona. Bibele ibonisa kuli Mulimu ubata kuli bulapeli bwaluna butome fa niti. Ibulela kuli: ‘Babalapela Mulimu balukela kumulapela ka moya ni ka niti.’ (Joani 4:24) Kuli muitute mo Bibele ikona kumituseza kulemuha lituto za buhata zebuluta bulapeli ni momukona kulukululelwa kwa lituto zeo, mubale taba yeli, “Ki Kabakalañi Batu Babañwi Habaikutwa Kuli Habakoni Kulata Mulimu?”

Ki kabakalañi Mulimu habata kuli nizibe niti?

 Mulimu ubata kuli mupile kuya kuile, kacwalo, kuli mube ni tohonolo yeo, mutokwa kuituta niti ka za hae. (1 Timotea 2:4) Haiba muituta likuka za Mulimu ka za lika zelukile ni zesika luka ni kupila ka zona, mukaba balikani bahae babatuna. (Samu 15:1, 2) Kuli atuse batu kuituta niti, Mulimu naalumile Jesu fa lifasi. Mulimu ubata kuli luutwe lituto za Jesu.—Mateu 17:5; Joani 18:37.

Kana Mulimu ukafelisa bupumi?

 Eni. Mulimu utoile batu babahatelela babañwi ka bupumi. Usepisize kuli ukayundisa batu kaufela babali bapumi. (Samu 5:6) Mulimu hakaeza cwalo, hape ukataleleza sepiso yahae yeli: “Milomo yebulela niti ikaina kuya kuile.”—Liproverbia 12:19.