MUZWELEPILI KUTONA!
Kana Kangisano ya Mbola ya Mahutu ya Linaha za Lifasi Yakona Kutahisa Kuli Batu Baswalisane Luli?—Bibele Ibulelañi ka za Taba Yeo?
Batu baba bato eza 5 bilioni baka buha Kangisano ya Mbola ya Mahutu ya Linaha za Lifasi yekaba teñi kuzwa la November 20 kuisa la December 18, 2022. Batu babañata baikutwa kuli lipapali zecwalo likona kutahisa lika zende zeñata kwandaa kutahisa feela kuli batu baswalisane.
“Lipapali linani maata a kucinca lifasi. Linani maata a kususueza batu. Linani maata a kutahisa kuli batu baswalisane ka nzila yeipitezi.”—Nelson Mandela, yanaabanga mueteleli wa naha ya South Africa.
“Mbola ya mahutu . . . itahisezanga batu sepo, tabo, kulatana, ni kuswalisana ni batu babashutana-shutana.”—Gianni Infantino, mueteleli wa FIFA. a
Kana Kangisano ya Mbola ya Mahutu ya Linaha za Lifasi kamba papali ifi kamba ifi zakona kutahisa lika zecwalo? Kana kunani sepo ya kuli kukaba ni kozo ni swalisano?
Kana kangisano yeo yakona kuswalisanisa batu luli?
Kangisano ya Mbola ya Mahutu ya Linaha za Lifasi ya silimo se itahiselize batu kubulela litaba zeñata hahulu kwandaa za mbola feela. Kangisano yeo itahisize kuli batu babulele hahulu ka za litaba za mupilelo wa batu ni za lipolitiki zeama litukelo za batu, saluluti, ni sifumu.
Nihakuli cwalo, batu babañata baikolanga kubuha lipapali za lifasi zeswana sina Kangisano ya Mbola ya Mahutu ya Linaha za Lifasi. Kono batu niha baikolanga kubuha lipapali zeo, halikoni kutahisa swalisano yeinelela. Litahisanga feela kuli batu babonise mikwa yene ipolofitile Bibele kuli ki yona yeka zibahaza nako yebizwa “mazazi a mafelelezo.”—2 Timotea 3:1-5.
Sepo ya luli ka za swalisano ya mwa lifasi
Bibele ifa sepo ya luli ka za swalisano ya mwa lifasi kaufela. Isepisa kuli batu kaufela fa lifasi bakaswalisana mwatasaa mubuso wa kwa lihalimu obizwa “Mubuso wa Mulimu.”—Luka 4:43; Mateu 6:10.
Mulena wa Mubuso wo, yena Jesu Kreste, ukabona teñi kuli kunani kozo mwa lifasi kaufela. Bibele ibulela kuli:
“Yalukile ukakonda, mi kozo ikaekezeha.”—Samu 72:7.
“Ukalamulela mubotana yalilela kutusiwa . . . Uka balamulela kwa buhateleli ni kwa mifilifili.”—Samu 72:12, 14.
Nihaiba ka nako ye, lituto za Jesu litahisize kuli batu babañata babazwa mwa linaha ze 239 baswalisane. Baitutile kusatoya batu babañwi. Kuli mufumane litaba zeñata, mubale litaba zetatamana zenani toho ya taba yeli “Zekona Kulutusa Kufelisa Sitoyo.”
a Fédération Internationale de Football Association, katengo kakaokamela za papali ya mbola ya mahutu mwa lifasi kaufela.
Hape Mwendi Mwakona Kutabela Litaba Ze
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
TAWALA YA MULIBELELI
Mubuso wa Mulimu—Mulonga mo ku si na ku sa Sepahala
Lika ze 6 ze bonisa kuli mwa Mubuso wa Mulimu ha ku na ku ba ni ku sa sepahala.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
